ନାବାଳିକା ଦୁଷ୍କର୍ମ ମାମଲାରେ ଦଣ୍ଡାଦେଶ ଶୁଣାଇଲେ କୋର୍ଟ। ୨୦ ବର୍ଷ ଜେଲ ସହ ୩୦ ହଜାର ଜରିମାନା।

କନକ ବ୍ୟୁରୋ: ନାବାଳିକା ଦୁଷ୍କର୍ମ ମାମଲାର ଶୁୁଣାଣି କରି ଦଣ୍ଡାଦେଶ ଶୁଣାଇଛନ୍ତି ବ୍ରହ୍ମପୁର ଫାଷ୍ଟଟ୍ରାକ୍ ପୋକ୍ସ କୋର୍ଟ । ଜଜ୍ ଗଣେଶ୍ୱର ପତି ଜଣେ ୫୩ବର୍ଷୀୟ ଅଭିଯୁକ୍ତକୁ ୨୦ବର୍ଷ ଜେଲଦଣ୍ଡ ସହ ୩୦ହଜାର ଟଙ୍କା ଜୋରିମାନାରେ ଦଣ୍ଡିତ କରିଛନ୍ତି । ଜୋରିମାନା ଅନାଦେୟ ହେଲେ ଅଧିକା ୩ମାସ ଜେଲ ଦଣ୍ଡାଦେଶ ଶୁଣାଇଛନ୍ତି । ଏହା ସହ ଦୁଷ୍କର୍ମ ମାମଲାର ପିଡୀତାଙ୍କୁ ୫ଲକ୍ଷ ଟଙ୍କା ପ୍ରଦାନ ପାଇଁ ଗଞ୍ଜାମ ଜିଲ୍ଲା ଆଇନ ସେବା ପ୍ରାଧିକରଣଙ୍କୁ ନିର୍ଦ୍ଦେଶ ଦେଇଛନ୍ତି ବିଚାରପତି ।

୨୦୧୯ ମସିହା ସେପ୍ଟେମ୍ବର ୧୩ ତାରିଖ ଦିନ ଖଲିକୋଟ ଥାନା ଅଞ୍ଚଳରେ ନିଜ ଘର ସମ୍ମୁଖରେ ଖେଳୁଥିବା ଏକ ୧୦ବର୍ଷୀୟ ନାବାଳିକାକୁ ବିଭିନ୍ନ ପ୍ରଲୋଭନ ଦେଖାଇ ଅଭିଯୁକ୍ତ ପ୍ରହଲାଦ ବେହେରା ଦୁଷ୍କର୍ମ କରିବା ସହ ଖବର ପ୍ରଘଟ ନକରିବା ପାଇଁ କହିଥିଲ । ତେବେ ନାବାଳିକା ଜଣକ ପରିବାର ଲୋକଙ୍କୁ ଜଣାଇଦେବା ପରେ ୨୦୧୯ ମସିହା ସେପ୍ଟେମ୍ବର ୨୪ ତାରିଖ ଦିନ ନାବାଳିକାର ପରିବାର ଲୋକେ ଖଲିକୋଟ ଥାନାରେ ଏତଲା ଦେଇଥିଲେ । ଖଲିକୋଟ ଥାନା ପୋଲିସ ତଦନ୍ତ କରି ଅଭିଯୁକ୍ତ ପ୍ରହଲାଦକୁ ଗିରଫ କରି କୋର୍ଟ ଚାଲାଣ ପରେ ବ୍ରହ୍ମପୁର ମଣ୍ଡଳ କାରାଗାରକୁ ପଠାଇଥିଲା । ତଦନ୍ତ ଅଧିକାରୀଙ୍କ ଚାର୍ଜସିଟ୍ ସହ ୧୦ଜଣ ସାକ୍ଷୀଙ୍କ ସାକ୍ଷ୍ୟ ପ୍ରମାଣ ଆଧାରରେ ଅଭିଯୁକ୍ତ ପ୍ରହଲାଦ ବେହେରାକୁ ମାନ୍ୟବର କୋର୍ଟ ଦଣ୍ଡାଦେଶ ଦେଇଥିବା ଫାଷ୍ଟଟ୍ରାକ୍ ପୋକ୍ସ କୋର୍ଟର ସ୍ୱତନ୍ତ୍ର ପିପି ମୋହନ ସିଂଗାରୀ କହିଛନ୍ତି । ବୟସ ଯାହା ହେଉନା କାହିଁକି ପକସୋ ଆଇନ ସମସ୍ତଙ୍କ ପାଇଁ ସମାନ ବୋଲି ସେ କହିଛନ୍ତି ।