କେନାଲରେ ପାଣି ଆସୁ ଆସୁ ଭୁଶୁଡିଗଲା କଂକ୍ରିଟ୍ କାମ । ଜାନୁୟାରୀରେ ହୋଇଥିଲା ପ୍ରକଳ୍ପର ଉଦଘାଟନ, ଜୁଲାଇରେ ବାଲି ବସ୍ତା ପକାଇ ଚାଲିଛି ତାଲିପକା କାମ୍
କନକ ବ୍ୟୁରୋ: ୭୫୬ କୋଟି ଟଙ୍କା ବ୍ୟୟରେ ନିର୍ମିତ ହୋଇଥିବା ବୃହତ ଇନ୍ଦ୍ରାବତୀ ମେଗା ଉଠାଜଳସେଚନ ପ୍ରକଳ୍ପରେ ପାଣି ଛଡାଯିବାର ମାତ୍ର ଦିନ କେଇଠାରେ ବନ୍ଧ ଭାଙ୍ଗିଯିବା ସମସ୍ତଙ୍କୁ ଚକିତ କରିଛି । ଏତେ ଟଙ୍କା ବ୍ୟୟରେ କାର୍ଯ୍ୟ ହୋଇଥିଲେ ବି କାହିଁକି ଭୁଷୁଡିଲା ବନ୍ଧ ତାକୁ ନେଇ ସାଧାରଣ ଲୋକ ପ୍ରଶ୍ନ ଉଠାଇଛନ୍ତି । ଏଥିସହ ପାଣି ମାଡି ଯିବାରୁ ସେମାନଙ୍କୁ କ୍ଷତି ପୂରଣ ଦେବାକୁ ଦାବି ଜଣାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୋଟି କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଥିବା କଳାହାଣ୍ଡି କୋକସରା ବେହେରା ମଝି କେନାଲର ବନ୍ଧ ଭାଙ୍ଗି ଏମିତି ଘାଇ ସୃଷ୍ଟି ହେବା ସମସ୍ତଙ୍କ ଆଶ୍ଚର୍ଯ୍ୟ କରିଛି । ମାତ୍ର କିଛି ଦିନ ତଳେ ଏହି କେନାଲରେ ପାଣି ଛଡାଯାଇଥିଲା । ହେଲେ କେନାଲର ଉଭୟ ପାଶ୍ୱର୍ କଂକ୍ରିଟ ହୋଇଥିବାବେଳେ ବନ୍ଧ ଭାଙ୍ଗି ୨୦ ଫୁଟର ଘାଇ ହେବା କାମର ମାନକୁ ନେଇ ସନ୍ଦେହ ସୃଷ୍ଟି କରିଛି ।
ବନ୍ଧ ଭାଙ୍ଗିଯିବା ପରେ ଜରୁରୀକାଳିନ ଭିତରେ ମରାମତି କରାଯାଇଛି । ମାଟି ପକାଇ ଘାଇ ପୋତାଯିବା ସହ କଡରେ ବାଲି ବସ୍ତା ଦିଆଯାଇଛି । ଯେଉଁଠି କେନାଲରେ ପାଣି ଆସୁ ଆସୁ କଂକ୍ରିଟ ନିର୍ମାଣ ଭୁଷୁଡି ଯାଉଛି, ସେଠି ବାଲି ବସ୍ତା ଦମ୍ଭ ଧରିବ ତ । ପାଣି ଗଲା ବେଳକୁ ପୁଣି ଥରେ ଘାଈ ସୃ୍ଷ୍ଟି ହେବ ନାହିଁ ବୋଲି କିଏ ଦେବ ଗ୍ୟାରେଂଟି । ତେବେ ନିମ୍ନମାନର କାମ ଅଭିଯୋଗକୁ ଖଣ୍ଡନ କରିଛନ୍ତି ବିଭାଗୀୟ ଅଧକାରୀ । କହିଛନ୍ତି ଉଚ୍ଚ ଅଧିକାରୀଙ୍କ ଅନୁଧାନ ପରେ ପାଣି ଛଡାଯାଇଥିଲା ।
ଏବେ ପ୍ରଶ୍ନ ଉଠୁଛି, ଯେଉଁ ଅଧିକାରୀ କାମ ଠିକ୍ ଅଛି ବୋଲି ସାର୍ଟିଫିକେଟ ଦେଇଥିଲେ, ସେ ଏଥିପାଇଁ ଦାୟୀ ରହିବେ କି? ଗତ ୨୦୧୩ରେ ପ୍ରକଳ୍ପର ଶିଳାନ୍ୟାଶ ହୋଇଥିଲା । ୨୦୧୫ରେ ଏଲଆଣ୍ଡଟିକୁ କାମ ଦିଆଗଲା ଓ ୨୦୨୧ ଜାନୁଆରୀରେ ଏହାର ଉଦ୍ଦଘାଟନ କରିଥିଲେ । ହେଲେ ମାସ ସାତଟା ନପୂରୁଣୁ କେନାଲ ଭୁଷୁଡିବା ପ୍ରମାଣିତ କରୁଛି କାମ ନିମ୍ନ ମାନର ଥିଲା ଓ ଅଧିକାରୀ ସଠିକ୍ ତଦାରଖ କରିନଥିଲେ ।