କରୋନାରେ ବର୍ଷିୟାନ ଅଭିନେତା ଅଜିତ ଦାସଙ୍କ ପରଲୋକ । ଦୁଇ ସପ୍ତାହ ପୂର୍ବରୁ ପଜିଟିଭ ଚିହ୍ନଟ ହେବା ପରେ ହସ୍ପିଟାଲରେ ଚାଲିଥିଲା ଚିକିତ୍ସା : ମୁଖ୍ୟମନ୍ତ୍ରୀ କହିଲେ ଓଡିଆ ଚଳଚ୍ଚିତ୍ର ଜଗତରେ ଅଲିଭା ଛାପ ଛାଡିଯାଇଛନ୍ତି ଅଜିତ
କନକ ବ୍ୟୁରୋ : ବର୍ଷିଆନ ଅଭିନେତା ବିଜୟ ମହାନ୍ତିଙ୍କ ପରଲୋକରେ ଏଭଳି ମନ୍ତବ୍ୟ ଦେବାର ଦୁଇ ମାସ ନପୁରୁଣୁ ସତେ ଯେମିତି ଉପରୁ ଡାକରା ଆସିଗଲା । କରୋନାରେ ଆକ୍ରାନ୍ତ ହେବା ପରେ ଓଲିଉଡରେ ଏହି ବର୍ଷିଆନ ଅଭିନେତାଙ୍କୁ ହସ୍ପିଟାଲରେ ଭର୍ତି କରାଯାଇଥିଲା । ସାଙ୍ଗରେ ପତ୍ନୀ ଡକ୍ଟର ମାୟା ଦାସ ବି ହସ୍ପିଟାଲରେ ଭର୍ତି ହୋଇଥିଲେ । କିନ୍ତୁ ୩ ଦିନ ତଳେ ପତ୍ନୀ ମାୟା ଭଲ ହୋଇ ଘରକୁ ଫେରି ଆସିଥିଲେ । କିନ୍ତୁ ଅଜିତ ଆଉ ଫେରିଲେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଆଜକୁ ୪୪ ବର୍ଷ ପୂର୍ବେ ୧୯୭୬ରେ ସିନ୍ଦୁର ବିନ୍ଦୁ ଚଳଚିତ୍ରରେ ଅଭିନୟ କରି ଓଲିଉଡ୍ରେ ପାଦ ଥାପିଥିବା ଏହି ଅଭିନେତା ୬୦ରୁ ଅଧିକ ଫିଲ୍ମରେ କାମ କରି ଓଡିଶାର ଘରେ ଘରେ ହାକିମ ବାବୁ ଭାବେ ପରିଚୟ ପାଇଛନ୍ତି ।
ଏହାପରେ ୧୯୮୫ରେ ଅଜିତ୍ ଦାସଙ୍କ ହାକିମବାବୁ ଚଳଚିତ୍ର ଓଡିଶାର ଚଳଚିତ୍ର ଜଗତକୁ ଦୋହଲାଇ ଦେଲା । ସୁପରଡୁପର ହିଟ୍ ହେବା ପରେ ଅଜିତ୍ ବାବୁ ଓଲିଉଡ୍ର ହାକିମ୍ ବନିଗଲେ । ଏବଂ ଏହି ଚଳଚିତ୍ର ପାଇଁ ଅଜିତ୍ ଦାସଙ୍କୁ ସରକରାଙ୍କ ପକ୍ଷରୁ ଶ୍ରେଷ୍ଠ ଅଭିନେତାର ପୁରସ୍କାର ଦିଆଯାଇଥିଲା ।
୮୦ ଦଶକରେ ଅନେକ ଗୁଡିଏ ଚଳଚିତ୍ରରେ ଅଭିନୟ କରିବା ପରେ ଏହି ବର୍ଷିଆନ ଅଭିନେତା ମଂଚନାଟକ ଆଡକୁ ମନବଳାଇଲେ । ଆଉ ଓଡିଶାର ମଂଚନାଟକ ଏକ ନୂଆ ଯୁଗରେ ପ୍ରବେଶ କଲା । ଏହାର ଛାପ ଆଜି ବି ରହିଛି ।