ଟାର୍ଗେଟ କିଲିଂରେ ଥରୁଛି କଶ୍ମୀର। ଆକ୍ସନ ମୋଡରେ କେନ୍ଦ୍ର ସରକାର ।
କନକ ବ୍ୟୁରୋ: ଜାମ୍ମୁକଶ୍ମୀରରେ ବଢିଚାଲିଛି ଟାର୍ଗେଟ କିଲିଂ ଘଟଣା । ଜଣଙ୍କ ପରେ ଜଣେ ହିନ୍ଦୁ, କାଶ୍ମୀର ପଣ୍ଡିତଙ୍କୁ ଟାର୍ଗେଟ କରି ହତ୍ୟା କରୁଛନ୍ତି ଆତଙ୍କବାଦୀ । ୨୬ଦିନ ଭିତରେ ୧୦ଜଣଙ୍କୁ ହତ୍ୟା କରି ପୁଣି କାଶ୍ମୀର ଘାଟିକୁ ରକ୍ତରଂଜିତ କରିଛନ୍ତି ଆତଙ୍କୀ । ଘଟଣାକୁ ଗମ୍ଭୀରତା ସହ ଗ୍ରହଣ କରି ଏବେ ଆକ୍ସନ ମୋଡକୁ ଆସିଛନ୍ତି କେନ୍ଦ୍ର ସରକାର । ଆଜି ଗୃହମନ୍ତ୍ରୀ ଅମିତ ଶାହାଙ୍କ ଅଧ୍ୟକ୍ଷତାରେ ଦୁଇଟି ଉଚ୍ଚସ୍ତରୀୟ ବୈଠକ ବସିଛି । ବୈଠକରେ ଜାତୀୟ ସୁରକ୍ଷାପରାମର୍ଶଦାତା ଅଜିତ ଡୋଭାଲ, ଜାମ୍ମୁକାଶ୍ମୀର ଉପରାଜ୍ୟପାଳ ମନୋଜ ସିହ୍ନା, ଗୁଇନ୍ଦା ବିଭାଗର ବରିଷ୍ଠ ଅଧିକାରୀ, କାଶ୍ମୀର ପ୍ରଦେଶର ମୁଖ୍ୟ ଶାସନ ସଚିବ ଓ ଜାମ୍ମୁକାଶ୍ମୀର ପୁଲିସର ବରିଷ୍ଠ ଅଧିକାରୀ ଉପସ୍ଥିତ ଥିଲେ । ସୂଚନା ଅନୁଯାୟୀ ବୈଠକରେ ୪ଟି ମୁଖ୍ୟ ପ୍ରସଙ୍ଗ ଉପରେ ଆଲୋଚନା କରାଯାଇଛି ।
● କାଶ୍ମୀରରେ ରହୁଥିବା ହିନ୍ଦୁ, ଅଣକାଶ୍ମିରୀ ଓ କାଶ୍ମୀର ପଣ୍ଡିତଙ୍କୁ କଡ଼ା ସୁରକ୍ଷା ଦିଆଯିବ
● ଆତଙ୍କବାଦୀଙ୍କୁ ମୁହଁତୋଡ୍ ଜବାବ ଦେବାକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ ହେବ
● ଘାଟିରୁ ଆତଙ୍କୀଙ୍କ ମୂଳପୋଛ ପାଇଁ ବ୍ଲୁପ୍ରିଂଟ ପ୍ରସ୍ତୁତ ହେବ
● ଘାଟିରେ ଶିଘ୍ରବଡଧରଣର ଅପରେସନ ସମ୍ଭାବନା ରହିଛି
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ପୂର୍ବରୁ ଅଫିସରେ ପଶି ଆତଙ୍କବାଦୀମାନେ କାଶ୍ମୀର ପଣ୍ଡିତ ରାହୁଲ ଭଟ୍ଟଙ୍କୁ ହତ୍ୟା କରିଥିଲେ । ପରେ ଜଣେ ହିନ୍ଦୁ ଯବାନ, ଶିକ୍ଷୟିତ୍ରୀ, ବ୍ୟାଙ୍କ କର୍ମଚାରୀ ଓ ପ୍ରବାସୀ ଶ୍ରମିକଙ୍କୁ ହତ୍ୟା କରିଛନ୍ତି । ଏଭଳିସ୍ଥିତିରେ ସାଧାରଣ ନାଗରିକ ସରକାରଙ୍କ ସୁରକ୍ଷା ପ୍ରତିଶ୍ରୁତି ଉପରେ ଭରଷା କରିପାରୁନାହାଁନ୍ତି । କୋକୁଆ ଭୟଭିତରେ ନିଜ ଜୀବନ ବଞ୍ଚାଇବା ହିନ୍ଦୁଙ୍କ ପଳାୟନ ଆରମ୍ଭ ହୋଇଛି । ଏବେ ସୁଦ୍ଧା ୩ହଜାରରୁ ଅଧିକ ହିନ୍ଦୁ କାଶ୍ମୀର ଛାଡିଚାଲିଯାଇଥିବା କୁହାଯାଉଛି । ସେପଟେ ଟାର୍ଗେଟ କିଲିଂ ଘଟଣାକୁନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରୁଛନ୍ତି ବିରୋଧୀ । କାଶ୍ମୀର ପାଇଁ ସରକାର ଗମ୍ଭୀର ନଥିବା କହିଛି ଶିବସେନା ଓ କଂଗ୍ରେସ ।
ଆତଙ୍କବାଦୀଙ୍କ ଟାର୍ଗେଟ କିଲିଂ ପଛରେ ମୁଖ୍ୟତଃ ଦୁଇଟି କାରଣ ରହିଥାଇପାରେ । କାଶ୍ମୀରର ସଂଖ୍ୟାଲଘୁଙ୍କୁ କେନ୍ଦ୍ରଶାସିତ ପ୍ରଦେଶରୁ ବାହାର କରିବା ଉଦ୍ଦେଶ୍ୟ । କେନ୍ଦ୍ର ସରକାରଙ୍କ ଉପରେ ଚାପ ପକାଇବା ପାଇଁ ଚେଷ୍ଟା ହୋଇପାରେ । ବର୍ତ୍ତମାନର ଏହି ଟାର୍ଗେଟ କିଲିଂ ଘଟଣା ୯୦ଦଶକର କାଶ୍ମୀର ଘାଟିର ସେହି ଲୋମହର୍ଷଣକାରୀ ଦିନକୁ ମନେପକାଉଛି । ଯେଉଁ ସମୟରେ କାଶ୍ମୀରପଣ୍ଡିତଙ୍କୁ ବର୍ବରତା ସହ ହତ୍ୟା କରୁଥିଲେ ଆତଙ୍କବାଦୀ ଓ ଆରମ୍ଭ ହୋଇଥିଲା ହିନ୍ଦୁଙ୍କ ପଳାୟନ ।