ସାରା ରାଜ୍ୟକୁ ସତର୍କ କଲା ପାରାଦୀପ ବନ୍ଦରରୁ ବାହାରିଥିବା ଆମ୍ବୁଲାନ୍ସ୍ । ଦୁଇ କରୋନା ସନ୍ଦିଗ୍ଧଙ୍କୁ ଅଣାଗଲା କଟକ । ମୋଦି କହିଲେ, ସତର୍କ ଅଛନ୍ତି ସରକାର, ନବ କହିଲେ, ଓଡ଼ିଶାରେ ନାହିଁ ଭୟ ।
କନକ ବ୍ୟୁରୋ : କବାଟ ବାଡଉଛି କରୋନା । ଗତକାଲି ଦିଲ୍ଲୀରେ ଦୁଇ ଜଣ ସନ୍ଦିଗ୍ଧଙ୍କ ଠାରେ କରୋନା ଭୂତାଣୁ ଚିହ୍ନଟ ହେବା ପରେ ଆଜି ଓଡିଶାରେ ଦୁଇ ଜଣଙ୍କ ଠାରେ କରୋନା ସନ୍ଦେହ କରି କଟକର ଆଇସୋଲେସନ ୱାର୍ଡରେ ଭର୍ତି କରାଯାଇଛି । ଏହି ଦୁଇ ଜଣ ସ୍ୱାମୀ-ସ୍ତ୍ରୀ ସିଙ୍ଗାପୁରରୁ ଆସିଥିଲେ । ସେପଟେ ଭୁବନେଶ୍ୱର ଓ ଝାରସୁଗୁଡା ବିମାନବନ୍ଦରରେ ସମସ୍ତ ଯାତ୍ରୀଙ୍କ ଥର୍ମାଲ ସ୍କ୍ରିନିଂ କରାଯାଉଛି । ସ୍ୱତନ୍ତ୍ର ଡାକ୍ତରୀ ଟିମ ନିୟୋଜିତ ହୋଇଥିବା ବେଳେ ବିଦେଶୀ ଯାତ୍ରୀଙ୍କ ଉପରେ କଡ଼ା ନଜର ରଖାଯାଇଛି । ଏହାରି ଭିତରେ ସ୍ୱାସ୍ଥ୍ୟମନ୍ତ୍ରୀ ନବ ଦାସ କହିଛନ୍ତି, ଓଡିଶାରେ କରୋନା ଭୟ ନାହିଁ । ଏଥିପାଇଁ ରାଜ୍ୟ ସରକାର ସଂପୂର୍ଣ୍ଣ ପ୍ରସ୍ତୁତ ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାରଦୀପ ବନ୍ଦର ଭିତରୁ ସାଇରନ୍ ଦେଇ ବାହାରି ଆସିଥିବା ଆମ୍ବୁଲାନ୍ସ, ସତେ ଯେମିତି ସାରା ଓଡ଼ିଶାକୁ ସତର୍କ କରିଦେଇଛି । କାରଣ ଏହି ଆମ୍ବୁଲାନ୍ସରେ କରୋନା ସନ୍ଦିଗ୍ଧ ୨ଜଣଙ୍କୁ ବନ୍ଦର ବାହାରକୁ ଅଣାଯାଇଛି । ସିଙ୍ଗାପୁରରୁ ଆସିଥିବା ଦମ୍ପତି ଅସୁସ୍ଥ ଥିବାରୁ ତାଙ୍କ ଉପରେ ସନ୍ଦେହ ବଢ଼ିଥିଲା । ସମସ୍ତ ତଥ୍ୟ ଯାଂଚ ଏବଂ ପ୍ରାଥମିକ ଚିକିତ୍ସା ପରେ ଦମ୍ପତିଙ୍କୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି ।
ଆଉ ଯେତେବେଳେ ଏହି ବିଦେଶୀ ଦମ୍ପତି କଟକ ବଡ଼ ମେଡ଼ିକାଲରେ ପହଂଚିଥିଲେ, ବେଶ ସତର୍କତାର ସହ ଏହି ଦୁଇ ଜଣ ସନ୍ଦିଗ୍ଧ ରୋଗୀଙ୍କୁ ସ୍ୱତନ୍ତ୍ର ୱାର୍ଡକୁ ନିଆଯାଇଥିଲା । ଏହି ଦୁଇ ଜଣଙ୍କ ଉପରେ ଡାକ୍ତରୀ ଟିମ୍ର ନଜର ଥିବା ବେଳେ ରକ୍ତନମୁନା ଯାଂଚ ପାଇଁ ପ୍ରକ୍ରିୟା ଆରମ୍ଭ ହୋଇଛି ।
