ଜାମ୍ମୁ-କାଶ୍ମୀରେ ୩ ବିଜେପି କର୍ମୀଙ୍କ ହତ୍ୟାର ପ୍ରତିଶୋଧ ନେଲା ସେନା । ହତ୍ୟାର ୭୨ ଘଂଟା ମଧ୍ୟରେ ହଜ୍ଜିବୁଲ ଆତଙ୍କୀ ସଂଗଠନର ମୁଖ୍ୟ କମାଣ୍ଡରକୁ ଏନକାଉଣ୍ଟର କରି ହତ୍ୟା
କନକ ବ୍ୟୁରୋ : ଜମ୍ମୁ- କାଶ୍ମୀର ରାଜଧାନୀ ଶ୍ରୀନଗରୀରେ ରବିବାର ଭାରତୀୟ ସୁରକ୍ଷା ବଳ ହାତରେ ଲାଗିଛି ବଡ ସଫଳତା । ଜମ୍ମୁ-କାଶ୍ମୀର ପୋଲିସର କହିବା ମୁତାବକ ଶ୍ରୀନଗରରେ ପୋଲିସ ଓ ଆତଙ୍କୀ ସଂଗଠନ ହଜ୍ଜିବୁଲ ମୁଜ୍ଜାହିଦ୍ଦିନ୍ ମଧ୍ୟରେ ହୋଇଥିବା ଲଢେଇରେ ହଜ୍ଜିବୁଲ ମୁଜାହିଦ୍ଦିନ୍ ର ମୁଖ୍ୟ କମାଣ୍ଡର ଡ, ସୈଫଉଲ୍ଲାକୁ ଭାରତୀୟ ସୁରକ୍ଷା ବଳ ଏନକାଉଣ୍ଟର କରି ହତ୍ୟା କରିଛି । ଏହାସହ ଅନ୍ୟଜଣେ ଆତଙ୍କବାଦୀକୁ ଜୀବନ୍ତ ଧରିବାରେ ସଫଳ ହୋଇଛି ଭାରତୀୟ ସୁରକ୍ଷାବଳ । ଶ୍ରୀନଗରର ରଙ୍ଗରଥ ଅଞ୍ଚଳରେ କିଛି ଆତଙ୍କବାଦୀ ଲୁଚିଥିବା ନେଇ ପୋଲିସକୁ ସୂଚନା ମିଳିଥିଲା । ଏହି ସୂଚନା ପାଇବା ପରେ ପୋଲିସ ଓ ସୁରକ୍ଷାବଳ ତୁରନ୍ତ ଉକ୍ତ ଅଞ୍ଚଳକୁ ଘେରାବନ୍ଦି କରିଦେଇଥଲେ।
Kanak News is now on WhatsApp
Join and get latest news updates delivered to you via WhatsApp
ସୁରକ୍ଷାବଳ ଘେରିଯିବା ଦେଖି ଆତଙ୍କବାଦୀ ମାନେ ଗୁଳି ଚଳାଇବା ଆରମ୍ଭ କରିଦେଇଥିଲେ । ଲୁଚିଥିବା ଆତଙ୍କବାଦୀ ମାନଙ୍କୁ ଆତ୍ମସମର୍ପଣ କରିବାକୁ ସୁରକ୍ଷାବଳ ଚେତାବନି ଦେଇଥିଲେ । ହେଲେ ଆତଙ୍କବାଦୀମାନେ ଏହାକୁ ଅଣଦେଖା କରି ସୁରକ୍ଷାକର୍ମୀଙ୍କ ଉପରକୁ ଗୁଳିଚାଳନା କରିଥିଲେ । ଏହାର ଯବାବ୍ ଦେବାକୁ ଯାଇ ସୁରକ୍ଷାକର୍ମୀ ମାନେ ଆଖିବୁଜା ଗୁଳି ଚଳାଇଥିଲେ । ଏଥିରେ ହଜ୍ଜିବୁଲ ମୁଜ୍ଜାହିଦିନ୍ ର ମୁଖ୍ୟ କମାଣ୍ଡର ଡ.ସୈଫଉଲ୍ଲାଙ୍କ ମୃତ୍ୟୁ ହୋଇଥିବା ସୁରକ୍ଷାବଳ ସୂଚନା ଦେଇଛି ।
ଚଳିତବର୍ଷ ମେ ମାସରେ ହଜ୍ଜିବୁଲ ମୁଜ୍ଜାହିଦ୍ଦିନ୍ ର ମୁଖ୍ୟ କମାଣ୍ଡର ରିୟାଜ ନାଇକୁର ମୃତ୍ୟୁ ପରେ ସୈଫଉଲ୍ଲାଙ୍କୁ ହଜ୍ଜିବୁଲ କମାଣ୍ଡର ଭାବେ ନିଯୁକ୍ତି ଦେଇଥିଲା । ସେବେଠାରୁ ଭାରତୀୟ ସୁରକ୍ଷାବଳ ପାଇଁ ସୈଫଉଲ୍ଲା ମୁଣ୍ଡବ୍ୟଥାର କାରଣ ପାଲଟିଥିଲା ।
ଅନ୍ୟପଟେ ଏହି ଅପରେଶନରେ ଯେଉଁ ଆତଙ୍କବାଦୀକୁ ଜୀବନ୍ତ ଧରାଯାଇଛି ସେ ସ୍ଥାନୀୟ ଅଞ୍ଚଳର କି ବିଦେଶୀ ତାହା ସ୍ପଷ୍ଟ ହୋଇନାହିଁ । ହେଲେ ପୋଲିସ ମହାନିର୍ଦ୍ଦେଶକ ଦିଲବାଗ୍ ସିଂ କହିଛନ୍ତି କି ଯେଉଁ ଆତଙ୍କବାଦୀଙ୍କୁ ଧରାଯାଇଛି ସେ ସଂଦିଗ୍ଧ ଓ ତାଙ୍କୁ ପଚରା ଉଚରା କରାଯାଉଛି ।