କନକ ବ୍ୟୁରୋ : ଆଫଗାନିସ୍ତାନ ଦଖଲ କରିବା ପରେ ଏବେ ତାଲିବାନ ତା’ର ଅସଲ ରୂପ ଦେଖାଇବାରେ ଲାଗିଛି । ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ମୁତାବକ ତାଲିବାନ ଯୋଦ୍ଧାମାନେ କାନ୍ଦାହାର ଓ ହେରାତରେ ବନ୍ଦ ପଡିଥିବା ଭାରତୀୟ ଦୂତାବାସର ତାଲା ଭାଙ୍ଗି ଭିତରକୁ ପଶିଥିଲେ । ସେଠାରେ ସେମାନେ ଦପ୍ତରରେ ଥିବା କାଗଜ ପତ୍ର ଯାଂଚ କରିବା ସହ କିଛି କାଗଜପତ୍ର ଧରି ବାହାରକୁ ଆସିଥିଲେ । ଦପ୍ତର ଆଗରେ ଥିବା କିଛି କାରକୁ ବି ସେମାନେ ନେଇଯାଇଥିବା ଜଣାପଡିଛି । ଏହାକୁ ନେଇ ଭାରତୀୟ ଅଧିକାରୀ କହିଛନ୍ତି କି ତାଲିବାନ ଯେଉଁ ପ୍ରତିଜ୍ଞା କରିଥିଲା ଏବେ ତାହାର ବିପରିତ ଦିଗରେ କାମ କରୁଛି । ସେ ବିଶ୍ୱର କୌଣସି କ୍ଷତି କରିବ ନାହିଁ ବୋଲି ଆଶ୍ୱସନା ଦେଇ ଏବେ ଭାରତୀୟ ଦୂତାବାସରେ ପଶି ଗାଡି ନେଇଯିବା ଘଟଣା ଭାରତକୁ ବ୍ୟଥିତ କରିଛି ।
ଅନ୍ୟପଟେ ହକ୍କାନୀ ନେଟୱର୍କ କେଡର ବହୁ ସଂଖ୍ୟାରେ କାବୁଲରେ ଥାଇ ପୁରା ଅପରେଶନକୁ ନିୟନ୍ତ୍ରିତ କରିବାରେ ଲାଗିଛି । ସ୍ୱର୍ଗତଃ ମୁଲ୍ଲା ଓମରଙ୍କ ପୁଅ ଓ ତାଲିବାନ ସୈନ୍ୟ ଆୟୋଗର ପ୍ରମୁଖ ମୁଲ୍ଲା ୟାକୁବ ନେତୃତ୍ୱରେ ତାଲିବାନୀମାନେ ପସ୍ତୁନୋଙ୍କ ପାରମ୍ପାରିକ ଆସନ କାନ୍ଦାହାରରୁ କ୍ଷମତା ହାସଲ କରି ସରକାର ଗଠନ କରିବାକୁ ଚେଷ୍ଟା କରୁଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ତାଲିବାନର ବରିଷ୍ଠ ନେତା ମହମ୍ମଦ ଆବାସ ଭାରତୀୟ ପକ୍ଷଙ୍କ ନିକଟରେ ପହଂଚି ଦୂତାବାସ ବନ୍ଦ ନକରିବାକୁ ଅନୁରୋଧ କରିଥିଲା । ତାଲିବାନୀ ମାନଙ୍କ ପକ୍ଷରୁ ଭାରତୀୟଙ୍କ ଉପରେ କୌଣସି ବିପଦ ନଥିବା କଥା ସେ କହିଥିଲେ । ହେଲେ ଗୁରୁବାର ଦିନ ତାଲିବାନୀମାନେ ଆଫଗାନିସ୍ତାନ ଓ ଭାରତ ମଧ୍ୟରେ ବାଣିଜ୍ୟିକ ସଂପର୍କ ଛିନ୍ନ କରିବା ପରେ ତାଲିବାନୀ ମାନଙ୍କ ଆଶ୍ୱାସନା ପାଣିର ଗାର ଭଳି ଲିଭି ଯାଇଛି ।