ଦିନ ବିତୁଛି, ମନ୍ତ୍ରୀଙ୍କ ପ୍ରତି ବିପଦ ବଢ଼ୁଛି: ଦିବ୍ୟଶଙ୍କର ମିଶ୍ରଙ୍କ ଇସ୍ତଫା ଦାବିରେ ରାଜଧାନୀ ଅଚଳ କରିଦେଲା ବିଜେପି
କନକ ବ୍ୟୁରୋ: ରାଜଧାନୀ ରାଜରାସ୍ତାରେ ପୋଲିସ ଓ ବିଜେପି ମହିଳା ମୋର୍ଚ୍ଚା କର୍ମୀ ମୁହାଁମୁହିଁ । ଶିଶୁ ଭବନ ଛକରେ ବ୍ୟାରିକେଡ ଭାଙ୍ଗି ନବୀନ ନିବାସକୁ ଯିବା ପାଇଁ ଉଦ୍ୟମ ବେଳେ ଧସ୍ତାଧସ୍ତି । ମମିତା ହତ୍ୟାକାଣ୍ଡ ପ୍ରସଙ୍ଗରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ବହିଷ୍କାର ଦାବୀରେ ଜୋରଦାର ବିକ୍ଷୋଭ କରିଛି ବିଜେପି । ଦିବ୍ୟ ଶଙ୍କରଙ୍କ ସରକାରୀ ବାସଭବନ ସମ୍ମୁଖରେ ବି ହୋଇଛି ପ୍ରଦର୍ଶନ । ଏପରିକି କିଛି ମହିଳା ସମସ୍ତ ସୁରକ୍ଷା ବଳୟକୁ ଭେଦ କରି ନବୀନ ନିବାସ ନିକଟରେ ପହଂଚିଯାଇଥିଲେ । ଆଉ ସାମ୍ବାଦିକ ସମ୍ମିଳନୀରେ ବିଜେଡି କହିଛି, ବିଜେପି ପତିଆରାର ଲଢେଇ ଲଢୁଛି ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ପୁଲିସର ଅବହେଳା ଏବଂ ନୀରବତା ପାଇଁ ସରକାର ଆଜି ବଦନାମ ହୋଇଛନ୍ତି, ସେହି ପୁଲିସ କିନ୍ତୁ ବିଜେପି କର୍ମୀଙ୍କୁ ଅଟକାଇବାକୁ ଏକ ଅଦଭୁତ ପୂର୍ବ ସୁରକ୍ଷାବଳୟ ତିଆରି କରିଥିଲା । ଶିଶୁଭବନ ଛକରୁ ନବୀନ ନିବାସ ଯାଏଁ ୨୪ ପ୍ଲାଟୁନ ଫୋର୍ସ ମୁତୟନ ହୋଇଥିଲେ ।
ସେପଟେ କଳାହାଣ୍ଡିରେ ମଧ୍ୟ ଏସପି ଅଫିସ ଘେରାଉ କରାଯିବା ବେଳେ ପୋଲିସ ସହ ସମ୍ନାସାମ୍ନି ହୋଇଛନ୍ତି ବିଜେପି ଯୁବ ମୋର୍ଚ୍ଚାର କର୍ମକର୍ତା । ପ୍ରସଙ୍ଗ ସମାନ- ମନ୍ତ୍ରୀମଣ୍ଡଳରୁ ଦିବ୍ୟଶଙ୍କରଙ୍କୁ ହଟାଅ ।
ବିରୋଧୀ କଂଗ୍ରେସ ମଧ୍ୟ ଦିବ୍ୟ ଶଙ୍କରଙ୍କ ବହିଷ୍କାର ଦାବୀ କରିଛି । ପିସିସି ସଭାପତି କହିଛନ୍ତି, ଲଜ୍ଜାଜନକ ଘଟଣାରେ ମୁଖ୍ୟମନ୍ତ୍ରୀ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଇତିହାସ ସୃଷ୍ଟି କରନ୍ତୁ ।
ମମିତା ମେହେର୍ ହତ୍ୟାକାଣ୍ଡ ଘଟଣାରେ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଓ ତା ସହଯୋଗୀଙ୍କୁ ଧରି ତଦନ୍ତ କରୁଛି ପୋଲିସ । ଗୋବିନ୍ଦ ଓ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟ ଶଙ୍କରଙ୍କ ସମ୍ପର୍କ ଦାଣ୍ଡରେ ପଡି ହାଟରେ ଗଡୁଛି । ତେଣୁ ତାଙ୍କ ବିରୋଧରେ ପୋଲିସ କେମିତି ତଦନ୍ତ କରିବ ତାହା ଉପରେ ସାଧାରଣରେ ପ୍ରଶ୍ନ ଉଠିଛି । ହତ୍ୟାର ଅନ୍ତରାଳରେ ଥିବା ପ୍ରସଙ୍ଗ ଉପରେ ପୋଲିସ କେବେ ତଦନ୍ତ କରିବ ନା ମାମଲା ରଫାଦଫା ହୋଇଯିବ?