ଟାଟା ଟେଲିକୁ କିଣିବ ଏୟାରଟେଲ୍
ଟାଟା ଗ୍ରୁପର ଟେଲିକମ୍ ସେବା ପ୍ରଦାନକାରୀ କଂପାନି ଟାଟା ଟେଲି ସର୍ଭିସେସର ମୋବାଇଲ୍ ବ୍ୟବସାୟକୁ ସୁନିଲ ମିତ୍ତଲଙ୍କ କଂପାନି ଭାରତୀ ଏୟାରଟେଲ୍ ଅଧିଗ୍ରହଣ କରିବ । ଟାଟା ଟେଲିର କୌଣସି ଋଣକୁ ଏୟାରଟେଲ୍ ନିଜ କାନ୍ଧକୁ ନେବ ନାହିଁ କିମ୍ବା ଏଥିପାଇଁ କୌଣସି ନଗଦ ରାଶି ମଧ୍ୟ ଗଣିବ ନାହିଁ । ସ୍ପେକ୍ଟ୍ରମ୍ ବାବଦରେ ଟାଟା ଟେଲି ୧୦,୦୦୦ କୋଟି ଟଙ୍କାର ୭୦-୮୦ ପ୍ରତିଶତ ଅର୍ଥ ରାଶି ପ୍ରଦାନ କରିବାର ବାକି ଅଛି । ତାହାକୁ ମଧ୍ୟ ଟାଟା ଗ୍ରୁପ୍ ହିଁ ପ୍ରଦାନ କରିବ । ସେ ଦାୟିତ୍ୱ ମଧ୍ୟ ଏୟାରଟେଲ୍ ନେବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ତେବେ ଟାଟାର ସ୍ପେକ୍ଟ୍ରମ୍ ପେମେଣ୍ଟ୍ ବାବଦରେ ୧୫୦୦ କୋଟି ଟଙ୍କା ପାଖାପାଖି ଏୟାରଟେଲ ଦେଇପାରେ ବୋଲି ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି । ସବୁ କ୍ଷେତ୍ରରୁ ମଞ୍ଜୁରି ମିଳିବା ପରେ ଏୟାରଟେଲ୍ ଦ୍ୱାରା ଟାଟା ଟେଲି ଅଧିଗ୍ରହଣ ଶେଷ ହୋଇପାରିବ । ଏହି ମିଶ୍ରଣ ଶେଷ ହେବା ପରେ ଟାଟା ଟେଲି ପାଖରେ ଥିବା ୪ କୋଟି ଗ୍ରାହକ ଏୟାରଟେଲରେ ମିଶିଯିବେ। ଦେଶର ୧୯ଟି ସର୍କଲରେ ଟାଟା ଟେଲିର ସ୍ପେକ୍ଟ୍ରମ୍ ରହିଛି । ତେଣୁ ଏହି କଂପାନିକୁ ଅଧିଗ୍ରହଣ କଲେ ଏୟାରଟେଲର ସ୍ଥିତି ଏହି ସବୁ ସର୍କଲଗୁଡ଼ିକରେ ଆହୁରି ମଜବୁତ ହେବ ।
ଟାଟା ସନ୍ସର ଅଧ୍ୟକ୍ଷ ଏନ୍ ଚନ୍ଦ୍ରଶେଖରନ୍ କହିଛନ୍ତି ଯେ, ଟାଟା ଗ୍ରୁପ୍ ଏବଂ ଏହାର ଅଂଶୀଦାରଙ୍କ ପାଇଁ ଏହି ବୁଝାମଣା ହେଉଛି ସବୁଠୁ ଶ୍ରେଷ୍ଠ ବିକଳ୍ପ । ଟାଟା ଟେଲି ବୋଝକୁ ଖସାଇବା ପାଇଁ ଟାଟା ଗ୍ରୁପ୍ ଅନେକ ପ୍ରକାର ବିକଳ୍ପ ଉପରେ ଚିନ୍ତା କରିବା ପରେ ଏହି ବ୍ୟବସାୟକୁ ବନ୍ଦ କରିଦେବାକୁ ନିଷ୍ପତ୍ତି ନେଇଥିଲା । କିନ୍ତୁ ଚନ୍ଦ୍ରଶେଖରନ୍ ନିଜ ଆଡୁ ଏହି କାରବାରକୁ ବଞ୍ଚାଇ ରଖିବା ପାଇଁ ସୁନିଲ ମିତ୍ତଲଙ୍କ ସହିତ ଆଲୋଚନା ଜାରି ରଖିଥିଲେ । ଶେଷରେ ବୁଝାମଣା ପାଇଁ ମିତ୍ତଲଙ୍କୁ ବୁଝାଇବାରେ ଚନ୍ଦ୍ରଶେଖରନ୍ ସଫଳ ହୋଇଛନ୍ତି । ଟାଟା ଟେଲିର ଅପ୍ଟିକାଲ୍ ଫାଇବର୍ ନେଟଓ୍ଵର୍କକୁ ବ୍ୟବହାର କରିବାର ଅଖଣ୍ଡ କ୍ଷମତା ମଧ୍ୟ ଏୟାରଟେଲ୍ ହାସଲ କରିବ ।