ପର୍ବକୁ ପଛ କରି ରାସ୍ତାରେ ସାଇକେଲ ଗଡ଼ାଉଛନ୍ତି ସ୍ୱିଗି ବୟ। ହୋଲି ପାଇଁ କାମ ବନ୍ଦ କଲେ ଉପାସ ରହିବ ପେଟ।

କନକ ବ୍ୟୁରୋ: ହୋଲିର ଉତ୍ସାହ ନାହିଁ କି’ ରଙ୍ଗ ଖେଳୁ ନାହାଁନ୍ତି ବୋଲି ଦୁଃଖ ନାହିଁ । ପିଠିରେ ଖାଦ୍ୟ ବ୍ୟାଗ ଧରି ସାଇକେଲରେ ଆଗକୁ ବଢୁଛନ୍ତି ସଞ୍ଜୟ । ଯିବାକୁ ହେବ ଭୁବନେଶ୍ୱର ୟୁନିଟ-୪ରୁ ନୟାପଲ୍ଲୀ । ଠିକ୍ ସମୟରେ ଫୁଡ୍ ଡେଲିଭରି ନକଲେ ଅସୁବିଧା । ଫୁଡ୍ ଡେଲିଭରି ବୟ ସଞ୍ଜୟ ଭୋଇ, ଗ୍ରାଜୁଏସନ୍ କରୁଛନ୍ତି । ନିଜ ଅର୍ଥରେ ନିଜେ ପାଠ ପଢ଼ିବା ଏବଂ ସ୍ୱାବଲମ୍ବୀ ହେବାର ଲକ୍ଷ୍ୟ, ତାଙ୍କୁ ଦିନରେ ଲୁଗା ଦୋକାନରେ ସେଲ୍ସ ବୟ ଏବଂ ସଞ୍ଜରେ ଫୁଡ୍ ଡେଲିଭରି ବୟ ସଜାଇଦିଏ । ହୋଲିରେ ଲୁଗା ଦୋକାନ ବନ୍ଦ ଥିବାରୁ ଆଜି ସେ ଫୁଲଟାଇମ୍୍ ଡେଲିଭରି ବୟ । ଗୋଟିଏ ହୋଟେଲରୁ ଆଉ ଗୋଟିଏ ହୋଟେଲ । ଗ୍ରାହକଙ୍କ ପସନ୍ଦ ଅନୁସାରେ ଖାଦ୍ୟ ଧରି ପହଞ୍ଚିଯାଉଛନ୍ତି । ସଞ୍ଜୟଙ୍କ ଭଳି ଅନେକ ଫୁଡ ଡେଲିଭରି ବୟଙ୍କ ସମାନ ଲକ୍ଷ୍ୟ । ଦି ପଇସା ଅଧିକ ରୋଜଗାର କରିବା ପାଇଁ ଏମାନେ ହୋଲିକୁ ଭୁଲିଯାଇଛନ୍ତି ।

ହୋଲିର ଚିତ୍ର ସାଉଁଟୁ ସାଉଁଟୁ ଭୁବନେଶ୍ୱର କ୍ୟାପିଟଲ ହସ୍ପିଟାଲ ଅଞ୍ଚଳରେ ଛିଡା ହୋଇଥିବା ୧୦୮ ଆମ୍ବୁଲାନ୍ସ ଉପରେ ପଡିଥିଲା ଆମ କ୍ୟାମେରା ଟିମର ନଜର । ସବୁଦିନ ଭଳି ଆଜି ବି ୧୦୮ ଆମ୍ବୁଲାନ୍ସର କର୍ମଚାରୀମାନେ ବ୍ୟସ୍ତ ଥିଲେ । ହୋଲିରେ ଅନେକ ଅଘଟଣ ଘଟିଥିବାରୁ ୧୦୮ ଆମ୍ବୁଲାନ୍ସର କର୍ମଚାରୀଙ୍କୁ ଟିକେ ବି ଫୁରସତ ନଥିଲା । ସମାନ ଅବସ୍ଥା ଥିଲା ଡାକ୍ତରଖାନାରେ କାର୍ୟରତ ଥିବା ନର୍ସମାନଙ୍କର । ରୋଗୀ ସେବାରେ ହିଁ ବିତିଥିଲା ହୋଲି ଉତ୍ସବ । ରଙ୍ଗ ବୋଳିବାକୁ ବି ନଥିଲା ସମୟ ।

କାର୍ଯ୍ୟରତ ପୋଲିସ ହୁଅନ୍ତୁ ବା ଡାକ୍ତରଖାନାରେ ନିୟୋଜିତ ଥିବା ଡାକ୍ତର ଓ ଅନ୍ୟ କର୍ମଚାରୀ । ସଭିଏଁ ହୋଲିକୁ ଭୁଲି ନିଜ କର୍ତବ୍ୟରେ ବ୍ୟସ୍ତ । ଜରୁରୀକାଳୀନ ସେବାରେ ନିୟୋଜିତ ଥିବା ଏହି କର୍ମଚାରୀମାନେ ଅନ୍ୟର ସେବା ପାଇଁ ନିଜର ଖୁସିକୁ ଭୁଲିଯାଇଛନ୍ତି ।