କନକ ବ୍ୟୁରୋ : ଉତ୍ତରପ୍ରଦେଶ ରାଜନୀତିରେ ଆଜି ବଡ ଧରଣର ଓଲଟପାଲଟ ଦେଖିବାକୁ ମିଳିଛି । ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ନାମାଙ୍କନପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଏବେ ଦଳବଦଳ ରାଜନୀତି ଆରମ୍ଭ ହୋଇଛି । ବିଧାନସଭା ନିର୍ବାଚନ ପୂର୍ବରୁ ଯୋଗୀ ସରକାର ଓ ବିଜେପିକୁ ବାଏ ବାଏ କରିଥିବା ସ୍ୱାମୀ ପ୍ରସାଦ ମୌର୍ଯ୍ୟ ଆଜି ଅଖିଳେଶଙ୍କ ସାଇକେଲରେ ବସିଛନ୍ତି । ସମାଜବାଦୀ ପାର୍ଟିରେ ଯୋଗ ଦେଇଛନ୍ତି ସ୍ୱାମୀ ପ୍ରସାଦ ମୌର୍ଯ୍ୟଙ୍କ ଭଳି ଟାଣୁଆ ନେତା । ସ୍ୱାମୀଙ୍କ ବ୍ୟତୀତ ଯୋଗୀ ସରକାରରେ ମନ୍ତ୍ରୀ ଥିବା ଧର୍ମ ସିଂ ସୈନୀ ଓ ୬ ବିଧାୟକ ଆଜି ସମାଜବାଦୀ ପାର୍ଟିରେ ସାମିଲ ହୋଇଛନ୍ତି ।

Advertisment

ସମାଜବାଦୀ ପାର୍ଟିରେ ସାମିଲ ହେବା ସହ ସ୍ୱାମୀ ପ୍ରସାଦ ବିଜେପି ଉପରେ ବର୍ଷିଛନ୍ତି । ସ୍ୱାମୀ କହିଛନ୍ତି, ମୁଁ ଭାବିଥିଲି ଏତେଦିନ ଧରି ବନବାସରେ ରହିବା ପରେ ବିଜେପି ଭଲ କାମ କରିବ । କିନ୍ତୁ ଏଭଳି କିଛି ହୋଇନଥିଲା । ତେବେ ଆଜି ପରଠାରୁ ଏଭଳି ଏକ ଝଡ ଆସିବ ଯାହା ବିଜେପିକୁ ଉଡାଇନେବ । ଏହାଛଡା ମୁଁ ଯାହା ହାତ ଛାଡିଦିଏ ପରବର୍ତ୍ତୀ ସମୟରେ ତାଙ୍କର କୌଣସି ଅସ୍ତିତ୍ୱ ରହେ ନାହିଁ । ଆଉ ମାୟାବତୀ ଏହାର ସବୁଠୁ ବଡ ଉଦାହରଣ । ମାୟାବତୀ କାଂଶୀରାମଙ୍କ ନାରା ବଦଳାଇଥିଲେ, ସେତେବେଳେ ମୁଁ ତାଙ୍କର ବିରୋଧ କରିଥିଲି । କିନ୍ତୁ ସେତେବେଳେ ସେ ମୋ କଥା ମାନିନଥିଲେ, ଆଉ ଆଜି ସ୍ଥିତି ଦେଖନ୍ତୁ । ଅଖିଳେଶ ଯାଦବ ଜଣେ ପାଠୁଆ ଯୁବକ । ଉତ୍ତରପ୍ରଦେଶର ଲକ୍ଷାଧିକ ଲୋକ ଅଖିଳେଶଙ୍କ ସହ ରହିଛନ୍ତି । ଆଉ ଅଖିଳେଶଙ୍କ ସାଥୀରେ ଆମେ ବିଜେପିକୁ କ୍ଷମତାରୁ ବିତାଡିତ କରିବୁ ।

ସ୍ୱାମୀ ପ୍ରସାଦ ମୌର୍ଯ୍ୟ ସମାଜବାଦୀ ପାର୍ଟିରେ ସାମିଲ ହେବା ପରେ ଅଖିଳେଶ ଯାଦବ କହିଛନ୍ତି, କେବଳ ନିର୍ବାଚନକୁ ଅପେକ୍ଷା ଥିଲା । ଏବେ ସାଇକେଲର ହ୍ୟାଣ୍ଡେଲ ପୂରା ଠିକ୍, ଦୁଇ ଚକା ମଧ୍ୟ ଠିକ୍, ପେଡାଲ ମାରିବାକୁ ମଧ୍ୟ ଅନେକ ସାଥୀ ଆସିଗଲେଣି । ତେଣୁ ଏବେ ସାଇକେଲର ଗତିକୁ କେହି ଅଟକାଇ ପାରିବେ ନାହିଁ । ସମାଜବାଦୀ ପାର୍ଟିର ମୁଖ୍ୟାଳୟରେ ହୋଇଥିବା ଭର୍ଚୁଆଲ କାର୍ଯ୍ୟକ୍ରମରେ ଏହି ମିଶ୍ରଣ ପର୍ବ ହୋଇଥିଲା । ତେବେ ସମାଜବାଦୀ ପାର୍ଟି କାର୍ଯ୍ୟାଳୟରେ ପ୍ରବଳ ଭିଡ କାରଣରୁ ଲକ୍ଷ୍ ନୌ ଜିଲ୍ଲାପାଳ ଏହାର ଯାଞ୍ଚ ନିର୍ଦ୍ଦେଶ ଦେଇଛନ୍ତି । କାରଣ କରୋନା ଗାଇଡଲାଇନ ଅନୁଯାୟୀ ୧୫ ଜାନୁଆରୀ ମଧ୍ୟରେ କୌଣସି ନେତା ବଡ ରାଲି କିମ୍ବା ସମାବେଶ କରିପାରିବେ ନାହିଁ । ତେଣୁ ଏହି ମିଶ୍ରଣ ପର୍ବ ଅଖିଳେଶଙ୍କ ଚିନ୍ତା ବଢାଇପାରେ ବୋଲି କୁହାଯାଉଛି ।