ରାଉରକେଲା ସୁପର ସ୍ପେଶାଲିଟି ହସ୍ପିଟାଲକୁ ନେଇ ଥମୁନି ବିବାଦ : ମେଡିକାଲ କଲେଜ କୁଆଡେ ଗଲା ବୋଲି ବିଜେଡି-ସିଟୁର ପ୍ରଶ୍ନ
ହସ୍ପିଟାଲକୁ ଧସେଇ ପଶିଲେ, ଝାମେଲା କଲେ ବିଜେଡି ନେତା ଓ କର୍ମୀ; ସାଙ୍ଗରେ ଗଲେ ସିପିଆଇ ସମର୍ଥିତ ଶ୍ରମିକ ସାମ୍ମୁଖ୍ୟ ସିଟୁର କର୍ମୀ
କନକ ବ୍ୟୁରୋ : ଇସ୍ପାତ ସ୍ନାତକୋତର ପ୍ରତିଷ୍ଠାନ ଓ ସୁପର ସ୍ପେଶାଲିଟି ହସ୍ପିଟାଲର ଲୋକାର୍ପଣ ପରେ ବି ଥମୁନି ବିବାଦ । ମେଡିକାଲ କଲେଜ ନଖୋଲିବା, ଆନୁଷଙ୍ଗିକ ବ୍ୟବସ୍ଥା ଓ ଡାକ୍ତର ନିଯୁକ୍ତି ହୋଇ ନଥିବାବେଳେ ଏହାକୁ ଲୋକାର୍ପଣ କରାଯାଇଥିବାରୁ ପ୍ରବଳ ବିରୋଧ କରିଛନ୍ତି ଦୁଇ ରାଜନୈତିକ ଦଳ ବିଜେଡି ଓ ସିପିଏମ । ଉଭୟ ଦଳର କିଛି ନେତା ଓ କର୍ମୀ ହସ୍ପିଟାଲ ଭିତରକୁ ଧସେଇ ପଶିବା ସହ ଦାୟିତ୍ୱରେ ଥିବା ଅଧିକାରୀମାନଙ୍କୁ ଏଣୁ ତେଣୁ ପ୍ରଶ୍ନ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୁପର ସ୍ପେଶାଲିଟି ହସ୍ପିଟାଲକୁ ଯାଉଥିବା ରୋଗୀଙ୍କଠାରୁ ୫୦୦ ଟଙ୍କା ପଞ୍ଜିକରଣ ଫି ଆଦାୟ କରାଯାଉଥିବାବେଳେ ସେମାନଙ୍କୁ ସେଲ ପରିଚାଳିତ ଆଇଜିଏଚକୁ କାହିଁକି ରେଫର କରାଯାଉଛି ବୋଲି ପ୍ରଶ୍ନ କରି ବିଜେଡି ଓ ସିଟୁ କର୍ମୀମାନେ ଆନ୍ଦୋଳନ କରିଥିଲେ । ଯେପର୍ଯ୍ୟନ୍ତ ଆବଶ୍ୟକ ଚିକିତ୍ସା ସୁବିଧା ନମିଳିଛି ଓ ଦୁଇଟିଯାକ ମେଡିକାଲ କଲେଜ ନଖୋଲିଛି ସେପର୍ଯ୍ୟନ୍ତ ସୁପର ସ୍ପେଶାଲିଟି ହସ୍ପିଟାଲର ଆଉଟଡୋରକୁ ବନ୍ଦ ରଖିବା ପାଇଁ ଦାବି କରିଥିଲେ ବିକ୍ଷୋଭକାରୀ । ଏହାକୁ ନେଇ ହସ୍ପିଟାଲ ପରିସରରେ ଉତେଜନା ପ୍ରକାଶ ପାଇଥିଲା ।
ଅନ୍ୟ ପକ୍ଷରେ ବିଜେଡି ଓ ସିପିଏମ ସମର୍ଥିତ ସିଟୁର ଏଭଳି କାର୍ଯ୍ୟକୁ ନିନ୍ଦା କରିଛନ୍ତି ବିଜେପି ଓ ବିଜେପି ସମର୍ଥିକ ଶ୍ରମିକ ସଂଗଠନ ଭାରତୀୟ ମଜଦୁର ସଂଘ । ଏଭଳି କାଣ୍ଡ କରିଥିବା ନେତା ଓ କର୍ମୀଙ୍କ ଗିରଫ ଦାବିରେ ବୀରମିତ୍ରପୁର ବିଜେପି ବିଧାୟକ ଶଙ୍କର ଓରାମଙ୍କ ନେତୃତ୍ୱରେ ଶତାଧିକ କର୍ମୀ ରାଉରକେଲା ସେକ୍ଟର ୧୯ ଥାନା ଘେରାଉ କରିଥିଲେ ।