ଗାଡି ଚଳାଇବା ସମୟରେ ମୋବାଇଲରେ କଥା ହେବା ଅପରାଧ ନୁହେଁ ! ଯଦି ଦଣ୍ଡ ଦେବାକୁ ଚାହୁଁଛ ତେବେ ଆଇନ ବଦଳାଅ, ହାଇକୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ ।
ଗାଡି ଚଳାଇବା ସମୟରେ ମୋବାଇଲରେ କଥା ହେବା ଅପରାଧ ନୁହେଁ । ଏଭଳି ରାୟ ଦେଇଛନ୍ତି କେରଳ ହାଇକୋର୍ଟ । ଗାଡି ଚାଳନା ସମୟରେ ଯଦି ଆପଣ ମୋବାଇଲ ଫୋନରେ କଥା ହେଉଛନ୍ତି ତେବେ ଏହା ଅପରାଧ ନୁହେଁ କାରଣ ଏଥି ପାଇଁ କୌଣସି ଆଇନ ପ୍ରଣୟନ ହୋଇନାହିଁ । ଡିଭିଜନ ବେଞ୍ଚର ଜଷ୍ଟିସ ଏଏମ ଶଫିକ ଏବଂ ଜଷ୍ଟିସ ପି ସୋମରାଜନ ଏଭଳି ରାୟ ଦେଇଛନ୍ତି । କିନ୍ତୁ ହାଇକୋର୍ଟ ଏହା ସ୍ୱୀକାର କରିଛନ୍ତି ଯେ, ଗାଡି ଚଳାଇବା ସମୟରେ ମୋବାଇଲ ଫୋନ ବ୍ୟବହାର କଲେ ଜୀବନ ବିପଦରେ ପଡିପାରେ । କୋଚିରେ ରହୁଥିବା ଏମଜେ ସନ୍ତୋଷଙ୍କ ପକ୍ଷରୁ ଦାୟର କରାଯାଇଥିବା ଏକ ଜନହିତ ଯାଚିକା ଉପରେ ହାଇକୋର୍ଟ ଶୁଣାଣୀ କରିବା ସମୟରେ ଏଭଳି ରାୟ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ କାରୀ କୋର୍ଟରେ ଦର୍ଶାଇଥିଲେ ଯେ, ଗତ ବର୍ଷ ଯାଚିକାକର୍ତ୍ତା ସନ୍ତୋଷ ଏପ୍ରିଲ ୨୬ ତାରିଖ ସନ୍ଧ୍ୟାରେ ଗାଡି ଚଳାଇବା ସମୟରେ ମୋବାଇଲରେ ମଧ୍ୟ କଥା ହେଉଥିଲେ । ସେହି ସମୟରେ ତାଙ୍କୁ ଧରାଯାଇଥିଲା । ତେବେ ସିଙ୍ଗିଲ ବେଞ୍ଚ ଜଷ୍ଟିସ ସତିଶଚନ୍ଦ୍ରନ କହିଥିଲେ ଯେ, ଗାଡି ଚଳାଇବା ସମୟରେ ମୋବାଇଲ ଫୋନରେ କଥା ହେବା କେରଳ ପୋଲିସର ଧାରା ୧୮୪ ଏବଂ ମୋଟର ବାହାନ ଅଧିନିୟମର ଧାରା ୧୧୮(ଇ) ଅନୁଯାୟୀ ଅପରାଧ ଅଟେ । କିନ୍ତୁ କୋର୍ଟ ବିନା କୌଣସି ଜୋରିମାନରେ ଏହି ମାମଲାକୁ ସମାଧାନ କରିଦେଇଥିଲେ ।
କୋର୍ଟ ପୋଲିସକୁ କହିଛି ଯେ, ସେମାନେ ସେତେବେଳେ କାର୍ଯ୍ୟାନୁଷ୍ଠାନ ନେଇପାରିବେ, ଯେତେବେଳେ କୌଣସି ବ୍ୟକ୍ତି ଗାଡି ଚଳାଇବା ସମୟରେ ମୋବାଇଲରେ କଥା ହେବା ଫଳରେ ଅନ୍ୟ ପ୍ରତି ବିପଦ ସୃଷ୍ଟି କରୁଥିବ । ତେବେ ସୂଚନା ଅନୁଯାୟୀ, ଗାଡି ଚାଳକ ମାନଙ୍କୁ ଫୋନରେ କଥା ହେବାରୁ ରୋକିବା ପାଇଁ ଏପର୍ଯ୍ୟନ୍ତ କୌଣସି ଆଇନ ପ୍ରଣୟନ କରାଯାଇନାହିଁ । କୋର୍ଟ କହିଛନ୍ତି ଯେ, ଏପରି ଘଟଣାକୁ ନେଇ ଯଦି କୌଣସି ମାମଲା ଦାୟର କରିବାକୁ ହୁଏ ତେବେ ସେଥି ପାଇଁ ପ୍ରଥମେ ବିଧାନସଭା ଦ୍ୱାରା ବର୍ତ୍ତମାନ ଆଇନ ବ୍ୟବସ୍ଥାରେ ସଂଶୋଧନ କରିବାକୁ ପଡିବ ।