ସୁଶାନ୍ତ ସିଂ ରାଜପୁତ୍ ମାମଲାର ସତ ଖୋଜିବ ସିବିଆଇ : ତଦନ୍ତ ପାଇଁ ଗଠନ ହେଲା ୪ ଜଣିଆ ଏସଟିଏଫ୍ ଟିମ୍; ସେପଟେ ତଦନ୍ତ ରିପୋର୍ଟ ଦେବାକୁ ମୁମ୍ୱାଇ ପୋଲିସକୁ ଚିଠି ଲେଖିବ ସିବିଆଇ
କନକ ବ୍ୟୁରୋ : ସୁଶାନ୍ତ ସିଂ ରାଜପୁତ ମାମଲାର ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ସିବିଆଇ ତଦନ୍ତ ପାଇଁ ଗଠନ ହେଲା ଏସଟିଏଫ୍ । ସିବିଆଇର ସ୍ପେଶାଲ ଟାସ୍କ ଫୋର୍ସ ଟିମ୍ରେ ସ୍ଥାନ ପାଇଛନ୍ତି ୪ ଜଣ ଅଧିକାରୀ । ଯୁଗ୍ମ ନିର୍ଦ୍ଦେଶକଙ୍କ ବାଦ୍ ଏଥିରେ ୩ ଜଣ ଅଧିକାରୀ ସାମିଲ ହୋଇଛନ୍ତି । ଏହି ମାମଲାରେ ବିହାରରେ ଦାଏର ହୋଇଥିବା ଏତଲାକୁ ସଠିକ୍ ଓ ଗ୍ରହଣୀୟ ବୋଲି କହିଛନ୍ତି ସର୍ବୋଚ୍ଚ ଅଦାଲତ । ଆଗରୁ ଏହି ମାମଲାର ତଦନ୍ତ ପାଇଁ ସଜାଗ ହୋଇ ରହିଥିଲା ସିବିଆଇ । ସୁପ୍ରିମକୋର୍ଟରୁ ନିର୍ଦ୍ଦେଶ ମିଳିବା ପରେ ପରେ ଏସଟିଏଫ୍ ଗଠନ କରିଦିଆଯାଇଛି । ଏହି ଏସଟିଏଫର ନେତୃତ୍ୱ ସିବିଆଇର ଯୁଗ୍ମ ନିର୍ଦ୍ଦେଶକ ମନୋଜ ଶଶିଧର କରିବେ ।
Kanak News is now on WhatsApp
Join and get latest news updates delivered to you via WhatsApp
ଏହା ବାଦ୍ ଏସଟିଏଫ୍ ଟିମରେ ଗଗନଦୀପ ଗମ୍ଭୀର, ଏସପି ନୁପୁର ପ୍ରସାଦ ଏବଂ ଅତିରିକ୍ତ ଏସପି ଅନୀଲ ଯାଦବ ସଦସ୍ୟ ରହିବେ । ସିବିଆଇର ଯାଂଚ ବିହାର ପୋଲିସ କରିଥିବା ଏଫଆଇଆର ଉପରେ ହିଁ ଆଧାରରେ ରହିବ । ଯେଉଁଥିରେ ଆତ୍ମହତ୍ୟା ପାଇଁ ଉସୁକାଇବା, ଠକେଇ ଏବଂ ଷଡଯନ୍ତ୍ର କରିବା ଘଟଣାର ତଦନ୍ତ କରାଯିବ । ବିହାର ପୋଲିସର ଏଫଆଇଆରରେ ଆଇପିସି ୩୪୧, ୩୪୮, ୩୮୦, ୪୦୬, ୪୨୦, ୩୦୬ ଏବଂ ୧୨୦ ସାମିଲ ରହିଛି । ସିବିଆଇ ଏସଟିଏଫ୍ ଖୁବଶୀଘ୍ର ମୁମ୍ୱାଇ ପୋଲିସକୁ ପତ୍ର ଲେଖିବ ।
ମାମଲାର କେସ୍ ଡାଏରୀ, କ୍ରାଇମସିନ୍ ର ଫଟୋଗ୍ରାଫ୍, ପଂଚନାମା ରିପୋର୍ଟ, ଶବ ବ୍ୟବଛେଦ ରିପୋର୍ଟ, ମୁମ୍ୱାଇ ପୋଲିସ କରିଥିବା ଫରେନସିକ୍ ରିପୋର୍ଟ ପ୍ରଭୃତି ତୁରନ୍ତ ପଠାଇବାକୁ କହିବ ଏସଟିଏଫ୍ । ଏହା ବାଦ୍ ସିବିଆଇ ଟିମ୍ ମୁମ୍ୱାଇର ବାନ୍ଦ୍ରାରେ ଥିବା ସୁଶାନ୍ତ ସିଂ ରାଜପୁତଙ୍କ ଘରର ମଧ୍ୟ ଅନୁଧ୍ୟାନ କରିବ । ଯେଉଁ ଘରେ ପଂଖାରେ ଶବ ଝୁଲୁଥିଲା ବୋଲି କୁହାଯାଇଛି ସେହିଘରକୁ ଦେଖିବ । ଏହି ସମୟରେ ଫରେନସିକ୍ ଟିମ୍ ମଧ୍ୟ ସିବିଆଇ ଏସଟିଏଫ୍ ସହିତ ସାମିଲ ହେବ । ଏହି ଘଟଣାରେ ଘଟଣାସ୍ଥଳରେ ଥିବା ଲୋକଙ୍କ ବୟାନ ପୁଣି ଥରେ ନିଆଯିବ । ଘଟଣାରେ ରିୟା ଚକ୍ରବର୍ତି ଓ ତାଙ୍କ ପରିବାର ସହିତ ପୁଣି ଥରେ ଜେରା କରିବ ସିବିଆଇ ଏସଟିଏଫ୍ । ଗତ ଜୁନ୍ ୧୪ ତାରିଖରେ ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ର ଶବ ଫ୍ୟାନରେ ଝୁଲନ୍ତା ଅବସ୍ଥାରେ ମିଳିଥିଲା ବୋଲି କୁହାଯାଇଥିଲା । ସେହି ଦିନଠାରୁ ଏହା ହତ୍ୟା କି ଆତ୍ମହତ୍ୟା ସନ୍ଦେହ ପ୍ରକାଶ ପାଇଛି ।