ଶୀତରେ ଥରୁଛି ସାରା ରାଜ୍ୟ । ୧୦ ଡିଗ୍ରୀ ତଳେ ୧୫ଟି ସ୍ଥାନର ପାରଦ। ଜାଣନ୍ତୁ କେତେ ରହିଛି ଓଡିଶାର ବିଭିନ୍ନ ସହରର ଆଜିର ସର୍ବନିମ୍ନ ତାପମାତ୍ରା
କନକ ବ୍ୟୁରୋ: ସାରା ରାଜ୍ୟରେ ଜାରି ରହିଛି ଶୀତର ଥାର୍ଡଡିଗ୍ରୀ । ଅସହ୍ୟ ଜାଡରେ ଥରୁଛି ସାରା ଓଡିଶା । ମୟୂରଭଂଜଠୁ ମାଲକାନଗିରି, ସମ୍ବଲପୁରରୁ ଜଗତସିଂହପୁର ଯାଏଁ ସବୁଠି ଅନୁଭୂତ ହେଉଛି ପ୍ରବଳ ଥଣ୍ଡା । ତାପମାତ୍ରା ଗୋଟିଏ ଦିନରେ ୪ ରୁ ୫ ଡିଗ୍ରୀ ତଳକୁ ଖସି ଆସିଛି । ୧୫ଟି ସ୍ଥାନରେ ତାପମାତ୍ରା ୧୦ ଡିଗ୍ରୀ ତଳେ ରହିଥିବା ବେଳେ ସୋନପୁରରେ ସର୍ବନିମ୍ନ ତାପମାତ୍ରା ୩ ଦଶମିକ ୪ ଡିଗ୍ରୀ ରହିଛି । ସେପଟେ, ପ୍ରବଳ ଥଣ୍ଡା ଯୋଗୁଁ କନ୍ଧମାଳ ଜିଲ୍ଲା ବାଲିଗୁଡା-ଦାରିଙ୍ଗିବାଡି ଓ ସିମନବାଡିରେ ତୁଷାରପାତ ହୋଇଛି । ତେବେ ଓଡିଶାର କାଶ୍ମୀର କୁହାଯାଉଥିବା ଏହି ଦାରିଙ୍ଗିବାଡିରେ ଚଳିତ ବର୍ଷ ଏହା ପ୍ରଥମ ତୁଷାରପାତ । ଦୁଇଦିନ ହେଲା କୋହଲା ପାଗ ସାଙ୍ଗକୁ ତୁଷାରପାତ ହେବା ଦ୍ୱାରା ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ତାଜା ସୂଚନା ଅନୁଯାୟୀ, କେନ୍ଦୁଝରରେ ୬.୬ ଡିଗ୍ରି ସେଲସିଅସ୍, ଝାରସୁଗୁଡ଼ାରେ ୭.୩ ଡିଗ୍ରି ସେଲସିଅସ୍, ଦାରିଙ୍ଗିବାଡ଼ିରେ ୫.୫ ଡିଗ୍ରି ସେଲସିଅସ୍, ସମ୍ବଲପୁରରେ ୭.୪ ଡିଗ୍ରି ସେଲସିଅସ୍, ବାଲେଶ୍ୱରରେ ୮.୬ ଡିଗ୍ରି ସେଲସିଅସ୍, କଟକରେ ୧୦.୨ ଡିଗ୍ରି ସେଲସିଅସ୍, ହୀରାକୁଦରେ ୧୦.୧ଡିଗ୍ରି ସେଲସିଅସ୍ , ଟିଟଲାଗଡ଼ରେ ୬.୧ ଡିଗ୍ରି ସେଲସିଅସ୍ ,ଅନୁଗୁଳରେ ୪.୬ ଡିଗ୍ରି ସେଲସିଅସ୍ ,ବାରିପଦାରେ ୯ ଡିଗ୍ରି ସେଲସିଅସ୍ , ସୁନ୍ଦରଗଡ଼ରେ ୯ ଡିଗ୍ରି ସେଲସିଅସ୍ ,ପୁରୀରେ ୧୨ ଡିଗ୍ରି ସେଲସିଅସ୍ ,ଓ ରାଜଧାନୀ ଭୁବନେଶ୍ୱରରେ ତାପମାତ୍ରା ୧୦.୨ ଡିଗ୍ରି ସେଲସିଅସ୍ ତାପମାତ୍ରା ରହିଛି।
ଏପଟେ, ଆସନ୍ତା ତିନି ଦିନ ଯାଏ ରାଜ୍ୟରେ ଶୀତ ଲହରୀ ଜାରି ରହିବା ନେଇ କହିଛି ପାଣିପାଗ ବିଭାଗ । ଏଥିପାଇଁ ୁ ୧୮ଟି ଜିଲ୍ଲା ତଥା ସୁନ୍ଦରଗଡ, ଦେବଗଡ, କେନ୍ଦୁଝର, ଅନୁଗୁଳ, ମୟୂରଭଞ୍ଜ, ଝାରସୁଗୁଡା, ସମ୍ବଲପୁର, ବରଗଡ, ଢ଼େଙ୍କାନାଳ, ବାଲେଶ୍ୱର, ଭଦ୍ରକ, କଟକ, ଖୋର୍ଦ୍ଦା, ପୁରୀ,ନୟାଗଡ, ବୌଦ୍ଧ, ସୋନପୁର,ବଲାଙ୍ଗୀରକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ଏହି ସବୁ ଜିଲ୍ଲାରେ ଶୀତ ଲହରି ପ୍ରବାହିତ ହେବ । ସେହିପରି ଉତରଓଡିଶାର ଆଭ୍ୟନ୍ତରୀଣ ଅଂଚଳ, ବାଲେଶ୍ୱର, କଟକ, ସୋନପୁର, ବୌଦ୍ଧ ଓ ବଲାଙ୍ଗୀରରେ ପ୍ରବ ଥଣ୍ଡା ଅନୁଭୂତ ହେବ । ଏହା ସହିତ କନ୍ଧମାଳ, କଳାହାଣ୍ଡି, କୋରାପୁଟ ଓ ବଲାଙ୍ଗୀର ଜିଲ୍ଳାର କେତେକ ସ୍ଥାନରେ ଘନ କୁହୁଡି ପଡିବାର ଆଶଙ୍କା ରହିଛି । ସେଥିପାଇଁ ଏହିସବୁ ଜିଲ୍ଲାକୁ ମଧ୍ୟ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେପଟେ ଅସହ୍ୟ ଥଣ୍ଡା ଯୋଗୁଁ ଦିଲ୍ଲୀ, ଉତରପ୍ରଦେଶ ସମେତ ୬ ରାଜ୍ୟରେ ରେଡ୍ ଆଲର୍ଟ ଜାରି କରିଛି ପାଣିପାଗ ବିଭାଗ ।