ଲଗାଣ ବର୍ଷାରେ ରାଜଧାନୀ ଉବୁଟୁବୁ : ଅଂଚଳରୁ ଜଳ ନିଷ୍କାସନ ପାଇଁ ଚାଲିଛି ଉଦ୍ୟମ, ପମ୍ପ ସେଟ୍ ଲଗାଇ ପାଣି ବାହାର କରିବାକୁ ଉଦ୍ୟମ
କନକ ବ୍ୟୁରୋ : ଲଗାଣ ବର୍ଷାରେ ରାଜଧାନୀରେ ଉବୁଟୁବୁ ସ୍ଥିତି । ରାଜଧାନୀର ଅନେକ ତଳିଆ ଅଂଚଳରେ ଏବେ ପାଣି ଭରି ରହିଗଲାଣି । ସ୍ଥିତି ଏମିତି ଯେ ଘରେ ପାଣି , ବାହାରେ ବି ପାଣି । ବଙ୍ଗୋପସାଗରରେ ସୃଷ୍ଟ ଲଘୁଚାପ କାରଣରୁ ବର୍ଷା ପରେ ଏପରି ସ୍ଥିତି ସୃଷ୍ଟି ହୋଇଛି । ଗତ ୪୦ ଘଂଟା ଭିତରେ ରାଜଧାନୀରେ ପ୍ରାୟ ୭୦ ମିଲିମିଟର ବର୍ଷା ପରେ ଜଳାର୍ଣ୍ଣବ ସ୍ଥିତି ସୃଷ୍ଟି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ରାଜଧାନୀରେ ଯେପରି କୌଣସି ଅଂଚଳ ଜଳାର୍ଣ୍ଣବ ନହେବ, ପାଣି ତୁରନ୍ତ ନିଷ୍କାସନ କରାଯିବ ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ ଇଂଜିନିୟରିଂ ବିଭାଗକୁ ନିର୍ଦ୍ଦେଶ ଦେଇଛନ୍ତି । କଟକ ରୋଡ୍, ନୂଆପଲ୍ଲୀ, ବେହେରା ସାହି, ଶତାବ୍ଦୀନଗର, ପଂଚଶାଖାନଗର, ଭୋଇସାହି, ଜ୍ୟୋସ୍ନା ଆପାର୍ଟମେଂଟ, ଝାରପଡା ଶାନ୍ତିନଗର ପରି ୫୦ରୁ ଅଧିକ ଅଂଚଳରେ ଏବେ ପାଣି ଭରି ରହିଛି ।
ଏହି ସମସ୍ତ ଅଂଚଳରୁ ପମ୍ପସେଟ୍ ଜରିଆରେ ପାଣି ନିସ୍କାସନ ବ୍ୟବସ୍ଥା ଆରମ୍ଭ କରିଛି ବିଏମସି । ରାଜଧାନୀର ଜଳାର୍ଣ୍ଣବ ଅଂଚଳରୁ ପାଣି ବାହାର କରିବାକୁ ୩୫ଟି ପମ୍ପସେଟ୍ ବ୍ୟବହାର କରାଯାଇଛି । ଏଥିରୁ ୨୦ଟି ଅଗ୍ନିଶମ ବାହିନୀର ଏବଂ ୧୫ଟି ପମ୍ପସେଟ୍ ବିଏମସିର । ଅନେକ ସ୍ଥାନରେ ବିଏମସି ଅଧିନରେ ଥିବା ଡ୍ରେନ୍ ଗୁଡିକର ସଫେଇ କାମ ସଠିକ ଭାବେ କରାଯାଉନଥିବାରୁ ବର୍ଷା ଦିନେ ଏପରି ଜଳବନ୍ଦୀ ଜୀବନ କାଟିବାକୁ ପଡୁଛି ବୋଲି ଅଭିଯୋଗ କରିଛନ୍ତି ରାଜଧାନୀବାସିନ୍ଦା ।