ଉପାନ୍ତ ଅଞ୍ଚଳର ସଫଳ ଯୁବ ଚାଷୀ । ଛତୁ ଚାଷ କରି ନିଜେ ରୋଜଗାରକ୍ଷମ ହେବା ସହ ଅନ୍ୟଙ୍କୁ ଦେଇଛନ୍ତି ନିଯୁକ୍ତି, ଲଗାଇଛନ୍ତି ୯୦୦ରୁ ଅଧିକ ଛତୁ ବେଡ ।
କନକ ବ୍ୟୁରୋ : ଉପାନ୍ତ ଅଞ୍ଚଳର ସଫଳ ଯୁବ ଚାଷୀ । ନିଜେ ରୋଜଗାରକ୍ଷମ ହେବା ସହ ଅନ୍ୟକୁ ରୋଜଗାର ଦେବା ଭଳିି ଚାଷ କରି ଦେଖାଇଛନ୍ତି ବରଗଡ ଜିଲ୍ଲା ପଦ୍ମପୁର ଅଂଚଳର ଯୁବ ଛତୁ ଚାଷୀ ତରଣୀସେନ ନାଏକ । ଛତୁ ଚାଷ କରି ଅଂଚଳରେ ସେ ଏବେ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ପାଞ୍ଚ ବର୍ଷ ପୂର୍ବରୁ ସେ ଛତୁ ଚାଷ ଆରମ୍ଭ କରିଥିଲେ । ଏବେ ପ୍ରାୟ ୯୦୦ରୁ ଅଧିକ ଛତୁ ବେଡ ଲଗାଇଛନ୍ତି । ଏବେ ତରଣୀଙ୍କ ଛତୁ ଫାର୍ମରେ ୧୫ ଜଣ ପୁରୁଷ ଓ ମହିଳା ଶ୍ରମିକ କାମ କରନ୍ତି ।
Kanak News is now on WhatsApp
Join and get latest news updates delivered to you via WhatsApp
ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଚର୍ଦାପାଲି ଗ୍ରାମର ଯୁବ ଚାଷୀ ତରଣୀସେନ ନାଏକ । ଛତୁ ଚାଷ କରି ଅଞ୍ଚଳରେ ସେ ଏବେ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି । ପାଞ୍ଚ ବର୍ଷ ପୂର୍ବରୁ ବ୍ରହ୍ମପୁରରେ ଏକ ଘରୋଇ ପ୍ରତିଷ୍ଠାନରୁ ଛତୁ ଚାଷ ତାଲିମ ପରେ ୩ ଡେସିମିଲ ଜାଗାରେ ଛତୁ ଚାଷ ଆରମ୍ଭ କରିଥିଲେ । ପ୍ରଥମେ ୩୦୦ ବେଡରୁ ଛତୁ ଚାଷ ଆରମ୍ଭ କରିଥିଲେ ତରଣୀସେନ । ଏବେ ୫ ଡେସିମିଲ ଜାଗାରେ ପ୍ରାୟ ୯୦୦ରୁ ଅଧିକ ବେଡ ତିଆରି କରି ଛତୁ ଚାଷ କରୁଛନ୍ତି ଏବଂ ଲାଭବାନ ହେଉଛନ୍ତି । ତରଣୀ ପ୍ରତିଦିନ ୩୦ରୁ ୩୫ କିଲୋ ଛତୁ ଅମଳ କରିଥାନ୍ତି । ତାଙ୍କ ଛତୁର ଚାହିଦା ଥିବା କାରଣରୁ ପଦ୍ମପୁର ଅଂଚଳର ବ୍ୟବସାୟୀ ତାଙ୍କ ଘରକୁ ଯାଇ ୨୦୦ ରୁ ୨୭୦ ଟଙ୍କା କେଜି ପ୍ରତି ଛତୁ କିଣି ନେଉଛନ୍ତି
ଏବେ ତରଣୀଙ୍କ ଛତୁ ଫାର୍ମରେ ୧୫ ଜଣ ପୁରୁଷ ଓ ମହିଲା ଶ୍ରମିକ କାମ କରନ୍ତି । ଛତୁ ଚାଷ ପାଇଁ ପ୍ରଥମେ ଭାଡି ତିଆରି କରାଯାଇଥାଏ । ପରେ ପାଳ ବିଡା ତିଆରି କରି ପାଳ ବିଡାର ଉଭୟ ମୁଣ୍ଡକୁ ସାଇଜରେ କାଟି ଚୂନ ପାଣିରେ ବତୁରାଇ ଦିଆଯାଏ । ଏହା ପରେ ପାଳ ବିଡା ଗୁଡିକରେ ଛତୁ ମଞ୍ଜି ଦେଇ ପ୍ରଥମରୁ ତିଆରି ହୋଇଥିବା ଭାଡିରେ ବେଡ ତିଆରି କରାଯାଏ ଏବଂ ତାକୁ ପଲିଥିନରେ ଘୋଡାଇ ରଖାଯାଇଥାଏ । ୧୫ରୁ ୧୮ ଦିନ ମଧ୍ୟରେ ଛତୁ ଅମଳ ଆରମ୍ଭ ହୋଇଥାଏ ।
ନିଜ ଦୃଢ଼ ଇଚ୍ଛା ଶକ୍ତି ଓ ପରିଶ୍ରମ ଯୋଗୁଁ ଛତୁଚାଷ କରି ନିଜେ ସ୍ୱାବଲମ୍ବୀ ହେବା ସହ ଅନ୍ୟକୁ ରୋଜଗାର ଯୋଗାଇବାରେ ସଫଳ ହୋଇଛନ୍ତି ଯୁବ ଚାଷୀ ତରଣୀସେନ ।