କନକ ବ୍ୟୁରୋ: ଦୁର୍ଘଟଣା…କାହାକୁ କହିକି ଆସେନି । କିମ୍ବା ଛୋଟ ବଡ଼, ଧନୀ ଗରିବ, ତାକୁ କାହାର ପରିଚୟ ଦରକାରନାହିଁ । ଆଉ ସେହି ଦୁର୍ଘଟଣା କାହାର ସର୍ବନାଶ କରିଦିଏ ତ କାହାର ଭାଗ୍ୟ ଭବିଷ୍ୟତକୁ ଅନ୍ଧାରୀ ମୂଲକକୁ ଠେଲିଦିଏ । କିନ୍ତୁ ଦୁର୍ଘଟଣା ଯେ ଜଣେ ଟ୍ରକ ଡ୍ରାଇଭରକୁ ଦେବଦୂତ କରିଦେଇଛି ତାହା ଜାଣିଲେ ଆପଣ ବି ଚକିତ ହୋଇଯିବେ । ଏମିତି ଜଣେ ବ୍ୟକ୍ତିଙ୍କ କାହାଣୀ ଆମ କ୍ୟାମେରା ଲେନ୍ସରେ କଏଦ ହୋଇଛି । ଆସନ୍ତୁ ଜଣେ ଦେବଦୂତଙ୍କ ଦୁନିଆ ଭିତରକୁ ଯିବା ତାଙ୍କ ନିଷ୍ଠାପରର କାହାଣୀ ଜାଣିବା…
Kanak News is now on WhatsApp
Join and get latest news updates delivered to you via WhatsApp
ନାଁ ପଙ୍କଜ ତରାଇ ଓରଫ୍ ଦିପୁ ଭାଇ… ପାରାଦୀପ ଅଞ୍ଚଳରେ ପରୋପକାରୀ ମଣିଷ ଭାବେ ବେଶ୍ ପରଚିତ । କାରଣ ପାରାଦୀପଠାରୁ କୁଜଙ୍ଗ ରାସ୍ତା ମଝିରେ ୧୫ ବର୍ଷ ଭିତରେ ଯେବେ ଯେବେ ଦୁର୍ଘଟଣା ଘଟିଛି, ସେବେ ସେବେ ଦିପୁ ଭାଇ ଦେବଦୂତ ପାଲଟି ଦୁର୍ଘଟଣାଗ୍ରସ୍ତ ହୋଇଥିବା ବ୍ୟକ୍ତିଙ୍କ ପାଖରେ ପହଞ୍ଚି ଯାଆନ୍ତି । ଗୋଟିଏ ଫୋନ୍ ପାଇବା ପରେ ପାରୁପର୍ଯ୍ୟନ୍ତ ପ୍ରୟାସ କରି ଜୀବନ ବଞ୍ଚାଇବାକୁ ଲାଗିପଡ଼ନ୍ତି ପଙ୍ଗଜ । ଏପରିକି ନିଜ ସ୍ୱଳ୍ପ ଆୟ ଭିତରେ ମଧ୍ୟ ନିଜ ପକେଟରୁ ଖର୍ଚ୍ଚ କରିବାକୁ ତିଳେମାତ୍ର ବିଳମ୍ବ କରନ୍ତିନି ଏହି ବଡ଼ ହୃଦୟ ରଖିଥିବା ଦିପୁ ଭାଇ ।
ତେବେ ପଙ୍କଜଙ୍କ ପରୋପକାରୀ ପଛରେ ରହିଛି ଦୁର୍ଘଟଣାର ଏକ ହୃଦୟସ୍ପର୍ଶୀ କାହାଣୀ । ୧୫ ବର୍ଷ ତଳେ ଗୋଟିଏ ଦୁର୍ଘଟଣା ବଦଳାଇ ଦେଇଥିଲା ତାଙ୍କ ଜୀବନର ଗତିପଥ । ଦିନେ ରାସ୍ତାରେ ଟ୍ରକ୍ ନେଇ ଯାଉଥିବାବେଳେ ହଠାତ୍ ଦୁଇଜଣ ଯୁବକ ଦୁର୍ଘଟଣାରେ ଗୁରୁତର ଆହତ ହୋଇ ଚିକ୍ରାର କରୁଥିଲେ । ତାଙ୍କୁ ହସ୍ପିଟାଲରେ ଭର୍ତ୍ତି କରାଇ ଚିକିତ୍ସା କରାଇଥିଲେ ପଙ୍କଜ । କିନ୍ତୁ ଶତ ଚେଷ୍ଟା ପରେ ବି ଦୁଇଜଣ ଯୁବକ ବଞ୍ଚିପାରିଲେନି । ସେବେଠୁ ଶପଥ କରିଛନ୍ତି ଜଣା ହେଉ କି ଅଜଣା, ଆଖପାଖରେ ଯଦି କେବେ କେହି ଦୁର୍ଘଟଣାର ଶିକାର ହୁଅନ୍ତି । ତେବେ ତାଙ୍କ ଜୀବନ ବଞ୍ଚାଇବାକୁ ଯାହା ବି କରିବାକୁ ପଡ଼ିବ ସେ କରିବେ ସେଥିପାଇଁ ସେ ତିଆରି କରିଛନ୍ତି ‘ଦେବଦୂତ ଗ୍ରୁପ୍’ ।
ଜଣେ ଟ୍ରକ୍ ଡ୍ରାଇଭର କିନ୍ତୁ ଦରମା ଯେତିକି ହେଉ ପଛେ ସେଥିରେ ଅନ୍ୟର ଜୀବନ ବଞ୍ଚାଇବାକୁ ଅନବରତ ଅନେଇ ବସିଛନ୍ତି ପଙ୍କଜ । ସେଥିପାଇଁ ଦୀର୍ଘ ୧୫ ବର୍ଷ ମଧ୍ୟରେ ୩୦୦ରୁ ଅଧିକ ଦୁର୍ଘଟଣାଗ୍ରସ୍ତ ଲୋକଙ୍କୁ ମେଡିକାଲରେ ଭର୍ତ୍ତି କରାଇ ଚିକିତ୍ସା କଲେଣି । ନିଜ ପ୍ରତିଜ୍ଞାରେ ଅଟଳ ରହି ଦୁର୍ଘଟଣାସ୍ଥଳରୁ ହସ୍ପିଟାଲ ବେଡ୍ ଓ ତାପରେ ସେହି ଲୋକ ଜୀବନ ଫେରିପାଇବା ସତରେ କେତେ ଆତ୍ମସନ୍ତୋଷ ଦେଉଥିବ ତାହା ଶବ୍ଦରେ ବୟାନ କରିହେବନି ବୋଲି କହିଛନ୍ତି ପଙ୍କଜଙ୍କୁ ପାଖରୁ ଜାଣିଥିବା ଅନେକ ବ୍ୟକ୍ତି ।
ନିଶ୍ୱାର୍ଥପର ସେବା, ପରୋପକାରୀ ଦୟାଳୁ ହୃଦୟ ରଖିଥିବା ପଙ୍କଜ ତରାଇଙ୍କୁ ପାରାଦୀପରେ ପ୍ରଶଂସା କରୁଛନ୍ତି । ଜୀବିକା ପାଇଁ ବନିଛନ୍ତି ଟ୍ରକ୍ ଡ୍ରାଇଭର କିନ୍ତୁ ଅନେକଙ୍କ ଜୀବନଦାତା ପାଲଟି ଦୁର୍ଘଟଣାରେ ଆହତଙ୍କ ପାଇଁ ହୋଇଯାଇଛନ୍ତି ଦେବଦୂତ । ଆଜିର ସ୍ୱାର୍ଥପର ସମାଜକୁ ଶିଖାଉଛନ୍ତି ଯେ, ଆକ୍ସିଡେଣ୍ଟକୁ ଦେଖି ଖାଲି ଫଟୋ କି ଭିଡ଼ିଓ କରନ୍ତୁନି । ଆନ୍ତରିକତା ସହ ସେମାନଙ୍କ ଜୀବନ ରକ୍ଷା କରିବାକୁ ଆଜିର ଯୁବପୀଢ଼ିଙ୍କୁ ଅନୁରୋଧ କରିଛନ୍ତି ପଙ୍କଜ ତରାଇ ।