ଦୀପର ଆଲୋକରେ ଝଲସିଲା ଅଯୋଧ୍ୟାନଗରୀ : ସରଜୁ ତଟରେ ୬ ଲକ୍ଷ ୬ ହଜାରରୁ ଅଧିକ ଦୀପଜାଳି ଯୋଗୀ ସରକାରଙ୍କ ଗିନିଜ ବୁକ୍ ଅଫ୍ ରେକର୍ଡ; ସୀମାରେ ଜବାନ ଜାଳିଲେ ଦୀପ
କନକ ବ୍ୟୁରୋ : ଆଜି ଆଲୋକର ପର୍ବ ଦୀପାବଳି । ଅନ୍ଧକାର ଉପରେ ବିଜୟ ହାସଲର ପର୍ବ ଦୀପାବଳି । ଏହି ଅବସରରେ ଦୀପ ଆଲୁଅରେ ଝଲସିଛି ରାମଙ୍କ ନଗରୀ ଅଯୋଧ୍ୟା । ଉତରପ୍ରଦେଶର ଅଯୋଧ୍ୟା ସହରରୁ ନେଇ ରାମ ଜନ୍ମଭୂମୀ ସବୁ ହୋଇଉଠିଛି ଆଲୋକମୟ । ତେବେ ସରଜୁ ନଦୀ ତଟରେ ଆଲୋଜନ ହୋଇଛି ଦୀପୋତ୍ସବ । ଏକାଠି ଜଳିଛି ୬ ଲକ୍ଷ ୬ ହଜାରରୁ ଅଧିକ ଦୀପ । ଯାହାକି ଗିନିଜ୍ ବୁକ୍ ଅଫ୍ ରେକର୍ଡରେ ସ୍ଥାନ ପାଇଛି । ୬ ଲକ୍ଷରୁ ଅଧିକ ସଂଖ୍ୟାରେ ସାମୁହିକ ଦୀପ ପ୍ରଜ୍ୱଳନରେ ଝଲସି ଉଠିଛି ପୁରା ଅଯୋଧ୍ୟା ନଗରୀ । ଦୀପର ଆଲୋକ ସହିତ ରଙ୍ଗ ବେରଙ୍ଗର ଆଲୋକରେ ଉତ୍ସବ ମୁଖର ଅଯୋଧ୍ୟା ନଗରୀ ।
Kanak News is now on WhatsApp
Join and get latest news updates delivered to you via WhatsApp
ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ରାମଲଲାଙ୍କ ଦରବାରରେ ପ୍ରଥମ ଦୀପ ଲଗାଇ ଦୀପତ୍ସୋବ କାର୍ଯ୍ୟକ୍ରମର ଶୁଭାରମ୍ଭ କରିବା ପରେ ପରେ ଜଳି ଉଠିଥିଲା ୬ ଲକ୍ଷ ୬ ହଜାର ୫୬୯ଟି ଦୀପ । ସରଜୁ ନଦୀର ତଟରୁ ନେଇ ଅଯୋଧ୍ୟା ନଗରୀ ଯାଏଁ ଲଂବିଥିଲା ଏହି ଦୀପର ଆଲୋକମାଳା । ଡ୍ରୋନ୍ ଜରିଆରେ ଏହି ଦୀପକୁ ଗଣନା କରାଯିବା ପରେ ଗିନିଜ୍ ବୁକ୍ ଅଫ୍ ରେକର୍ଡରେ ଏହା ସ୍ଥାନ ଦିଆଯାଇଥିବା ସୂଚନା ମିଳିଛି । ଯୋଗୀ ଆଦିତ୍ୟନାଥ ଅଯୋଧ୍ୟାରେ ସରଜୁ ନଦୀ କୂଳରେ ଆଳତି କରିବା ପରେ ସାଂସ୍କୃତିକ କାର୍ଯ୍ୟକ୍ରମ ସହ ଭର୍ଚ୍ରୁଆଲ ଦିୱାଲୀ କାର୍ଯ୍ୟକ୍ରମରେ ସାମିଲ ହୋଇଥିଲେ ଭକ୍ତମାନେ । ଏହି ଅବସରରେ ଆକାଶ ମାର୍ଗରୁ ଅଯୋଧ୍ୟାର ଦୃଶ୍ୟ ବେଶ୍ ମନୋରମ ଦିଶୁଥିଲା । ସୁନ୍ଦର ଆଲୋକମାଳା, ତା ସହିତ ଝିଲମିଲ୍ ହୋଇ ଜଳୁଥିବା ୬ ଲକ୍ଷରୁ ଅଧିକ ଦୀପର ଆଲୋକ ସୃଷ୍ଟି କରୁଥିଲା ଅପୂର୍ବ ଶୋଭା ।
ଗତବର୍ଷ ଦୀପାବଳୀ ଅବସରରେ ଏଠାରେ ପ୍ରଭୁ ଶ୍ରୀରାମଙ୍କ ଉଦେଶ୍ୟରେ ୪ ଲକ୍ଷ ୧୦ ହଜାର ଦୀପ ପ୍ରଜ୍ୱଳିତ କରାଯାଇଥିଲା । ଚଳିତ ବର୍ଷ ୬ ଲକ୍ଷ ୬ ହଜାର ୫୬୯ଟି ଦୀପ ପ୍ରଜ୍ୱଳନ କରି ନିଜ ରେକର୍ଡକୁ ନିଜେ ଭଂଗ କରିଛନ୍ତି ଅଯୋଧ୍ୟା ପ୍ରଶାସନ । ଦୀପାବଳୀରେ ୭୯୧ ପୌରାଣିକ ସ୍ଥଳ ସମେତ ଘର ଓ କାର୍ଯ୍ୟାଳୟରେ ଏହି ଲକ୍ଷାଧିକ ସଂଖ୍ୟକ ଦୀପ ଜଳାଯାଉଛି । ୩ ଦିନ ଧରି ଏହି ଦୀପୋତ୍ସବ କାର୍ଯ୍ୟକ୍ରମ ଜାରି ରହିବ । ଏହି ଉତ୍ସବକୁ ସଫଳ କରିବାକୁ ପ୍ରାୟ ୮ ହଜାର ସ୍ୱେଛାସେବୀ ନିୟୋଜିତ ହୋଇଛନ୍ତି ।