ସାମ୍ବାଦିକତାରୁ ରାଜନୀତି । ଶଙ୍ଖ ଧରିଲେ ସ୍ୱୟଂପ୍ରକାଶ ମହାପାତ୍ର । ବିଜେଡିରେ ଯୋଗଦେଲେ ଓଡ଼ିଶା ଗଣମାଧ୍ୟମ ଜଗତର ଚର୍ଚ୍ଚିତ ଚେହେରା ।
କନକ ବ୍ୟୁରୋ : ଶଙ୍ଖ ଧରିଲେ ସ୍ୱୟଂପ୍ରକାଶ । ବିଜେଡିରେ ଯୋଗ ଦେଲେ ଓଡ଼ିଶା ଗଣମାଧ୍ୟମ ଜଗତର ଲୋକପ୍ରିୟ ଓ ଚର୍ଚ୍ଚିତ ଚେହେରା ସ୍ୱୟଂ ପ୍ରକାଶ ମହାପାତ୍ର । ବିଜେଡ଼ି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏବଂ ଦଳର ସାଧାରଣ ସମ୍ପାଦକ (ଗଣମାଧ୍ୟମ ବ୍ୟାପାର) ମାନସ ରଞ୍ଜନ ମଙ୍ଗରାଜଙ୍କ ଉପସ୍ଥିତିରେ ବିଧିବଦ୍ଧ ଭାବରେ ଦଳରେ ସାମିଲ ହୋଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ୱଚ୍ଛ ଶାସନ ଓ ଆଦର୍ଶରେ ଅନୁପ୍ରାଣିତ ହୋଇ ସେ ବିଜେଡିରେ ଯୋଗ ଦେଇଛନ୍ତି । ଦଳ ତାଙ୍କୁ ଯେଉଁ ଦାୟିତ୍ୱ ଦେବ ତାହା ସେ ନିର୍ବାହ କରିବେ ବୋଲି କହିଛନ୍ତି ସ୍ୱୟଂପ୍ରକାଶ ।
Kanak News is now on WhatsApp
Join and get latest news updates delivered to you via WhatsApp
ତେବେ ୧୦ ବର୍ଷରୁ ଅଧିକ ସମୟ ଧରି ସାମ୍ବାଦିକ ଭାବେ କାର୍ଯ୍ୟ କରିଥିବା ସ୍ୱୟଂପ୍ରକାଶ ଓଡ଼ିଶାର ଘରେ ଘରେ ପରିଚିତ । ଜଣେ ଲୋକପ୍ରିୟ ଟିଭି ଉପସ୍ଥାପକ ଭାବେ ପରିଚିତି ହାସଲ କରିଥିବା ସ୍ୱୟଂପ୍ରକାଶ ଅନେକ ସମୟରେ ଲୋକଙ୍କ ସ୍ୱାର୍ଥ ସହ ଜଡିତ ପ୍ରସଙ୍ଗ ଗଣମାଧ୍ୟମରେ ଉଠାଇଛନ୍ତି । ପ୍ରଥମେ ଏକ ଘରୋଇ ନ୍ୟୁଜ୍ ଚ୍ୟାନେଲରେ ସାମ୍ବାଦିକତା କ୍ୟାରିୟର ଆରମ୍ଭ କରିଥିବା ସ୍ୱୟଂପ୍ରକାଶ ପରବର୍ତ୍ତୀ ସମୟରେ କନକ ନ୍ୟୁଜରେ କାମ କରିଛନ୍ତି ।
ଦୀର୍ଘ ୭ ବର୍ଷ ହେବ କନକ ନ୍ୟୁଜରେ କାମ କରିବା ଭିତରେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଥିଲେ ସ୍ୱୟଂପ୍ରକାଶ । ଖାସକରି ବିଗ୍ ଡିବେଟ ମାଧ୍ୟମରେ ବଡ ବଡ ପ୍ରସଙ୍ଗ ଉଠାଇବା ହେଉ କିମ୍ବା ନିର୍ବାଚନ ସମୟରେ ହେଉଥିବା ଉଚ୍ଚକୋଟୀର ବିତର୍କକୁ ବେଶ ନିପୁଣତାର ସହ ପରିଚାଳନା କରିବାରେ ବେଶ ସିଦ୍ଧହସ୍ତ ଥିଲେ ସ୍ୱୟଂପ୍ରକାଶ ।