କଂଗ୍ରେସକୁ ପୁଣି ଝଟକା । ଦଳ ଛାଡି ଟିଏମସି ହାତ ଧରିଲେ ମହିଳା କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ସୁସ୍ମିତା ଦେବ ।

କନକ ବ୍ୟୁରୋ: କଂଗ୍ରେସକୁ ବଡ ଝଟକା । ମହିଳା କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ସୁସ୍ମିତା ଦେବ ଦଳ ଛାଡିଛନ୍ତି । କଂଗ୍ରେସ ଛାଡି ଏବେ ଟିଏମସିରେ ଯୋଗ ଦେଇଛନ୍ତି ସୁସ୍ମିତା ଦେବ୍ । ଟିଏମସି ନେତା ତଥା ସାଂସଦ ଅଭିଷେକ ବାନାର୍ଜୀ ଓ ଡେରେକ୍ ଓବରେନ୍ଙ୍କ ଉପସ୍ଥିତିରେ ଦଳରେ ଯୋଗ ଦେଇଛନ୍ତି ସୁସ୍ମିତା । ସୋମବାର ସକାଳୁ କଂଗ୍ରେସର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ନିଜ ଇସ୍ତଫା ପତ୍ର ଦେଇଥିଲେ ସୁସ୍ମିତା । ଏହାପରେ ଟିଏମସିରେ ଯୋଗଦେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀକୁ ଭେଟିଛନ୍ତି ସୁସ୍ମିତା ।

ସେପଟେ କଂଗ୍ରେସରୁ ଯୁବନେତାମାନେ ଛାଡିଲେ ଦଳକୁ କିଛି ଫରକ ପଡିବନି ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା କପିଲ ସିବଲ । ସିବଲ ଟ୍ୱିଟ କରି କହିଛନ୍ତି – ସୁସ୍ମିତା କଂଗ୍ରେସର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି । ଯେତେବେଳେ କୌଣସି ଯୁବନେତା ଦଳ ଛାଡନ୍ତି ସେତେବେଳେ ବରିଷ୍ଠ ତଥା ବୁଢା ନେତାମାନଙ୍କୁ ଦୋଷ ଦିଆଯାଏ । ବରିଷ୍ଠ ନେତାମାନେ ଦଳକୁ ସବୁବେଳେ ମଜବୁତ ରଖିବା ପାଇଁ ପ୍ରୟାସ କରିଥାନ୍ତି ।

ହେଲେ ଯୁବ ନେତା ଦଳ ଛାଡୁଛନ୍ତି । ଏହାରି ଭିତରେ ବି ଦଳ ଆଗକୁ ବଢିବ । କଂଗ୍ରେସରେ ଏକ ପ୍ରମୁଖ ଦାୟିତ୍ୱ ତୁଲାଉଥିବା ସୁସ୍ମିତା, ଦଳ ଛାଡିବା ପରେ ଏହାକୁ ନେଇ କଂଗ୍ରେସକୁ ଅନେକ ସମାଲୋଚନା କରାଯାଉଛି । ଏହା ଦଳର ଆଭ୍ୟନ୍ତରୀଣ କନ୍ଦଳକୁ ପଦାରେ ପକାଇଥିବା କୁହାଯାଉଛି । ଗତ ୩ ଦଶକ ଧରି କଂଗ୍ରେସରେ ପ୍ରମୁଖ ଭୂମିକା ତୁଲାଉଥିବା ସୁସ୍ମିତା ହଠାତ ଦଳ କଣ ପାଇଁ ଛାଡିଲେ ଏହାର ସ୍ୱଷ୍ଟ କାରଣ ସାମ୍ନାକୁ ଆସିନି ।