ପଞ୍ଜଶୀର କବଜା ପାଇଁ ଜୋର ଲଗାଉଛି ତାଲିବାନ । ଅତର୍କିତ କଲା ଆକ୍ରମଣ, ବିସ୍ଫୋରଣରେ ଉଡାଇଲା ପୋଲ ।
କନକ ବ୍ୟୁରୋ : ଆଫଗାନିସ୍ତାନକୁ କବଜା କରିବା ପରେ ସରକାର ଗଠନ ପାଇଁ ଜୋରଦାର ଉଦ୍ୟମ ଚଳାଇଛି ତାଲିବାନ । ଏପରିକି ଆଫଗାନିସ୍ତାନରେ ଶାନ୍ତିର ସହ ସରକାର ଗଠନ ପାଇଁ ପକ୍ରିୟା ଜାରି ରହିଥିବା ନେଇ ତାଲିବାନ ବିଶ୍ୱ ସମୁଦାୟକୁ ବାର୍ତ୍ତା ଦେଉଛି । କିନ୍ତୁ ଅନ୍ୟପଟେ ଦେଶ ଭିତରେ ତାଲିବାନ ତାର ଉଗ୍ର ଓ ଅସଲ ରୂପ ଦେଖାଇବାରେ ଆଦୌ ପଛଘୁଞ୍ଚା ଦେଉନାହିଁ । ଆଫଗାନିସ୍ତାନରୁ ଆମେରିକା ସେନା ବିଦାୟ ନେବା ପରେ ଏବେ ତାଲିବାନ ନଜରରେ ରହିଛି ପଞ୍ଜଶୀର । ଏପରିକି ପଞ୍ଜଶୀର ଘାଟି ଉପରେ ବାରମ୍ବାର ଆକ୍ରମଣ ଉଦ୍ୟମ କରୁଛି ତାଲିବାନ ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ମଙ୍ଗଳବାର ରାତିରେ ପଞ୍ଜଶୀର ଘାଟିରେ ପୁଣିଥରେ ଆକ୍ରମଣ ଉଦ୍ୟମ କରି ଫେଲ ମାରିଛି ତାଲିବାନ । ପଞ୍ଜଶୀର ଘାଟିକୁ ପ୍ରବେଶ ପାଇଁ ତାଲିବାନ ଯୁବକ ଉଦ୍ୟମ କରୁଥିବା ବେଳେ ନଦର୍ଣ୍ଣ ଆଲାଏନ୍ସ ସହ ମୁହାଁମୁହିଁ ହୋଇଛି । ତେବେ ତାଲିବାନ ପଞ୍ଜଶୀର ଘାଟିରେ ଏକ ପୋଲକୁ ବିସ୍ଫୋରଣ କରି ଉଡାଇ ଦେଇଥିବା ବେଳେ କିଛି ତାଲିବାନୀ ଯୁବକ ନଦର୍ଣ୍ଣ ଆଲାଏନ୍ସର ସେନା ହାତରେ ଧରାପଡିଛନ୍ତି ।
ଏହାପୂର୍ବରୁ ସୋମବାର ମଧ୍ୟ ପଞ୍ଜଶୀର ଘାଟିକୁ ପ୍ରବେଶ ଉଦ୍ୟମ କରିବା ସହ ନଦର୍ଣ୍ଣ ଆଲାଏନ୍ସ ଉପରେ ଅତର୍କିତ ଆକ୍ରମଣ କରିଥିଲା ତାଲିବାନ । ତେବେ ପୂର୍ବରୁ ସଜାଗ ଥିବା ନଦର୍ଣ୍ଣ ଆଲାଏନ୍ସର ସେନା ଏହାର ପ୍ରତିଜବାବ ଦେଇଥିଲେ । ଯେଉଁଥିରେ ୭ରୁ ୮ ଜଣ ତାଲିବାନୀଙ୍କର ମୃତ୍ୟୁ ହୋଇଥିବା ସୂଚନା ମିଳିଥିଲା । ଏହାପୂର୍ବରୁ ପଞ୍ଜଶୀର ଘାଟିରୁ ଇଣ୍ଟରନେଟ ସଂଯୋଗ କାଟିଦେଇଥିଲା ତାଲିବାନ ।
ପଞ୍ଜଶୀର ଘାଟି ଏବେ ମଧ୍ୟ ତାଲିବାନ ଠାରୁ ମୁକ୍ତ ରହିଛି । ଅନେକ ପ୍ରଚେଷ୍ଟା ପରେ ମଧ୍ୟ ତାଲିବାନ ପଞ୍ଜଶୀର ଘାଟି ମଧ୍ୟରେ ନିଜର ଦବଦବା ଜାହିର କରିପାରୁନି । କାରଣ ପଞ୍ଜଶୀର ଘାଟିରେ ଅହମ୍ମଦ ମସୁଦଙ୍କ ନେତୃତ୍ୱାଧୀନ ନଦର୍ଣ୍ଣ ଆଲାଏନ୍ସ ତାଲିବାନ ଶାସନକୁ ବିରୋଧ କରିବା ସହ ଲଢେଇ ପାଇଁ ପ୍ରସ୍ତୁତ ହୋଇ ରହିଛି ।