ସାମ୍ବାଦିକଙ୍କ ଉପରେ ତାଲିବାନର ବର୍ବରତା: ଗଣମାଧ୍ୟମ ପ୍ରତିନିଧିଙ୍କୁ ମାଡ ମାରି ଲହୁଲୁହାଣ କରିଥିବା ଫଟୋ ଭାଇରାଲ
ପ୍ରଦର୍ଶନରେ ସାମିଲ ପୁରୁଷଙ୍କ ସମେତ ମହିଳାଙ୍କୁ ମାଡ ମାରୁଛନ୍ତି ତାଲିବାନ ଆତଙ୍କୀ
କନକ ବ୍ୟୁରୋ : ଆଫଗାନିସ୍ତାନରେ ତାଲିବାନ ସରକାର ଗଠନ ନେଇ ଘୋଷଣା କରିବା ପରେ ଲୋକଙ୍କ ଚିନ୍ତା ବଢିବାରେ ଲାଗିଛି । କିଛି ଦିନ ହେବ କାବୁଲ ସମେତ ଅନେକ ସହରରେ ତାଲିବାନ ସରକାର ବିରୋଧରେ ପ୍ରଦର୍ଶନ ଦେଖିବାକୁ ମିଳିଛି । ଏହାରି ଭିତରେ ସାମ୍ନାକୁ ଆସିଛି ତାଲିବାନୀ ଆତଙ୍କବାଦୀଙ୍କ ବର୍ବରତା । ଗଣମାଧ୍ୟମ ପ୍ରତିନିଧିଙ୍କୁ ମାଡ ମାରି ଲହୁଲୁହାଣ କରିଥିବାର ଫଟୋ ଏବେ ଭାଇରାଲ ହେବାରେ ଲାଗିଛି । ଆନ୍ଦୋଳନ ସ୍ଥଳକୁ ଯାଇଥିବା ଏହି ସାମ୍ବାଦିକଙ୍କୁ ମାଡ ମାରି ଲହୁଲୁହାଣ କରିଛନ୍ତି ତାଲିବାନୀ ଆତଙ୍କବାଦୀ । କେବଳ ସାମ୍ବାଦିକ ନୁହଁନ୍ତି, ପ୍ରଦର୍ଶନ କରୁଥିବା ପୁରୁଷଙ୍କ ସମେତ ମହିଳାଙ୍କୁ ମଧ୍ୟ ମାଡ ମାରୁଛନ୍ତି ତାଲିବାନୀ । ଯାହାକୁ ସୋସିଆଲ ମଡିଆରେ ନିନ୍ଦା କରାଯାଉଛି । ଦୁଇ ଦିନ ହେବ ଆଫଗାନିସ୍ତାନରେ ପ୍ରଦର୍ଶନ ଦେଖିବାକୁ ମିଳୁଛି । ଯେଉଁଥିରେ ପୁରୁଷଙ୍କ ସମେତ ମହିଳାମାନେ ମଧ୍ୟ ସାମିଲ ହେଉଛନ୍ତି । ଆଉ ଆନ୍ଦୋଳନ କରୁଥିବା ମହିଳାଙ୍କୁ ମାଡ ମାରୁଛନ୍ତି ତାଲିବାନୀ ଆତଙ୍କବାଦୀ ।
Kanak News is now on WhatsApp
Join and get latest news updates delivered to you via WhatsApp
ସେପଟେ, ଆଫଗାନିସ୍ତାନରେ ନୂଆ ସରକାର ଗଠନ ନେଇ ତାଲିବାନ ଘୋଷଣା କରିବା ପରେ ସରକାର ବିରୋଧରେ ବିରୋଧ ପ୍ରଦର୍ଶନ ବଢିବାରେ ଲାଗିଛି । ଏହାକୁ ନଜରରେ ରଖି ତାଲିବାନ ସରକାରର ଗୃହ ମନ୍ତ୍ରଣାଳୟ ବିରୋଧ ପ୍ରଦର୍ଶନକୁ ନେଇ ନୂଆ ନିୟମ ଜାରି କରିଛି । ବର୍ତମାନ ତାଲିବାନ ସରକାର ଆଫଗାନିସ୍ତାନରେ କୌଣସି ପ୍ରଦର୍ଶନ ଉପରେ ପ୍ରତିବନ୍ଧକ ଲଗାଇଛନ୍ତି । ବିନା ଅନୁମତିରେ ସେଠାରେ ଏବେ ପ୍ରଦର୍ଶନ କରାଯାଇପାରିବନାହିଁ । ପ୍ରଦର୍ଶନର ୨୪ଘଂଟା ପୂର୍ବରୁ ଅନୁମତି ନେବାକୁ ପଡିବ । ନୂଆ ନିୟମ ଅନୁସାରେ, ବିରୋଧ ପ୍ରଦର୍ଶନ ପାଇଁ ଆଇନ ମନ୍ତ୍ରଣାଳୟର ଅନୁମତି ନେବାକୁ ପଡିବ । ବିରୋଧ ପ୍ରଦର୍ଶନ ବେଳେ କେଉଁ ନାରା ଦିଆଯିବ, ସ୍ଥାନ, ସମୟ ଓ ଲକ୍ଷ୍ୟ ସମ୍ପର୍କରେ ପ୍ରଶାସନକୁ ଜଣାଇବାକୁ ହେବ । ଏହା ନ କଲେ ଉଲ୍ଲଙ୍ଘନକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି ତାଲିବାନ ସରକାର ଧମକ ଦେଇଛନ୍ତି ।