ଫଲୋ ନ କରି ମଧ୍ୟ କରୁଥିଲେ ଫଇସଲା । ସାତ ଦରିଆ ପାରିରୁ ସୁଷମାଙ୍କର ଥିଲେ ହଜାର ହଜାର ଫଲୋଅର୍ସ, କିନ୍ତୁ କାହାକୁ ଫଲୋ ନ କରି ଚୁଟକିରେ ବଡ ବଡ ସମସ୍ୟାର କରୁଥିଲେ ସମାଧାନ ।
କନକ ବ୍ୟୁରୋ : ଫଲୋ ନ କରି ମଧ୍ୟ କରୁଥିଲେ ଫଇସଲା । ଗୋଟିଏ ଗୋଟିଏ ଟ୍ୱିଟରେ ବଡ ବଡ ସମସ୍ୟାର ହୋଇଯାଉଥିଲା ସମାଧାନ । ସାତ ଦରିଆ ପାରିରୁ ଆସୁଥିବା ସମସ୍ୟାକୁ ସୋସିଆଲ ମିଡିଆରେ ଗୋଟିଏ କ୍ଲିକରେ ସମାଧାନ କରୁଥିଲେ ସୁଷମା । ସୋସିଆଲ ମିଡ଼ିଆରେ ସୁଷମା ଏତେ ଲୋକପ୍ରିୟ ହୋଇଯାଇଥିଲେ ଯେ, କୋଟି କୋଟି ଲୋକ ତାଙ୍କୁ ଟ୍ୱିଟରରେ ଫଲୋ କରୁଥିଲେ । କିନ୍ତୁ ସେମାନଙ୍କୁ ଫଲୋ କରିବା ବଦଳରେ ଲୋକଙ୍କ ସମସ୍ୟାକୁ ସମାଧାନ କରିବା ଦିଗରେ ଅଧିକ ଗୁରୁ୍ତ୍ୱ ଦେଉଥିଲେ । ସାଧାରଣ ଲୋକଙ୍କ କଥା ଛାଡନ୍ତୁ ନିଜର ଦଳୀୟ ସାଥୀ କିମ୍ବା ଦେଶର ଜଣାଶୁଣା ଚେହେରାଙ୍କୁ ମଧ୍ୟ ଫଲୋ କରିନଥିଲେ ସୁଷମା । ଯେଉଁଠି ଟ୍ୱିଟରରେ ତାଙ୍କୁ ୧୩ ମିଲିୟନରୁ ଅଧିକ ଲୋକ ଫଲୋ କରୁଥିଲେ ସେଭଳି ସ୍ଥଳେ ଟ୍ୱିଟରରେ ଜଣେ ହେଲେ ବ୍ୟକ୍ତିଙ୍କୁ ମଧ୍ୟ ଫଲୋ କରିନଥିଲେ ସୁଷମା ।
Kanak News is now on WhatsApp
Join and get latest news updates delivered to you via WhatsApp
ଟ୍ୱିଟରରେ ସିନା କାହାକୁ ଫଲୋ କରିନଥିଲେ କିନ୍ତୁ ରାଜନୈତିକ ବ୍ୟାପାରରେ ପ୍ରଯୁକ୍ତି ବିଦ୍ୟାକୁ କିଭଳି ବ୍ୟବହାର କରାଯାଏ, ତାହା ସାରା ଦୁନିଆକୁ ଶିଖାଇଥିଲେ ସୁଷମା । ମୋଦି ସରକାରର ପ୍ରଥମ ପାଳିରେ ବୈଦଶିକ ମନ୍ତ୍ରୀ ଭାବେ ଦାୟିତ୍ୱ ତୁଲାଇଥିବା ସୁଷମା ସୋସିଆଲ ମିଡିଆକୁ ସାଥୀ କରି ଦେଶର ପ୍ରତିଟି ଘରେ ପହଞ୍ଚିପାରିଥିଲେ । ଗାଁ ଠାରୁ ଆରମ୍ଭ କରି ସହର, ଯୁବକଙ୍କ ଠାରୁ ଆରମ୍ଭ କରି ବୃଦ୍ଧ ଗୋଟିଏ କ୍ଲିକ କରି ସୁଷମାଙ୍କ ନିକଟରେ ନିଜର ଅଭିଯୋଗ ପହଞ୍ଚାଇ ପାରୁଥିଲେ । କେବଳ ଭାରତ ନୁହେଁ ସାତ ଦରିଆ ପାରିରୁ ମଧ୍ୟ ସୁଷମାଙ୍କ ନିକଟକୁ ଆସୁଥିଲା ଶହ ଶହ ଅଭିଯୋଗ । ଆଉ ଏହାକୁ ଚୁଟକିରେ ସମାଧାନ କରୁଥିଲେ ସୁଷମା । ଏପରିକି ଶେଷ ନିଶ୍ୱାସ ତ୍ୟାଗ କରିବାର ଚାରିଘଣ୍ଟା ପୂର୍ବରୁ ଟ୍ୱିଟ୍ କରି ଧାରା ୩୭୦ ଉଚ୍ଛେଦ ପାଇଁ ମୋଦିଙ୍କୁ ଧନ୍ୟବାଦ ଦେଇଥିଲେ ସୁଷମା ।
ବିଦେଶରେ ଅତ୍ୟାଚାରର ଶିକାର ହେଉଥିଲେ କିମ୍ବା ଫସି ରହିଥିଲେ ଲୋକଙ୍କ ପ୍ରଥମ ଟ୍ୱିଟ୍ ଆସୁଥିଲା ସୁଷମାଙ୍କ ପାଖକୁ । ସମସ୍ୟା ସମାଧାନ କରିବାକୁ ସୋସିଆଲ ମିଡିଆକୁ ବଡ ଅସ୍ତ୍ର କରିଥିଲେ ସୁଷମା । ଅଭିଯୋଗ ଆସିବାର କିଛି ସମୟ ମଧ୍ୟରେ ହିଁ ଏହା ଉପରେ କାର୍ଯ୍ୟ ଆରମ୍ଭ କରୁଥିଲେ ସୁଷମା । ଆଉ ଏହାଦ୍ୱାରା ସୁଷମାଙ୍କ ପ୍ରତି ଲୋକଙ୍କ ମନରେ ବିଶ୍ୱାସ ବଢିବା ସହ ଭଲ ପାଇବା ମଧ୍ୟ ବଢିଚାଲିଥିଲା । ଏପରିକି ସୁଷମାଙ୍କୁ ଟ୍ୱିଟ୍ କଲେ ସାହାଯ୍ୟ ମିଳିବା ନିଶ୍ଚିତ ବୋଲି ଲୋକଙ୍କ ମନରେ ବିଶ୍ୱାସ ଜନ୍ମିଥିଲା । ଯାହା ତାଙ୍କୁ ଏକ ସ୍ୱତନ୍ତ୍ର ପରିଚୟ ଦେଇଥିଲା । କୁହାଯାଏ ଏହି ଟ୍ୱିଟର ଫର୍ମୁଲାକୁ ସାଥୀ କରି ବୈଦଶିକ ମନ୍ତ୍ରାଳୟର ଦ୍ୱାର ସାଧାରଣ ଲୋକଙ୍କ ପାଇଁ ଖୋଲି ଦେଇଥିଲେ ସୁଷମା ।