ମନ୍ତ୍ରୀପଦ ରେସରେ ନଥିଲି କି ଅସନ୍ତୁଷ୍ଟ ନାହିଁ । ନବୀନଙ୍କୁ ୬ଷ୍ଠ ଥର ମୁଖ୍ୟମନ୍ତ୍ରୀ କରିବା ଆମର ଲକ୍ଷ୍ୟ : ସୁଶାନ୍ତ ସିଂ
କନକ ବ୍ୟୁରୋ : ମନ୍ତ୍ରୀପଦ ରେସରେ ନଥିଲି କି ଏବେ ଅସନ୍ତୁଷ୍ଟ ମଧ୍ୟ ନାହିଁ । ମନ୍ତ୍ରୀ ହେବାକୁ ଲବି ମଧ୍ୟ କରିନଥିଲି । ସୁନ୍ଦରଗଡକୁ ଛାଡି ପଶ୍ଚିମ ଓଡ଼ିଶାର ୯ଟି ଜିଲ୍ଲାର ଦାୟିତ୍ୱ ବୁଝିବାକୁ ମୁଖ୍ୟମନ୍ତ୍ରୀ କହିଛନ୍ତି । ପଶ୍ଚିମ ଓଡ଼ିଶାର ୩୧ରୁ ଅଧିକ ବିଧାନସଭା ଆସନରେ ବିଜେଡି ୨୦୨୪ରେ ବିଜୟୀ ହେବ । ସଙ୍ଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ଭେଟିବା ପରେ କିଛି ଏମିତି କହିଛନ୍ତି ଭଟଲି ବିଧାୟକ ସୁଶାନ୍ତ ସିଂ । ମନ୍ତ୍ରୀମଣ୍ଡଳରେ ସୁଶାନ୍ତଙ୍କୁ ସ୍ଥାନ ନ ମିଳିଥିବାରୁ ସେ ଅସନ୍ତୁଷ୍ଟ ଥିବା ନେଇ ଯେଉଁ ଚର୍ଚ୍ଚା ହେଉଥିଲା ସେଥିରେ ପୂର୍ଣ୍ଣଚ୍ଛେଦ ପକାଇଛନ୍ତି ସୁଶାନ୍ତ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ମୁଖ୍ୟମନ୍ତ୍ରୀ ଓ ଆଜି ସଙ୍ଗଠନ ସମ୍ପାଦକଙ୍କୁ ଭେଟିବା ପରେ ସୁଶାନ୍ତ କହିଛନ୍ତି, ୨୦୨୨ରେ ମୁଖ୍ୟମନ୍ତ୍ରୀ ମୋତେ ଇସ୍ତଫା ଦେବାକୁ କହିନଥିଲେ । ବରଂ ସଙ୍ଗଠନକୁ ସୁଦୃଢ କରିବାକୁ ମୁଁ ନିଜେ ଇସ୍ତଫ ଦେଇଥିଲି । କାରଣ ମନ୍ତ୍ରୀମଣ୍ଡଳରେ ରହିଲେ ୧୫ରୁ ୨୦ ଦିନ ଭୁବନେଶ୍ୱରରେ ରହିବାକୁ ପଡିଥାଏ । ପଶ୍ଚିମ ଓଡ଼ିଶାରେ ସଙ୍ଗଠନକୁ ସୁଦୃଢ କରିବାକୁ ମୋତେ କୁହାଯାଇଛି । ଯେଉଁଠି ସୁବିଧା, ଅସୁବିଧା ଅଛି ତାହାର ରିପୋର୍ଟ ଦେବାକୁ ମୁଖ୍ୟମନ୍ତ୍ରୀ କହିଛନ୍ତି । ମିଡ଼ିଆରେ ଯେଉଁ ତଥ୍ୟ ବାହାରୁଛି ସେଥିରେ କୌଣସି ସତ୍ୟତା ନାହିଁ । ମନ୍ତ୍ରୀଙ୍କ ଶପଥଗ୍ରହଣ ଉତ୍ସବ ଦିନ ମୋର ନିର୍ବାଚନମଣ୍ଡଳୀରେ ଅନେକ କାର୍ଯ୍ୟକ୍ରମ ଥିଲା । ତେଣୁ ସେଠାରେ ରହିବାର ଆବଶ୍ୟକତା ରହିଥିଲା । ମନ୍ତ୍ରୀ ମଣ୍ଡଳରେ ସ୍ଥାନ ମିଳିନଥିବାରୁ କିଛି ସମର୍ଥକ ଭାବପ୍ରବଣତାରେ ଏମିତି କହିଛନ୍ତି । ସେମାନଙ୍କୁ ଡାକିକି ବୁଝାଇଛି । ଆମ ଉପରେ ମୁଖ୍ୟମନ୍ତ୍ରୀଙ୍କ ଆଶୀର୍ବାଦ ଅଛି ସେତିକି ଯଥେଷ୍ଟ । ମନ୍ତ୍ରୀମଣ୍ଡଳକୁ ନେଇ ମୁଁ ଅସନ୍ତୁଷ୍ଟ ନାହିଁ ବୋଲି କହିଛନ୍ତି ସୁଶାନ୍ତ ।
ଏହାସହ ସୁଶାନ୍ତ କହିଛନ୍ତି, ପଶ୍ଚିମ ଓଡ଼ିଶାକୁ ନବୀନ ପଟ୍ଟନାୟକ ପ୍ରାଧାନ୍ୟ ଦେଇ ଆସୁଛନ୍ତି । ସୁନ୍ଦରଗଡ ପାଇଁ ଭିନ୍ନ ଷ୍ଟ୍ରାଟେଜି ହୋଇଛି । କିନ୍ତୁ ଅନ୍ୟ ୯ ଜିଲ୍ଲାରେ ପର୍ଯ୍ୟବେକ୍ଷକ ସହ ଆଲୋଚନା କରି ସଙ୍ଗଠନକୁ ସୁଦୃଢ କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ପଶ୍ଚିମ ଓଡ଼ିଶାରେ ଆମେ ୩୧ରୁ ଅଧିକ ବିଧାୟକ ଜିତିବୁ । ସେହିଭଳି ୫ରୁ ୫ ଲୋକସଭା ଆସନ ଜିତିବୁ ବୋଲି କହିଛନ୍ତି ସୁଶାନ୍ତ ସିଂ । ବିଜେପି ସାଂସଦଙ୍କ ବିରୋଧରେ ଗ୍ରାଉଣ୍ଡରେ ଅସନ୍ତୋଷ ରହିଛି । ପଶ୍ଚିମ ଓଡ଼ିଶାରେ ଏମାନଙ୍କର ଦର୍ଶନ ମିଳେନି । ୨୦୦୯ରେ ମୁଁ ଟିକେଟ ଡିମାଣ୍ଡ କରିନଥିଲି । କିନ୍ତୁ ମୋତେ ଡାକିକି ଟିକେଟ ଦିଆଯାଇଥିଲା । ମୁଖ୍ୟମନ୍ତ୍ରୀଙ୍କ ଆଶୀର୍ବାଦ ଯୋଗୁଁ ଆମକୁ ଓଡ଼ିଶାବାସୀ ଚିହ୍ନିଛନ୍ତି । ତେଣୁ ନବୀନ ପଟ୍ଟନାୟକ କିଭଳି ୬ଷ୍ଠ ଥର ପାଇଁ ମୁଖ୍ୟମନ୍ତ୍ରୀ ହେବେ ସେ ଲକ୍ଷ୍ୟ ଆମର ରହିଛି ବୋଲି କହିଛନ୍ତି ସୁଶାନ୍ତ ।