ବଞ୍ଚିବାର ରାହା ଦେଇଛି ଟେରାକୋଟା କାରିଗରୀ: ମାଟିରେ ରଙ୍ଗବେରଙ୍ଗ ଡିଜାଇନର ମୂର୍ତ୍ତି ତିଆରି କରି ସ୍ୱାବଲମ୍ବୀ ହୋଇପାରିଛନ୍ତି ୩୦ରୁ ଅଧିକ ମହିଳା

କନକ ବ୍ୟୁରୋ: ଟେରାକୋଟା କାରିଗରି ଦେଇଛି ବଂଚିବାର ରାହା । ମାଟିରେ ରଙ୍ଗ ବେରଙ୍ଗ ଡିଜାଇନର ମୂର୍ତି ତିଆରି କରିବା ଓ ସେଗୁଡିକୁ ବିକ୍ରିକରି ସ୍ୱାବଲମ୍ବୀ ହୋଇପାରିଛନ୍ତି ୩୦ରୁ ଅଧିକ ମହିଳା । ଆମେ କହୁଛୁ ଯାଜପୁର ଧର୍ମଶାଳା ବ୍ଲକ ମଙ୍ଗରାଜପୁର ଗାଁର ସ୍ୱାବଲମ୍ବି ମହିଳାଙ୍କ ଟେରାକୋଟାର ଅନନ୍ୟ କାରିଗରି ସମ୍ପର୍କରେ ।

ଏମାନେ ହେଉଛନ୍ତି ଧର୍ମଶାଳା ବ୍ଲକ ମଙ୍ଗରାଜପୁର ଗାଁର ମହିଳା । ସମସ୍ତେ ଶିକ୍ଷିତ । ଘରକାମ କରିବା ସହ ଅବସର ସମୟରେ ତିଆରି କରୁଛନ୍ତି ଭଳିକି ଭଳି ଟେରାକୋଟା ମୂର୍ତି । ମା ମଙ୍ଗଳା ସ୍ୱୟଂ ସହାୟକ ଗୋଷ୍ଠୀ ଓ ମା ତାରିଣୀ ସ୍ୱୟଂ ସହାୟକ ଗୋଷ୍ଠୀ ନାଁରେ ଦୁଇଟି ଗ୍ରୁପ ତିଆରି କରି ୨୦୧୮ରୁ ଆରମ୍ଭ କରିଛନ୍ତି ଟେରାକୋଟା କାରିଗରି । ବିଲରୁ ମାଟିକୁ ସଂଗ୍ରହ କରି ତାକୁ ଚକଟି ହାତରେ ଖୁବ୍ ସୁନ୍ଦର ସୁନ୍ଦର ମାଟିମୂର୍ତି ତିଆରି କରୁଛନ୍ତି । ଗଣେଷ, କଇଁଛ, ଧୂପଦାନୀ, ଡଙ୍ଗା, ହାତୀ, ଦୀପ, ପେନଷ୍ଟାଣ୍ଡ, ଇତ୍ୟାଦି ତିଆରି କରି ଭାଟିରେ ପୋଡିବା ପରେ ରଙ୍ଗଦେଇ ବଜାରରେ ବିକ୍ରି କରୁଛନ୍ତି ମଙ୍ଗରାଜପୁରର ମହିଳା ।

ଆଂଚଳିକ ଶିଳ୍ପକେନ୍ଦ୍ର କଳିଙ୍ଗନଗର ଜଗତପୁର ପକ୍ଷରୁ ମହିଳା ସ୍ୱୟଂ ସହାୟକ ଗୋଷ୍ଠୀକୁ ଉପଯୁକ୍ତ ତାଲିମ ଦିଆଯାଇଛି । ଏବଂ ଏମାନେ ତିଆରି କରୁଥିବା ଟେରାକୋଟା ସମଗ୍ରୀ ଗୁଡିକକୁ ଜିଲ୍ଳା ଓ ରାଜ୍ୟସ୍ତରରେ ହେଉଥିବା ବାଣିଜ୍ୟ ମେଳାରେ ବିକ୍ରି କରିଥାନ୍ତି । ଆଉ ଟେରାକୋଟା କରିଗରି କାମ କରି ଗାଁର ୩୦ଟି ପରିବାରର ମହିଳାମାନେ ମାସକୁ ପ୍ରାୟ ୨ରୁ ୩ହଜାର ଟଙ୍କା ରୋଜଗାର କରିଥାନ୍ତି । ତେବେ ମଙ୍ଗରାଜପୁର ଗାଁର ଏହି ମହିଳା ମାନଙ୍କର ଟେରାକୋଟା ଶିଳ୍ପକୁ ସରକାରୀ ପ୍ରୋତ୍ସାହନ ମିଳିଲେ ସେମାନେ ଅଧିକ ରୋଜଗାରକ୍ଷମ ହୋଇପାରନ୍ତେ ।