ଶୁଣିଲାନି ପ୍ରଶାସନ, ରାସ୍ତା ତିଆରି କଲେ ଲୋକେ : ଘର ପିଛା ଚାନ୍ଦା ସହ ଶ୍ରମଦାନ କରି ରାସ୍ତା ମରାମତି କଲେ ବରଗଡ ଜିଲ୍ଲା ଫଟାଟିକ୍ରା ଗାଁର ଲୋକେ; ନିଆରା ଉଦ୍ୟମକୁ ସାରା ଜିଲ୍ଲାରେ ପ୍ରଶଂସା
କନକ ବ୍ୟୁରୋ : ଶୁଣିଲା ନାହିଁ ପ୍ରଶାସନ, ଶେଷରେ ନିଜେ ଚାନ୍ଦା କରି ରାସ୍ତା ତିଆରି କଲେ ଗ୍ରାମବାସୀ । ବରଗଡ ଜିଲ୍ଲା ଭେଡେନ ବ୍ଲକ ଫଟାଟିକ୍ରା ଗ୍ରାମବାସୀ ଗାଁ ରାସ୍ତା ମରାମତି କରିଛନ୍ତି । ଗାଁର ପ୍ରତି ପରିବାର ପିଛା ୫ଶହ ଟଙ୍କା ଚାନ୍ଦା କରି, ସେହି ଅର୍ଥରେ ମାଟି ଓ ମୁରୁମ ଅଣାଯାଇଥିଲା । ଆଉ ଗାଁର ପିଲା ବୁଢା ସମସ୍ତେ ଶ୍ରମଦାନ କରି ମାତ୍ର ୨ ଦିନ ଭିତରେ ଗାଁ ରାସ୍ତାକୁ ମରାମତି କରିଛନ୍ତି । ପ୍ରାୟ ୩ଶହ ପରିବାର ରହୁଥିବା ଫଟାଟିକ୍ରା ଗାଁକୁ ଭଲ ରାସ୍ତା ଖଣ୍ଡେ ନାହିଁ । ଏପରିକି ବର୍ଷା ହେଲେ ଗାଁକୁ ଆମ୍ବୁଲାନ୍ସ ଯାଇପାରୁନଥିବାରୁ ସ୍ୱାସ୍ଥ୍ୟ ସେବା ବି ପ୍ରଭାବିତ ହେଉଥିଲା ।
Kanak News is now on WhatsApp
Join and get latest news updates delivered to you via WhatsApp
ଗାଁକୁ ପକ୍କା ରାସ୍ତା ନିର୍ମାଣ ପାଇଁ ସରପଂଚଙ୍କ ଠାରୁ ଆରମ୍ଭ କରି ବିଡିଓ, ଜିଲ୍ଲାପାଳ, ନେତା ମନ୍ତ୍ରୀଙ୍କୁ ଗୁହାରି କରିଥିଲେ ଗ୍ରାମବାସୀ । ହେଲେ ପ୍ରଶାସନ ନ ଶୁଣିବାରୁ ଗାଁଲୋକେ ନିଜ ଖର୍ଚ୍ଚରେ, ନିଜେ ଶ୍ରମଦାନ କରି ରାସ୍ତା ତିଆରି କରିଛନ୍ତି । ଗ୍ରାମବାସୀଙ୍କ ଏପରି ମହତ କାମକୁ ସାରା ଜିଲ୍ଲାରେ ଉଦାହରଣ ସୃଷ୍ଟି କରିଥିବା ବେଳେ ସବୁଆଡୁ ପ୍ରଶାସଂର ସୁଅ ଛୁଟୁଛି ।