ଦୁର୍ଘଟଣାଗ୍ରସ୍ତ ହେଲିକପ୍ଟରର ମିଳିଲା ବ୍ଲାକବକ୍ସ । ସାମ୍ନାକୁ ଆସିବ ଦୁର୍ଘଟଣା ପଛର କାରଣ । ସେପଟେ ସଂସଦରେ ପୂରା ଘଟଣା କହିଲେ ରାଜନାଥ ସିଂହ…
କନକ ବ୍ୟୁରୋ: ସେନାର ବିମାନ ଯୋଗେ ଆଜି ଦିଲ୍ଲୀ ଆସିବ ସିଡିଏସ ବିପିନ ରାୱତ ଏବଂ ତାଙ୍କ ପତ୍ନୀ ମଧୁଲିକାଙ୍କ ପାର୍ଥିବ ଶରୀର । ବିମାନ ବନ୍ଦରରୁ ମରଶରୀରକୁ ତାଙ୍କ ବାସଭବନକୁ ନିଆଯିବ । ଏହି ସମୟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ବିମାନ ବନ୍ଦରରେ ଉପସ୍ଥିତ ରହିବେ । ସଂଧ୍ୟାରେ ଏକ ଶ୍ରଦ୍ଧାଞ୍ଜଳି ସଭାର ମଧ୍ୟ ଆୟୋଜନ ହେବାର କାର୍ଯ୍ୟକ୍ରମ ରହିଛି । ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉପସ୍ଥିତ ରହିବେ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଯେତେବେଳେ ରାଜ୍ୟସଭାରେ ସିଡିଏସ୍ ବିପିନ ରାୱତଙ୍କ ମୃତ୍ୟୁ ନେଇ ବିବୃତ୍ତି ରଖୁଥିଲେ, ଶାସକ ଦଳ ସାଂସଦ ହୁଅନ୍ତୁ କି ବିରୋଧୀ ସାଂସଦ, ସମସ୍ତେ ଅତି ଧ୍ୟାନର ସହ ଏହାକୁ ଶୁଣୁଥିଲେ । କାରଣ ଏକ ଅତି ସମ୍ବେଦନଶୀଳ ପ୍ରସଙ୍ଗରେ ବିବୃତ୍ତି ରଖୁଥିଲେ ପ୍ରତିରକ୍ଷା ମନ୍ତ୍ରୀ । ଯେଉଁ ହେଲିକପ୍ଟର ଦୁର୍ଘଟଣାରେ ସିଡିଏସ ବିପିନ ରାୱତଙ୍କ ମୃତ୍ୟୁ ଘଟିଲା, ସେହି ପ୍ରସଙ୍ଗରେ ସଂସଦକୁ ଅବଗତ କରିଥିଲେ ପ୍ରତିରକ୍ଷା ମନ୍ତ୍ରୀ…
- ବୁଧବାର ୧୧ଟା ୪୮ରେ ସୁଲୁର ଏୟାରବେସରୁ ଉଡ଼ାଣ ଆରମ୍ଭ କରିଥିଲା ବାୟୁସେନା ହେଲିକପ୍ଟର
- ୱେଲିଂଟନ ସ୍ଥିତ ଡିଫେନ୍ସ ସର୍ଭିସ୍ ଷ୍ଟାଫ୍ କଲେଜରେ ପହଁଚିବାର ଥିଲା
- ହେଲିକପ୍ଟରରେ ମୋଟ୍ ୧୪ ଜଣ ଥିଲେ, ଦିନ ୧୨ଟା ୧୫ ସୁଦ୍ଧା ଗନ୍ତବ୍ୟ ସ୍ଥଳରେ ପହଁଚିବାର ଥିଲା
- ୧୨ଟା ୮ ମିନିଟରେ ଏୟାର ଟ୍ରାଫିକ କଂଟ୍ରୋଲ ସହ ହେଲିକପ୍ଟରର ଯୋଗାଯୋଗ ବିଚ୍ଛିନ୍ନ ହୋଇଥିଲା
- କୁନ୍ନୁର ଜଙ୍ଗଲ ନିକଟରେ ନିଆଁ ଜଳୁଥିବା କିଛି ସ୍ଥାନୀୟ ଲୋକ ଦେଖିବାକୁ ପାଇଥିଲେ