ଏପଟେ ଓଡ଼ିଶାର ଦୁଇ ବିମାନ ବନ୍ଦର, ଭୁବନେଶ୍ୱର ଏବଂ ଝାରସୁଗଡ଼ା ଦେଇ ଆସୁଥିବା ସମସ୍ତ ବିଦେଶୀ ଯାତ୍ରୀଙ୍କ ଉପରେ ରହିଛି କଡ଼ା ନଜର । ଅନ୍ତର୍ଜାତୀୟ ବିମାନରେ ଆସୁଥିବା ସମସ୍ତ ଯାତ୍ରୀଙ୍କ ସ୍କ୍ରିନିଂ କରାଯାଉଥିବା ସୂଚନା ଦେଇଛନ୍ତି ଭୁବନେଶ୍ୱର ବିମାନ ବନ୍ଦରର ନିର୍ଦ୍ଦେଶକ । ଏଥିପାଇଁ ନିୟୋଜିତ ହୋଇଛନ୍ତି ସ୍ୱତନ୍ତ୍ର ଡାକ୍ତରୀ ଟିମ ।୍ ଚୀନରେ ମୃତ୍ୟୁ ସଂଖ୍ୟା ବଢୁଛି, ଭାରତରେ ଭୟ ବଢୁଛି । ଏହାରି ଭିତରେ ସ୍ୱାସ୍ଥ୍ୟମନ୍ତ୍ରୀ ନବ ଦାସ କହିଛନ୍ତି-ଓଡିଶାରେ କରୋନା ଭୟ ନାହିଁ । ଏଥିପାଇଁ ରାଜ୍ୟ ସରକାର ସଂପୂର୍ଣ୍ଣ ପ୍ରସ୍ତୁତ ଅଛନ୍ତି ।
ଏପଟେ ଭାରତରେ ୫ ଜଣ କରୋନା ରୋଗୀଙ୍କୁ ଚିହ୍ନଟ କରାଯାଇଛି । ଆଗ୍ରାର ଗୋଟିଏ ପରିବାରର ୬ ଜଣଙ୍କୁ କରୋନା ସନ୍ଦେହରେ ଦିଲ୍ଲୀକୁ ସ୍ଥାନାନ୍ତର କରାଯାଇଛି । ଏପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଭୟଭିତ ନହେବାକୁ ପରାମର୍ଶ ଦେଇଛନ୍ତି । ଟ୍ୱିଟ୍ କରି ଲେଖିଛନ୍ତି-ଭୟଭୀତ ହେବାର ଆବଶ୍ୟକତା ନାହିଁ । ସମସ୍ତେ ମିଶି ସ୍ଥିତିର ମୁକାବିଲା କରିବା । ସେହିପରି ଆଉ ଏକ ଟ୍ୱିଟରେ ଲେଖିଛନ୍ତି-ନୋଭେଲ କରୋନା ଭୂତାଣୁ ନେଇ ଏକ ବିସ୍ତୃତ ସମୀକ୍ଷା କରାଯାଇଛି । ବିଭିନ୍ନ ମନ୍ତ୍ରାଳୟ ଏବଂ ରାଜ୍ୟ ମିଳିତ ଭାବେ ସ୍ଥିତିର ମୁକାବିଲା ପାଇଁ ପ୍ରସ୍ତୁତ ଅଛନ୍ତି । ହେଲେ କରୋନା ଭାଇରସକୁ ନେଇ ଦିଲ୍ଲୀରେ ଆତଙ୍କ ଖେଳିଯାଇଛି । ନୋଇଡା ଅଂଚଳରେ ଥିବା ଦୁଇଟି ସ୍କୁଲକୁ ଛୁଟି ଘୋଷଣା କରାଯାଇଛି । ଗୋଟିଏ ସ୍କୁଲକୁ ମାର୍ଚ୍ଚ ୧୧ ତାରିଖ ଯାଏଁ ବନ୍ଦ ଘୋଷଣା କରାଯାଇଥିବା ବେଳେ ଅନ୍ୟ ସ୍କୁଲକୁ ତିନି ଦିନ ପାଇଁ ଛୁଟି ଘୋଷଣା କରାଯାଇଛି ।