ବିଜେପି ଦେଲା ଟିକେଟ୍ ତାଲିକା, ବଢ଼ିଲା ଟେନସନ । ଲକ୍ଷ୍ମୀପୁର ବିଜେପିରେ ବିଦ୍ରୋହ, ପାର୍ଟି ଅଫିସରେ ପୋଡ଼ାଜଳା ।
କନକ ବ୍ୟୁରୋ: ବିଜେପି ଟିକେଟ୍ ଘୋଷଣା ହେବାପରେ ବିଭିନ୍ନ ବିଧାନସଭା କ୍ଷେତ୍ରରେ ଜଳୁଛି ଅସନ୍ତୋଷର ନିଆଁ । ଏହିପରି ଘଟଣା କୋରାପୁଟ ସଂସଦୀୟ କ୍ଷେତ୍ର ଅଧିନସ୍ଥ ଥିବା ଲକ୍ଷ୍ମୀପୁର ବିଧାନସଭା କ୍ଷେତ୍ରରେ ଦେଖିବାକୁ ମିଳିଛି । ଆଶାୟୀ ପ୍ରାର୍ଥୀଙ୍କୁ ଟିକେଟ୍ ନମିଳିବାରୁ ସମର୍ଥକମାନେ ବିଜେପି କାର୍ଯ୍ୟାୟ ଜାଳି ଦେଇଥିବା ଘଟଣା ସାମ୍ନାକୁ ଆସିଛି । ଲକ୍ଷ୍ମୀପୁର ବିଜେପିରେ ଦୁଇ ଗୋଷ୍ଠୀଙ୍କ ମଧ୍ୟରେ ବିଦ୍ରୋହ ଆରମ୍ଭ ହୋଇଛି । ଗତକାଲି ବିଜେପିର ୯୯ ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିଥିବାବେଳେ ଲକ୍ଷ୍ମୀପୁର ଆସନ ପାଇଁ ଯୁବନେତା କୁମୁଦ ସାଉନ୍ତଙ୍କୁ ଟିକେଟ୍ ଦେଇଛି ବିଜେପି । ଆଉ ଏହାପରେ ଆରମ୍ଭ ହୋଇଛି ବିବାଦ ।
Kanak News is now on WhatsApp
Join and get latest news updates delivered to you via WhatsApp
ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି ଯେ, ଏହି ଆସନ ପାଇଁ ବିଜେପି ତରଫରୁ ପ୍ରମୁଖ ଦାବିଦାର ଥିଲେ ବିଜେପିର ଅଭିଜ୍ଞ ନେତା ବିପିନ କୁମାର ମାନିଙ୍ଗା । ତାଙ୍କ ସମର୍ଥକଙ୍କ କହିବା ମୁତାବକ ବିପିନ୍ ଏହି ଅଞ୍ଚଳରେ ନିଜର ବିଜେପିର ବିଭିନ୍ନ ଜନହିତକାରୀ କାର୍ଯ୍ୟ କରି ଲୋକଙ୍କ ନିକଟତର ହୋଇଛନ୍ତି । ଏବଂ ତାଙ୍କ ସପକ୍ଷରେ ଭୋଟ ବ୍ୟାଙ୍କ ଥିବାବେଳେ ଜଣେ ଯୁବନେତାଙ୍କୁ ଟିକେଟ୍ କାହିଁକି ଦିଆଗଲା ବୋଲି ବିପିନଙ୍କ ସମର୍ଥକ ପ୍ରଶ୍ନ କରିଛନ୍ତି ? ଏପରିକି ବିଜେପି ରାଜ୍ୟ ସାଧାରଣ ସମ୍ପାଦକ ଭୃଗୁ ବକ୍ସିପାତ୍ରଙ୍କ ପାଖ ଲୋକ କୁମୁଦ ସାଉନ୍ତ ହୋଇଥିବାରୁ ତାଙ୍କୁ ଟିକେଟ୍ ଦିଆଯାଇଛି ବୋଲି ଅଭିଯୋଗ ଆଣିଛନ୍ତି ବିପିନଙ୍କ ସମର୍ଥକ ।
ସେହିପରି ଆସନ୍ତା ଏପ୍ରିଲ୍ ୧୧ ତାରିଖ ଦିନ ହେବାକୁଥିବା ପ୍ରଥମ ପର୍ଯ୍ୟାୟ ନିର୍ବାଚନରେ କୋରାପୁଟ ସଂସଦୀୟ କ୍ଷେତ୍ର ଅଧିନରେ ଯାଉଥିବା ଲକ୍ଷ୍ମୀପୁର ବିଧାନସଭା କ୍ଷେତ୍ରରେ ବିଦ୍ରୋହ ବଢ଼ିବାରେ ଲାଗିଛି । ଯାହାକି ବିଜେପି ପାଇଁ ମୁଣ୍ଡ ବ୍ୟଥାର କାରଣ ପାଲଟିଥିବା ସ୍ଥାନୀୟ ମହଲରେ ଶୁଣିବାକୁ ମିଳୁଛି ।