କନକ ବ୍ୟୁରୋ : ଋଷ-ୟୁକ୍ରେନ୍ ଯୁଦ୍ଧ ଭିତରେ ଏବେ ଋଷ ବିରୋଧରେ ଅସ୍ତ୍ର ଉଠାଇଛନ୍ତି ଜଣେ ଭାରତୀୟ ଯୁବକ । ଋଷ-ୟୁକ୍ରେନ୍ ଯୁଦ୍ଧକୁ ନେଇ ଭାରତ ଏଯାବତ କାହା ସପକ୍ଷରେ ମୁହଁ ଖୋଲିନଥିବା ବେଳେ ଭାରତୀୟ ଯୁବକ କିଭଳି ଋଷ ବିରୋଧରେ ଅସ୍ତ୍ର ଉଠାଇଲେ ତାହାକୁ ନେଇ ଆପଣଙ୍କ ମନରେ ପ୍ରଶ୍ନ ଉଠୁଥିବ । କିନ୍ତୁ ଏଭଳି ଏକ ଘଟଣା ଏବେ ସାମ୍ନାକୁ ଆସିଛି । ଋଷ ବିରୋଧରେ ଅସ୍ତ୍ର ଉଠାଇଛନ୍ତି ତାମିଲନାଡୁର ଜଣେ ଯୁବକ ।

Advertisment

ଋଷ-ୟୁକ୍ରେନ୍ ଯୁଦ୍ଧ ଭିତରେ ୟୁକ୍ରେନ୍ ସେନାରେ ସାମିଲ ହୋଇଛନ୍ତି ତାମିଲନାଡୁର ଯୁବକ । ଆଉ ସବୁଠୁ ବଡ କଥା ହେଲା ୟୁକ୍ରେନ୍ ସେନାରେ ସାମିଲ ହୋଇଥିବା ଯୁବକ ଜଣକ ପୂର୍ବରୁ ଭାରତୀୟ ସେନାରେ ସାମିଲ ହେବାକୁ ପରୀକ୍ଷା ଦେଇଥିଲେ । ଥରେ ନୁହେଁ ଦୁଇ ଦୁଇ ଥର । କିନ୍ତୁ କମ ଉଚ୍ଚତା କାରଣରୁ ଭାରତୀୟ ସେନାରେ ତାଙ୍କୁ ଏଣ୍ଟ୍ରି ମିଳିନଥିଲା । ଆଉ ୟୁକ୍ରେନ ସେନାରେ ସାମିଲ ହୋଇଥିବା ଯୁବକ ଜଣକ ହେଉଛନ୍ତି ୨୧ ବର୍ଷୀୟ ସୈନିକେଶ ରବିଚନ୍ଦ୍ରନ । ତାମିଲନାଡୁର କୋଏମ୍ବାଟୁରର ଯୁବକ ରବିଚନ୍ଦ୍ରନ ଯୁଦ୍ଧ ଭଳି ସଙ୍କଟଜନକ ସ୍ଥିତିରେ ୟୁକ୍ରେନ୍ ସେନାରେ ସାମିଲ ହୋଇ ଋଷ ବିରୋଧରେ ଲଢେଇ କରିବାକୁ ଆଗେଇ ଆସିଛନ୍ତି । ଆଉ ଏହାସହ ସେନାରେ ସାମିଲ ହେବା ସ୍ୱପ୍ନକୁ ମଧ୍ୟ ପୂରା କରିଛନ୍ତି । ଅନ୍ୟପଟେ ଏନେଇ ରବିଚନ୍ଦ୍ରନଙ୍କ ପରିବାରକୁ ପଚରାଉଚରା ପରେ ଜଣାପଡିଛି ଯେ, ସେନାରେ ସାମିଲ ହେବାକୁ ଛୋଟବେଳୁ ସ୍ୱପ୍ନ ଦେଖୁଥିଲେ ରବିଚନ୍ଦ୍ରନ । ଏପରିକି ଭାରତୀୟ ସେନାରେ ସାମିଲ ହେବାକୁ ପରୀକ୍ଷା ଦେଇଥିଲେ ମଧ୍ୟ ଏଥିରେ ଫେଲ ହୋଇଥିଲେ ସେ । ଏପରିକି ଆମେରିକା ସେନାରେ ସାମିଲ ହେବାକୁ ମଧ୍ୟ ରବିଚନ୍ଦ୍ରନ ଇଚ୍ଛା ପ୍ରକାଶ କରିଥିଲେ ବୋଲି କହିଛନ୍ତି ତାଙ୍କର ନିକଟ ସର୍ମ୍ପକୀୟ । କିନ୍ତୁ ଏଠାରେ ମଧ୍ୟ ବିଫଳ ହେବା ପରେ ୟୁକ୍ରେନର ଖାରକିଭରେ ଥିବା ନ୍ୟାସନାଲ ଏରୋସ୍ପେଶ ବିଶ୍ୱବିଦ୍ୟାଳୟରେ ପାଠପଢା ଆରମ୍ଭ କରିଥିଲେ । ୨୦୧୮ରେ ପାଠ ପଢା ପାଇଁ ୟୁକ୍ରେନ ଯାଇଥିଲେ ରବିଚନ୍ଦ୍ରନ ।

