କଳାର ସ୍ପର୍ଶ୍ପରେ ଜୀବନ୍ତ ହୋଇ ଉଠୁଛି ମାଟିର ମୂର୍ତ୍ତି । ରଙ୍ଗବେରଙ୍ଗର ଟେରାକୋଟା ସାମଗ୍ରୀ ଆଣିଦେଇଛି ସ୍ୱାବଲମ୍ବୀ ହେବାର ସୁଯୋଗ । ଚର୍ଚ୍ଚାରେ ଯାଜପୁର ମଙ୍ଗରାଜପୁର ଗାଁର ୩୦ ଜଣ ମହିଳା
କନକ ବ୍ୟୁରୋ: ଟେରାକୋଟା କାରିଗରୀ ଦେଇଛି ବଂଚିବାର ରାହା । ମାଟିରେ ରଙ୍ଗ ବେରଙ୍ଗ ଡିଜାଇନର ମୂର୍ତି ତିଆରି କରିବା ଓ ସେଗୁଡିକୁ ବିକ୍ରିକରି ସ୍ୱାବଲମ୍ବୀ ହୋଇପାରିଛନ୍ତି ୩୦ରୁ ଅଧିକ ମହିଳା । ଆମେ କହୁଛୁ ଯାଜପୁର ଧର୍ମଶାଳା ବ୍ଲକ ମଙ୍ଗରାଜପୁର ଗାଁର ସ୍ୱାବଲମ୍ବୀ ମହିଳାଙ୍କ ଟେରାକୋଟାର ଅନନ୍ୟ କାରିଗରି ସମ୍ପର୍କରେ ।
Kanak News is now on WhatsApp
Join and get latest news updates delivered to you via WhatsApp
ଧର୍ମଶାଳା ବ୍ଲକ ମଙ୍ଗରାଜପୁର ଗାଁର ମହିଳା ଘରକାମ କରିବା ସହ ଅବସର ସମୟରେ ତିଆରି କରୁଛନ୍ତି ଭଳିକି ଭଳି ଟେରାକୋଟା ମୂର୍ତି । ମା ମଙ୍ଗଳା ସ୍ୱୟଂ ସହାୟକ ଗୋଷ୍ଠୀ ଓ ମା ତାରିଣୀ ସ୍ୱୟଂ ସହାୟକ ଗୋଷ୍ଠୀ ନାଁରେ ଦୁଇଟି ଗ୍ରୁପ ତିଆରି କରି ୨୦୧୮ରୁ ଆରମ୍ଭ କରିଛନ୍ତି ଟେରାକୋଟା କାରିଗରି । ବିଲରୁ ମାଟିକୁ ସଂଗ୍ରହ କରି ତାକୁ ଚକଟି ହାତରେ ଖୁବ୍ ସୁନ୍ଦର ସୁନ୍ଦର ମାଟିମୂର୍ତି ତିଆରି କରୁଛନ୍ତି । ଗଣେଷ, କଇଁଛ, ଧୂପଦାନୀ, ଡଙ୍ଗା, ହାତୀ, ଦୀପ, ପେନଷ୍ଟାଣ୍ଡ, ଇତ୍ୟାଦି ତିଆରି କରି ଭାଟିରେ ପୋଡିବା ପରେ ରଙ୍ଗଦେଇ ବଜାରରେ ବିକ୍ରି କରୁଛନ୍ତି ମଙ୍ଗରାଜପୁରର ମହିଳା ।
ଆଂଚଳିକ ଶିଳ୍ପକେନ୍ଦ୍ର କଳିଙ୍ଗନଗର ଜଗତପୁର ପକ୍ଷରୁ ମହିଳା ସ୍ୱୟଂ ସହାୟକ ଗୋଷ୍ଠୀକୁ ଉପଯୁକ୍ତ ତାଲିମ ଦିଆଯାଇଛି ଏବଂ ଏମାନେ ତିଆରି କରୁଥିବା ଟେରାକୋଟା ସମଗ୍ରୀ ଗୁଡିକକୁ ଜିଲ୍ଳା ଓ ରାଜ୍ୟସ୍ତରରେ ହେଉଥିବା ବାଣିଜ୍ୟ ମେଳାରେ ବିକ୍ରି କରିଥାନ୍ତି । ଆଉ ଟେରାକୋଟା କରିଗରି କାମ କରି ଗାଁର ୩୦ଟି ପରିବାରର ମହିଳାମାନେ ମାସକୁ ପ୍ରାୟ ୨ରୁ ୩ ହଜାର ଟଙ୍କା ରୋଜଗାର କରିଥାନ୍ତି । ମଙ୍ଗରାଜପୁର ଗାଁର ଏହି ମହିଳା ମାନଙ୍କର ଟେରାକୋଟା ଶିଳ୍ପକୁ ସରକାରୀ ପ୍ରୋତ୍ସାହନ ମିଳିଲେ ସେମାନେ ଅଧିକ ରୋଜଗାରକ୍ଷମ ହୋଇପାରନ୍ତେ ।