- ନିଆଁ ଜଳୁଥିବା ଜାଗାକୁ ଯାଇ ସେମାନେ ଦୁର୍ଘଟଣାଗ୍ରସ୍ଥ ହେଲିକପ୍ଟରକୁ ଦେଖିବାକୁ ପାଇଥିଲେ
ଏହି ଭୟାନକ ଦୁର୍ଘଟଣାରେ ସିଡିଏସ୍ ବିପିନ ରାୱତ, ତାଙ୍କ ପତ୍ନୀ ମଧୁଲିକାଙ୍କ ସମେତ୍ ମୋଟ୍ ୧୩ ଜଣଙ୍କ ଜୀବନ ଯାଇଛି । ଗ୍ରୁପ୍ କ୍ୟାପଟେନ ବରୁଣ ସିଂହ, ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି । ଏୟାର ମାର୍ଶଲ ମାନଭେନ୍ଦ୍ର ସିଂହଙ୍କ ନେତୃତ୍ୱରେ ଦୁର୍ଘଟଣାର ଉଚ୍ଚସ୍ତରୀୟ ତଦନ୍ତ କରାଯିବ ବୋଲି କହିଛନ୍ତି ପ୍ରତିରକ୍ଷା ସିଂହ । ସଂସଦରେ ସିଡିଏସ୍ ବିପିନ ରାୱତ ଓ ଅନ୍ୟ ମୃତକଙ୍କୁ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି ।
ଦୁର୍ଘଟଣାର ଖବର ଯେତେବେଳେ ସାମ୍ନାକୁ ଆସିଲା, ସେତେବେଳେ ସମସ୍ତଙ୍କ ମନରେ ଏକ ପ୍ରଶ୍ନ ଥିଲା, ଅତ୍ୟାଧୁନିକ ଜ୍ଞାନ କୌଶଳରେ ନିର୍ମିତ ଓ ସବୁଠୁ ସୁରକ୍ଷିତ କୁହାଯାଉଥିବା ଏମଆଇ-୧୭ ହେଲିକପ୍ଟର କେମିତି ଦୁର୍ଘଟଣାର ଶିକାର ହେଲା? ଏବେ ବ୍ଲାକବକ୍ସ ମିଳିବା ପରେ ଦୁର୍ଘଟଣାର ପ୍ରକୃତ କାରଣ ଜଣାପଡ଼ିବାର ସମ୍ଭାବନା ରହିଛି । ତେବେ କେତେ ଦିନ ଭିତରେ ହେଲିକପ୍ଟର ଦୁର୍ଘଟଣାର ପ୍ରକୃତ ତଥ୍ୟ ସାମ୍ନାକୁ ଆସିବ କହିବା କଷ୍ଟକର । କାରଣ, ବ୍ଲାକବକ୍ସରୁ ସଂପୂର୍ଣ୍ଣ ତଥ୍ୟ ବାହାର କରିବା ଯେତିକି କଷ୍ଟକର, ସେତିକି ସମୟ ସାପେକ୍ଷ ।
ତେବେ କିଛି ଦିନ ଭିତରେ ଦୁର୍ଘଟଣା ନେଇ ପ୍ରାଥମିକ ତଥ୍ୟ ମିଳିବା ଆଶା ରହିଛି । ଅନ୍ୟପଟେ ଦୁର୍ଘଟଣାରେ ମୃତ ବୀର ଯବାନଙ୍କ ପାର୍ଥିବ ଶରୀରକୁ ମିଲିଟାରୀ ହସ୍ପିଟାଲରୁ ମାଡ୍ରାସ ରେଜିମେଣ୍ଟକୁ ଅଣାଯିବା ପରେ ତାମିଲନାଡ଼ୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ୍ ଶ୍ରଦ୍ଧାଞ୍ଜଳି ଦେଇଛନ୍ତି । ଶୁକ୍ରବାର ଦିନ ଦିଲ୍ଲୀରେ ଜେନେରାଲ ରାୱତ ଓ ତାଙ୍କ ପତ୍ନୀଙ୍କ ଅନ୍ତିମ ସଂସ୍କାର ସମ୍ପନ୍ନ ହେବ ।