ଗରିବ ପରିବାରକୁ ମିଳୁନି ସରକାରୀ ଆବସ । ଅନୁଗୁଳର ଅର୍ଚ୍ଚନା ସାହୁ କହିଲେ, ଘର ପାଇଁ ପଇସା ନଥିଲେ, କିଡନୀ ପଛେ ନିଅ ଘରଟିଏ ଦିଅ

କନକ ବ୍ୟୁରୋ : କିଡନୀ ନିଅନ୍ତୁ, ବଦଳରେ ଘର ଖଣ୍ଡିଏ ଦିଅନ୍ତୁ ସରକାର । ଘର ଖଣ୍ଡିଏ ପାଇଁ ବାରମ୍ବାର ଦାବି କରି ନିରାସ ହେବା ପରେ କ୍ଷୁବ୍ଧର ସହ ସରକାରଙ୍କୁ ଏଭଳି କହିଛନ୍ତି ଅନୁଗୋଳ ଜିଲ୍ଲା ଚମ୍ପତିମୁଣ୍ଡାର ଅର୍ଚ୍ଚନା ସାହୁ । ବର୍ଷାରେ ଘର ସମ୍ପୂର୍ଣ୍ଣ ଭାଙ୍ଗିଯିବା ପରେ କ୍ଲବ ଘରେ ଆଶ୍ରୟ ନେଉଛନ୍ତି ଅର୍ଚ୍ଚନାଙ୍କ ଅସହାୟ ପରିବାର ।

ଗାଁ ଗାଁ ବୁଲି ଚୁଡି ବେପାର କରୁଥିବା ଅର୍ଚ୍ଚନା ବହୁ ଦୁଃଖ କଷ୍ଟରେ ପରିବାର ପାଇଁ ଆଜବେଷ୍ଟ ଘର ଖଣ୍ଡିଏ କରିଥିଲେ । ୨୦୧୯ରେ ବର୍ଷା ପବନରେ ଘରଟି ଭାଙ୍ଗି ଯାଇଛି । ସେତେବେଳେ ପଲିଥିନ ଖଣ୍ଡିଏ ଦେଇ କାମ ସାରିଦେଇଥିବା ସ୍ଥାନୀୟ ପ୍ରଶାସନ ଏହି ପରିବାରକୁ ସରକାରୀ ଯୋଜନାରେ ଘରଟିଏ ଯୋଗାଇ ଦେଇନାହାନ୍ତି । ଫଳରେ ବର୍ତମାନ ବିପଦସଂକୁଳ ଅବସ୍ଥାରେ କ୍ଲବ ଘରେ ସ୍ତ୍ରୀ ସୁଭାଗିନି ଓ ୧୦ ବର୍ଷର ପୁଅକୁ ନେଇ ଆଶ୍ରୟ ନେଇଛନ୍ତି ଅର୍ଚ୍ଚନା ।

ଯଦି ଘରଟିଏ ଦେବା ପାଇଁ ସରକାରଙ୍କ ପାଖରେ ଟଙ୍କା ନାହିଁ ତେବେ କିଡନୀ ଗୋଟିଏ ନିଅନ୍ତୁ କିନ୍ତୁ ଘରଟିଏ ଦିଅନ୍ତୁ । ଘର ଖଣ୍ଡିଏ ପାଇଁ ବାରମ୍ବାର ଦାବି କରି ନିରାସ ହେବା ପରେ ଦୁଃଖର ସହ ସରକାରଙ୍କୁ ଏଭଳି ନିବେଦନ କରିଛନ୍ତି ଅର୍ଚ୍ଚନା ସାହୁ । ସେପଟେ ଆଗାମୀ ଦିନରେ ତାଙ୍କୁ ଆବାସ ହିତାଧିକାରୀ ତାଲିକାରେ ସାମିଲ କରିବା ପାଇଁ ପଦକ୍ଷେପ ନିଆଯିବ ବୋଲି ଅନୁଗୁଳ ବିଡିଓ ଅରବିନ୍ଦ ବେହେରା କହିଛନ୍ତି ।