କନକ ବ୍ୟୁରୋ : ବାଲେଶ୍ୱର ସଦର ଆସନ ପାଇଁ ସ୍ୱରୂପ ଦାସଙ୍କୁ ବିଜେଡି ପ୍ରାର୍ଥୀ ଭାବେ ଘୋଷଣା କରି ସମସ୍ତଙ୍କୁ ଚକିତ କରିଛନ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ । ସଦର ଆସନ ପାଇଁ ଅନେକ ହେଭିୱେଟଙ୍କ ନାଁ ଚର୍ଚ୍ଚାରେ ଥିଲେ ମଧ୍ୟ ସ୍ୱରୁପଙ୍କୁ ପ୍ରାର୍ଥୀ କରି ସମସ୍ତଙ୍କୁ ଚକମା ଦେଇଛନ୍ତି ନବୀନ । ତେବେ ବିଧାୟକ ପ୍ରାର୍ଥୀ ଭାବେ ସ୍ୱରୁପଙ୍କ ଭଳି ନୂଆ ମୁହଁକୁ ସାମ୍ନାକୁ ଆଣିବା ପଛରେ ନବୀନଙ୍କର କଣ ଷ୍ଟ୍ରାଟେଜି ରହିଛି ତାହା ଅନେକଙ୍କ ପାଇଁ ଏବେ ବି ଅଡୁଆ ସୂତାର ଖିଅ ଭଳି । କାରଣ ବିଜେଡିରୁ ଟିକେଟ ହାତେଇଥିବା ସ୍ୱରୁପଙ୍କୁ ପୂର୍ବରୁ ଦଳରେ ସେଭଳି କୌଣସି ବଡ ପଦପଦବୀରେ ଦେଖିବାକୁ ମିଳିନାହିଁ । କେବଳ ବିଜେଡିର ପୂର୍ବତନ କାଉନସିଲରର ମୋହର ଯେ ସ୍ୱରୁପଙ୍କୁ ବିଧାୟକ ପ୍ରାର୍ଥୀ ଭାବେ ସାମ୍ନାକୁ ଆଣିବ ତାହା ରାଜନୈତିକ ପଣ୍ଡିତଙ୍କ ପାଇଁ କଳ୍ପନାର ବାହାରେ । ତେବେ ସଦର ଆସନ ପାଇଁ ବିଜେଡିର ସରପ୍ରାଇଜ ସିପାହୀ ସାଜିଥିବା ସ୍ୱରୁପଙ୍କୁ ବାଛି ସୁପ୍ରିମୋ ଜଟିଳ ସମସ୍ୟାର ସରଳ ସମାଧାନ କରିଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଏକଥା ଏଥିପାଇଁ କୁହାଯାଉଛି, କାରଣ ସଦର ଆସନ ପାଇଁ ବିଜେଡିର ପ୍ରାର୍ଥୀ ଦୌଡରେ ବଡ ବଡ ହେଭିୱେଟଙ୍କ ନାଁ ସାମ୍ନାକୁ ଆସୁଥିଲା । ଦିନ ଯେତିକି ଗଡୁଥିଲା, ଏହି ତାଲିକାରେ ଗୋଟିଏ ପରେ ଗୋଟିଏ ନାଁ ସେତିକି ଅଧିକ ଯୋଡି ହୋଇ ଚାଲୁଥିଲା । ଗୋଟିଏ ପଟେ ବାଲେଶ୍ୱରର ପୂର୍ବତନ ସାଂସଦ ତଥା ଜିଲ୍ଲା ସଭାପତି ରବୀନ୍ଦ୍ର ଜେନାଙ୍କ ସ୍ତ୍ରୀ ସୁବାସିନୀଙ୍କ ନାଁକୁ ନେଇ ଚର୍ଚ୍ଚା ହେଉଥିବା ବେଳେ ଅନ୍ୟପଟେ ପୂର୍ବତନ ବିଧାୟକ ଜୀବନ ପ୍ରଦୀପ ଦାସ ମଧ୍ୟ ଟିକେଟ ଦୌଡରେ ନିଜକୁ ଆଗରେ ରଖିଥିଲେ । ଦିନ ଗଡୁଥିଲା, ଦଳ ଭିତରେ ଅସନ୍ତୋଷ ବଢୁଥିଲା । ଏପରିକି ଉଭୟ ଗୋଷ୍ଠୀଙ୍କୁ ବୁଝାଇବା ପାଇଁ ରାଜଧାନୀରୁ ନେତା ଯାଇଥିଲେ ମଧ୍ୟ ଏହି ଫର୍ମୁଲା କାମ କରିନଥିଲା । ଏଭଳି ସମୟରେ ପ୍ରାର୍ଥୀ ତାଲିକାରେ ଯୋଡି ହୋଇଥିଲା ସିନେଷ୍ଟାର ତଥା ବିଜେଡି ନେତା ଅରିନ୍ଦମଙ୍କ ନାଁ । ଆଉ ଏଭଳି ଚର୍ଚ୍ଚାକୁ ନେଇ ଦଳ ଭିତରେ ଅସନ୍ତୋଷ ଆହୁରି ଉଗ୍ର ରୂପ ଧାରଣ କରିଥିଲା । ଯାହା ଦଳକୁ ବ୍ୟାକଫୁଟକୁ ଠେଲି ଦେବା ପାଇଁ ଯଥେଷ୍ଟ ଥିଲା ।
ନିର୍ବାଚନ ପାଇଁ ତାରିଖ ଘୋଷଣା ହେବା ପରେ ମଧ୍ୟ ବିଜେଡି ଟିକେଟ କିଏ ହାତେଇବ ତାହାକୁ ନେଇ ସସପେନ୍ସ ଲାଗି ରହିଥିଲା । ବାରମ୍ବାର ବୈଠକ, ଆଲୋଚନା ପରେ ମଧ୍ୟ ପ୍ରାର୍ଥୀ ଭାବେ କାହା ନାଁରେ ମୋହର ବାଜିବ ତାହା ସ୍ଥିର କରି ପାରୁନଥିଲେ ଦଳର ଥିଙ୍କଟ୍ୟାଙ୍କ୍ । ଏଭଳି ସମୟରେ ସଦର ଆସନରେ ପୁଣିଥରେ ସବୁଜ ଆସନ ଉଡାଇବା ପାଇଁ ଅଙ୍କ କଷିଥିଲେ ନବୀନ । ଜଟିଳ ସମସ୍ୟାର ସରଳ ସମାଧାନ କରିବାରେ ମାହିର ଥିବା ନବୀନ ଖେଳିଥିଲେ ସରପ୍ରାଇଜ କାର୍ଡ । ତୃଣମୂଳସ୍ତରରେ ଦଳ ପାଇଁ କାମ କରୁଥିବା କର୍ମୀଙ୍କୁ ନେତା ହେବାର ସୁଯୋଗ ଦେଉଥିବା ନବୀନ ବାଲେଶ୍ୱର ସଦର ଆସନ ପାଇଁ ମଧ୍ୟ ସମାନ ଫର୍ମୁଲା ଆପଣାଇଥିଲେ । ୨୦୧୯ରେ ଆସ୍କାରୁ ପ୍ରମିଳାଙ୍କ ଭଳି ୨୦୨୦ ସ୍ୱରୂପଙ୍କୁ ସାମ୍ନାକୁ ଆଣି ନବୀନ ମାରିଛନ୍ତି ମାଷ୍ଟରଷ୍ଟ୍ରୋକ । ର୍ନିବିବାଦୀୟ ଚେହେରା ସାଙ୍ଗକୁ ନୂଆ ମୁହଁ, ଏହି ନିଷ୍ପତ୍ତି ନେଇ ଦଳ ଭିତରେ ଥିବା ଅସନ୍ତୋଷକୁ ପ୍ରଶମିତ କରିବାକୁ ପ୍ରୟାସ କରିଥାଇପାରନ୍ତି ନବୀନ । ଆଉ ନବୀନଙ୍କ ଏହି ନିଷ୍ପତ୍ତି ସୂଚାଉଛି ଯେ, ଯିଏ ଯେତେ ଆକଳନ କରୁ ରାଜନୀତିର ବୈତରଣୀ ପାର କରିବାକୁ ନାଉରୀ କିଏ ହେବ ତାହାର ସଠିକ ଦିଗ ନିର୍ଦ୍ଧାରଣ କରନ୍ତି ନବୀନ ।