୨୦୨୨ ଜୁଲାଇରେ ରବିଚନ୍ଦ୍ରନଙ୍କ ପାଠ୍ୟକ୍ରମ ଶେଷ ହେବାକୁ ଥିବା ବେଳେ ଗତ ବର୍ଷ ଜୁଲାଇ ମାସରେ ସେ ଭାରତକୁ ମଧ୍ୟ ଆସିଥିଲେ । ପାଖାପାଖି ଦେଢ ମାସ ରହିବା ପରେ ପୁଣିଥରେ ୟୁକ୍ରେନ ଫେରି ଯାଇଥିଲେ ରବିଚନ୍ଦ୍ରନ । ପରେ ପରିବାର ସହ ଯୋଗାଯୋଗରେ ଥିଲେ । କିନ୍ତୁ ଯୁଦ୍ଧ ସମୟରେ ରବିଚନ୍ଦ୍ରନଙ୍କ ସହ ଯୋଗାଯୋଗ ହୋଇ ନପାରିବାରୁ ପରିବାର ଲୋକେ ଦୂତାବାସ ସହ ସମ୍ପର୍କ କରିଥିଲେ । ଆଉ ଦୂତାବାସ ଜରିଆରେ ପୁଅ ସୈନିକେଶଙ୍କ ବାବଦରେ ଜାଣିବାକୁ ପାଇଥିଲେ ପରିବାର ଲୋକେ । କିନ୍ତୁ ସେତେବେଳକୁ ଯଥେଷ୍ଟ ବିଳମ୍ବ ହୋଇ ସାରିଥିଲା । କାରଣ ସୈନିକେଶ ସେତେବେଳକୁ ୟୁକ୍ରେନ୍ ସେନାରେ ସାମିଲ ହୋଇ ସାରିଥିଲେ । ପରିବାର ଲୋକ ବୁଝାଇବା ସହ ଭାରତକୁ ଫେରି ଆସିବାକୁ କହିଥିଲେ ମଧ୍ୟ ଏଥିରେ ରାଜି ହୋଇନଥିଲେ ରବିଚନ୍ଦ୍ରନ ।

ଋଷ-ୟୁକ୍ରେନ ଯୁଦ୍ଧ ଦିନକୁ ଦିନ ବିଷମ ସ୍ଥିତି ଆଡକୁ ଗତି କରୁଛି । ଋଷର ପ୍ରଚଣ୍ଡ ଆକ୍ରମଣରେ ଋଷର ଅଧିକାଂଶ ସହରରେ ଏବେ କେବଳ ନିଆଁ ଜଳୁଥିବା ବେଳେ ୟୁକ୍ରେନ୍ ସେନା ମଧ୍ୟ ସାହସର ଲଢେଇ ଜାରି ରଖିଛି । ଅନେକ ୟୁରୋପୀୟ ଦେଶ ବିଭିନ୍ନ ଉପାୟରେ ୟୁକେନକୁ ସହାୟତା କରୁଥିବା ବେଳେ ବିଭିନ୍ନ ଦେଶର ଯୁବକ ମାନେ ମଧ୍ୟ ୟୁକ୍ରେନ ସେନାରେ ସାମିଲ ହେବାକୁ ଇଚ୍ଛା ପ୍ରକାଶ କରୁଛନ୍ତି । ଯାହାକୁ ଦୃଷ୍ଟିରେ ରଖି ୟୁକ୍ରେନ୍ ସେନା ଇଣ୍ଟରନ୍ୟାସନାଲ ଲିଜିଏନର ଘୋଷଣା କରିଛି । ଯେଉଁ ୟୁନିଟରେ ବିଦେଶରୁ ଆସୁଥିବା ଯୁବକ ମାନଙ୍କୁ ସାମିଲ କରାଯାଉଛି । ଏହାପୂର୍ବରୁ ୟୁକ୍ରେନର ପ୍ରତିରକ୍ଷଶ ମନ୍ତ୍ରାଳୟ ପକ୍ଷରୁ କୁହାଯାଇଥିଲା ଯେ, ଋଷ ବିରୋଧରେ ଯୁଦ୍ଧକୁ ଓହ୍ଲାଇବାକୁ ହଜାର ହଜାର ବିଦେଶୀ ନାଗରିକଙ୍କ ଆବେଦନ ମିଳୁଛି । ଯେଉଁମାନେ କେବଳ ଋଷ ସହ ଲଢେଇ କରିବାକୁ ନୁହେଁ ବରଂ ବିଶ୍ୱକୁ ରକ୍ଷା କରିବାକୁ ଚାହୁଁଛନ୍ତି । ୟୁକେନ୍ ସେନା ପକ୍ଷରୁ ଆରମ୍ଭ ହୋଇଥିବା ଏହି ନୂଆ ୟୁନିଟରେ ଏବେ ସୁଦ୍ଧା ଆମେରିକା, ବ୍ରିଟେନ, ସ୍ୱିଡେନ, ମେକ୍ସିକୋ ଓ ଭାରତ ଭଳି ଦେଶରୁ ଯୁବକ ସାମିଲ ହୋଇଛନ୍ତି ।