ଦୁର୍ନୀତିର ମହାକୁମ୍ଭ ଯୋଗାଣ ବିଭାଗ ! ମରିଗଲେଣି ହେଲେ ସରକାରଙ୍କ ଯୋଜନା ଫାଇଦା ନେଉଛନ୍ତି, ଧରାପଡିଲେ ୩୬ ହଜାରରୁ ଅଧିକ ଭୂତ

କନକ ବ୍ୟୁରୋ : ଯାଜପୁର ଜିଲ୍ଲା ଯୋଗାଣ ବିଭାଗ ଦୁର୍ନୀତି ମହାକୁମ୍ଭ ପାଲଟିଛି। ଚାଷୀଙ୍କ ଧାନ କିଣାବିକା କାରବାରରେ କୋଟି କୋଟି ଟଙ୍କା ଦୁର୍ନୀତି ଧରାପଡ଼ିଥିଲା ବେଳେ ଏବେ ଖାଦ୍ୟ ସୁରକ୍ଷା ଆଇନ୍ ଲାଗୁ ପରେ ରାସନ ସାମଗ୍ରୀରେ ୧୫ କୋଟି ୩୦ ଲକ୍ଷରୁ ଅଧିକ ଟଙ୍କା ଘୋଟାଲା ପଦାକୁ ଆସିଛି। ଆଧାର କାର୍ଡ ଲିଙ୍କ ହେବା ଫଳରେ ଜିଲ୍ଲାରେ ୩୬ ହଜାର ୪୪୨ଭୂତ ରାସନ ସାମଗ୍ରୀ ଖାଉଥିଲେ ବୋଲି ଧରାପଡିଛି। ଏହି ସଂଖ୍ୟା ବଢିବ ବୋଲି ଅଧିକାରୀ ମଧ୍ୟ ସ୍ବୀକାର କରିଛନ୍ତି।

ସୂଚନା ଯୋଗ୍ୟ ଯାଜପୁର ଜିଲ୍ଲାର ୧୦ଟି ବ୍ଲକ୍ ଓ ୨ଟି ପୌରାଞ୍ଚଳର ମୋଟ ୩ ଲକ୍ଷ ୬୦ ହଜାର ୧୯୭ କାର୍ଡରେ ୧୪ ଲକ୍ଷ ୩୭ ହଜାର ୧୨୭ ଜଣ ହିତାଧିକାରୀ ରାସନ ସାମଗ୍ରୀ ଚାଉଳ, ଗହମ ଓ କିରାସିନି ନେଉଛନ୍ତି ବୋଲି ସରକାରୀ ତଥ୍ୟ କହୁଛି। ରାସନ କାର୍ଡ଼ ସହିତ ଆଧାର କାର୍ଡ଼ ଲିଙ୍କ ହେବା ଫଳରେ ୩୬ ହଜାର ୪୪୨ଜଣ ଭୂତଙ୍କ ନାମରେ ରାସନ ସାମଗ୍ରୀ ବର୍ଷ ବର୍ଷ ହେଲା ହଡ଼ପ କରାଯାଉଥିଲା ବୋଲି ଅଭିଯୋଗ ହୋଇଛି। ସମଗ୍ର ଜିଲ୍ଲାରେ ୧୬ ହଜାର ୮୪୯ଜଣ ମୃତ୍ୟୁ ହୋଇଥିବା ବେଳେ ଅଲଗା ପରିବାର ଦର୍ଶାଇ ୧୫ ହଜାର ୫୮୯ଜଣ, ଭୁଲ ତଥ୍ୟ ଦେଇ ୨ହଜାର ୮୭୪ଜଣ ଓ ଜଣିକିଆ କାର୍ଡ଼ଧାରୀ ୧ହଜାର ୧୩୦ ଜଣ ମରିଯାଇଛନ୍ତି ବୋଲି ଧରାପଡିଛି। ସମୁଦାୟ ୩୬ ହଜାର ୪୪୨ଜଣ ଭୂତ ହିତାଧିକାରୀଙ୍କ ନାମରେ ମାସ ମାସ ଧରି ରାସନ ସାମଗ୍ରୀ ସରକାର ଯୋଗାଇ ଆସୁଥିଲେ।

ପ୍ରତି ଦିନ ଶହଶହ ଭୂତ ହିତାଧିକାରୀଙ୍କର ଚିହ୍ନଟ ଚାଲିଛି। ଗତ ୧୨ତାରିଖ ତଥ୍ୟ ମୁତାବକ ଜିଲ୍ଲାରେ ଭୂତ ହିତାଧିକାରୀଙ୍କ ସଂଖ୍ୟା ୩୨ହଜାର ୨୨୫ଜଣ ଥିବା ବେଳେ ୨୫ତାରିଖରେ ଏହା ବୃଦ୍ଧି ପାଇ ୩୬ହଜାର ୪୪୨ଜଣରେ ପହଞ୍ଚିଛି। ମାତ୍ର ୨ସପ୍ତାହ ମଧ୍ୟରେ ୪ହଜାର ୧୮୭ଜଣ ଭୂତ ହିତାଧିକାରୀ ଚିହ୍ନଟ ହୋଇଛନ୍ତି। ଖାଦ୍ୟ ସୁରକ୍ଷା ଆଇନ୍ ୨୦୧୫ ଡିସେମ୍ବର ମାସରୁ ଲାଗି କରାଯାଇଛି। ସେହିଦିନ ଠାରୁ ହିସାବ କଲେ ମୋଟ ୪୨ମାସରେ ଏହି ଭୂତ ହିତାଧିକାରୀଙ୍କ ନାମରେ ମଧ୍ୟ ପ୍ରତି ମାସରେ ୫କିଗ୍ରା ଚାଉଳ ଅବା ଗହମ ଅସାଧୁମେଣ୍ଟ ଚଳୁ କରିଆସୁଛନ୍ତି। କିଲୋ ପ୍ରତି ୨୦ଟଙ୍କା ଖୋଲା ବଜାରରେ ବିକ୍ରି ହେଉଥିବା ଚାଉଳ ଓ କିରାସିନିକୁ ହିସାବ କଲେ ୧୫ କୋଟି ୩୦ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡ଼ିଛି। ସେହିପରି କିରାସିନିକୁ ହିସାବକୁ ନେଲେ ଏହା ମହାଦୁର୍ନୀତି ପରିମାଣ ୨୦ କୋଟି ଛୁଇଁବ ବୋଲି ଆକଳନ କରାଯାଇଛି। ଭୂତ ହିତାଧିକାରୀଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଉଛି। ଅନ୍ୟପକ୍ଷରେ, ଏଥିପାଇଁ ଦାୟୀ କିଏ? ସରକାରଙ୍କର କୋଟି କୋଟି ଟଙ୍କା ହେରାଫେରି କାହା ଠାରୁ ଆଦାୟ କରାଯିବ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି।