ପୁଣି ଚର୍ଚ୍ଚାରେ କୋରାପୁଟ ଲମତପୁଟର ଡ୍ୟାନ୍ସିଂ ସାର । ତିଆରି କଲେ ଅନନ୍ୟ ଉଦାହରଣ । ପୁଅର ଦେହାନ୍ତ ପରେ ତିଆରି କଲେ ଶବ ଦାହ ମଣ୍ଡପ
ହିମାଚଳରେ ପାହାଡ ଚଢିବାକୁ ଯାଇ, ଆଉ ଫେରିନଥିଲା ପୁଅ
କନକ ବ୍ୟୁରୋ: ପୁଣି ଚର୍ଚ୍ଚାରେ କୋରାପୁଟ ଲମତାପୁଟର ଡ୍ୟାନ୍ସିଂ ସାର । କିନ୍ତୁ ଏଥର ଚର୍ଚ୍ଚା ତାଙ୍କର ନିଆରା ପାଠପଢା ଶୈଳୀକୁ ନେଇ ନୁହେଁ । ବରଂ ଭିନ୍ନ କାରଣକୁ ନେଇ । ନାଚ, ଗୀତ ମାଧ୍ୟମରେ ସରକାରୀ ସ୍କୁଲର ଛୋଟଛୋଟ ପିଲାଙ୍କୁ ପାଠ ପଢାଉଥିବା ପ୍ରଧାନ ଶିକ୍ଷକ ପ୍ରଫୁଲ୍ଲ କୁମାର ପାଠୀ, ତିଆରି କରିଛନ୍ତି ଏକ ଶବ ଦାହ ମଣ୍ଡପ । କାହିଁକି?
Kanak News is now on WhatsApp
Join and get latest news updates delivered to you via WhatsApp
ନାଚ, ଗୀତ ମାଧ୍ୟମରେ ସରକାରୀ ସ୍କୁଲର ଛୋଟ ଛୋଟ ପିଲାଙ୍କୁ ପାଠ ପଢାଉଥିବା ଏହି ବ୍ୟକ୍ତି କୋରାପୁଟ ଲମତାପୁଟ ସ୍କୁଲର ପ୍ରଧାନ ଶିକ୍ଷକ ପ୍ରଫୁଲ୍ଲ କୁମାର ପାଠୀ । ସାଧାରଣତଃ ଇଂରାଜୀ ମାଧ୍ୟମ ସ୍କୁଲରେ ଏଭଳି ପାଠପଢା ଶୈଳୀ ଦେଖିବାକୁ ମିଳୁଥିବାବେଳେ, ଓଡିଆ ମାଧ୍ୟମ ସରକାରୀ ସ୍କୁଲରେ ଏଭଳି ନିଆରା ଢଙ୍ଗରେ ପାଠ ପଢାଇ ବେଶ ଚର୍ଚ୍ଚାକୁ ଆସିଥିଲେ ଶିକ୍ଷକ ଜଣକ । ଆଦିବାସୀ ଅଧ୍ୟୁଷିତ ଅଂଚଳରେ ପିଲାଙ୍କୁ ପାଠପ୍ରତି ଆକୃଷ୍ଟ କରିବା ପାଇଁ ସାର ଏଭଳି ପାଠ ପଢାଉଥିବାର ଚିତ୍ର ପୂର୍ବରୁ କନକ ନ୍ୟୁଜରେ ଆପଣ ଦେଖିସାରିଛନ୍ତି ।
ସ୍କୁଲରେ ପିଲାଙ୍କ ମେଳରେ ପିଲା ପାଲଟି ଯାଉଥିବା ପ୍ରଫୁଲ୍ଲ ସାରଙ୍କ ଘରେ କିନ୍ତୁ ଅସମ୍ଭବ ନିରବତା । ଆଉ ଏହି ନିରବତାକୁ ଚିରି ପକାଉଥିବା କାନ୍ଦ ତାଙ୍କ ପତ୍ନୀ ଅନ୍ନପୂର୍ଣ୍ଣା ଶତପଥୀଙ୍କର । ସାର ଓ ତାଙ୍କ ପତ୍ନୀଙ୍କ ଆଖିରେ ଲୁହର କାରଣ ଜାଣିଲେ କଠୋର ହୃଦୟ ବି ତରଳିଯିବ । ୨୦୧୮ ମସିହା ମେ ୧ ତାରିଖ ପାଠୀ ପରିବାର ପାଇଁ ନେଇ ଆସିଥିଲା ଦୁଃଖର ପାହାଡ । କାରଣ ପାହାଡ ଚଢିବାର ନିଶାରେ ଘରୁ ବାହାରି ଯାଇଥିବା ଭେଣ୍ଡିଆ ପୁଅ ଆଉ ଫେରିନଥିଲା । ଆସିଥିଲା ତାର ମୃତ୍ୟୁ ଖବର ।
୪ ଜଣ ସାଙ୍ଗଙ୍କ ସହିତ ହିମାଚଳରେ ପାହାଡ ଚଢିବାକୁ ଯାଇଥିବା ପୁଅ ଆଉ ଦେହଧରି ଫେରିନାହିଁ । ମାଆ ପାଖରେ ରହିଯାଇଛି କେବଳ ତାର ମୋବାଇଲ । ଯେଉଁ ମୋବାଇଲରେ ପୁଅର ଫଟୋକୁ ଦେଖି ପୁରୁଣା ସ୍ମୃତିକୁ ସାଉଁଟୁଛନ୍ତି ବାପା, ମାଆ । ଭୁବନେଶ୍ୱର ଟିସିଏସରେ ସ୍ରଫ୍ଟୱେୟାର ଇଂଜିନିୟର ଭାବେ କାମ କରୁଥିବା ପୁଅ ଆଶୁତୋଷର ପାହାଡ ଚଢିବା ପାଇଁ ଥିଲା ଅସମ୍ଭବ ନିଶା । ପୁଅର ବିବାହ ସ୍ଥିର ହୋଇସାରିଥିଲା । ବାହାଘର ପରେ କାଳେ ଆଉ ସ୍ୱାଧୀନତା ମିଳିବନି ସେହି ଆଶଙ୍କାରେ ଶେଷଥର ପାଇଁ ହିମାଚଳରେ ପାହାଡ ଚଢିବାକୁ ଯାଇଥିଲା ପୁଅ । ଅକ୍ସିଜେନ ଅଭାବରୁ ଆଉ ପାହାଡ ଶିଖରକୁ ଯାଇପାରିଲେନି ଆଶୁତୋଷ । ଚିକିତ୍ସାଧୀନ ଅବସ୍ଥାରେ ଆଖି ବୁଜିଲେ ।
ପୁଅ ତ ଫେରିଲାନି, ଏବେ ତାର ସ୍ମୃତିକୁ ସାଇତି ରଖିବା ପାଇଁ ନିଆରା ପ୍ରୟାସ କରିଛନ୍ତି ଡ୍ୟାନ୍ସିଂ ସାର । ନିଜସ୍ୱ ଖର୍ଚ୍ଚରେ ତିଆରି କରିଛନ୍ତି ଏକି ଶବ ଦାହ ମଣ୍ଡପ । ପୁଅ ନାଁରେ ନିର୍ମାଣ କରିଛନ୍ତି ଆଶୁତୋଷ ଶବ ମଣ୍ଡପ । ନାଚି, ଗାଇ ନିଆରା ଶୈଳୀରେ ଛୋଟଛୋଟ ପିଲାଙ୍କୁ ପାଠ ପଢାଉଥିବା ଜଣେ ଶିକ୍ଷକଙ୍କ ଛାତି ଭିତରେ ଯେ, ଏତେ କୋହ ଭରିରହିଛି, ତାହା କାହାକୁ ଜଣାଥିଲା । ସତରେ ଡ୍ୟାନ୍ସିଂ ସାର ଆପଣଙ୍କ ପାଠପଢା ଶୈଳୀ ଓ ଆପଣଙ୍କ ଜୀବନ ସଂଘର୍ଷର କାହାଣୀ ସମସ୍ତଙ୍କ ପାଇଁ ବିରାଟ ପ୍ରେରଣାର ଶ୍ରୋତ ।