ସୁରତରେ ଦୁଷ୍କର୍ମ ପୀଡିତା ଓଡିଶାର ହୋଇଥିବା ନେଇ ବଢିଲା ସନ୍ଦେହ । ଡିଜିି କହିଲେ, ଯୋଗାଯୋଗ କରି ତଥ୍ୟ ଦେଇଛି ଗୁଜରାଟ ପୁଲିସ୍
କନକ ବ୍ୟୁରୋ: ସୁରତରେ ଦୁଷ୍କର୍ମ ପୀଡିତା ଓଡିଶାର ହୋଇଥିବା ନେଇ ବଢିଲା ସନ୍ଦେହ । ଗୋଟିଏ ପଟେ ମୃତଦେହ ମିଳିବାର ୧୦ଦିନ ପରେ ବି ପୀଡିତାଙ୍କ ଚିହ୍ନଟ କରିପାରିନାହିଁ ଗୁଜରାଟ ପୋଲିସ । ଅନ୍ୟପଟେ ପୀଡିତାଙ୍କ ବାବଦରେ ତଥ୍ୟ ସଂଗ୍ରହ କରିବାକୁ ଓଡିଶା ପୋଲିସ ଡିଜିଙ୍କ ସହ ଯୋଗାଯୋଗ କରିଥିବା ସୂଚନା ଦେଇଛନ୍ତି ଗୁଜରାଟ ଗୃହମନ୍ତ୍ରୀ । ତେଣୁ ଏଭଳି ସନ୍ଦେହ ଦାନା ବାନ୍ଧିଛି । ଏପଟେ ନୀଳଗିରିରେ ୪ବର୍ଷର ନାବାଳିକାଙ୍କୁ ଦୁଷ୍କର୍ମ ଅଭିଯୋଗ ମାମଲା ବିଧାନସଭାରେ ଉଠିଛି । ପ୍ରଶ୍ନକାଳକୁ ବାତିଲ କରି ମହିଳା ବିରୋଧୀ ହିଂସା ପ୍ରସଙ୍ଗରେ ଚର୍ଚ୍ଚା ଦାବିରେ ହଙ୍ଗାମା କରିଛନ୍ତି ବିରୋଧୀ କଂଗ୍ରେସ ଓ ବିଜେପି ବିଧାୟକ ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ସୁରତ ଦୁଷ୍କର୍ମ ଘଟଣାକୁ ନେଇ ସାରାଦେଶରେ ଚର୍ଚ୍ଚା ସୃଷ୍ଟି ହୋଇଛି ଏବଂ ମାନବିକତାର ସବୁ ସୀମାକୁ ଭୁଲିଯାଇ ଅତି ନିର୍ମମ ଭାବରେ ବଳାତ୍କାର କରି ହତ୍ୟା କରାଯାଇଛି, ସେହି ଅସହାୟ ଝିଅଟି ଓଡିଶାର ହୋଇଥିବା ନେଇ ସନ୍ଦେହ ବଢିଛି । ପୀଡିତା ଗୁଜରାଟର ହୋଇନଥିବା ଅନୁମାନ କରି ଅନ୍ୟ ରାଜ୍ୟଗୁଡିକ ସହ ଯୋଗାଯୋଗ ଆରମ୍ଭ ହୋଇଛି । ମହାରାଷ୍ଟ୍ର, ରାଜସ୍ଥାନ ସହ ପଶ୍ଚିମବଙ୍ଗ ଏବଂ ଓଡିଶା ପୋଲିସ ସହିତ ଯୋଗାଯୋଗ କରିଛି ଗୁଜରାଟ ପୋଲିସ । ଯାହାକୁ ସ୍ପଷ୍ଟ କରିଛନ୍ତି ପୋଲିସ ଡିଜି ଡକ୍ଟର ରାଜେନ୍ଦ୍ର ପ୍ରସାଦ ଶର୍ମା ।
ସୁରତ ପାଣ୍ଡେସରାରେ ଗତ ଏପ୍ରିଲ ୬ ତାରିଖରେ ରାସ୍ତାକଡରୁ ମିଳିଥିବା ୯ରୁ ୧୩ ବର୍ଷର ନାବାଳିକାଙ୍କ ଦୁଷ୍କର୍ମକାରୀଙ୍କୁ ଧରିବା ତ ଦୂରର କଥା । ତାଙ୍କ ପରିଚୟ ମଧ୍ୟ ପାଇପାରି ନାହିଁ ଗୁଜରାଟ ପୋଲିସ । ଯେଉଁଥିପାଇଁ ୧୨ ହଜାର ପୋଷ୍ଟର ମରାଯାଇଛି । ସେହିପରି ପାଖାପାଖି ୮ହଜାର ନିଖୋଜ ମାମଲାକୁ ନେଇ ଛାନଭିନ ଆରମ୍ଭ କରିଛି ଗୁଜରାଟ ପୋଲିସ ।
ପୀଡିତାଙ୍କ ସଂପର୍କରେ ସୂଚନା
– ଦୁଷ୍କର୍ମ ପୀଡିତାଙ୍କ ବୟସ ୯ରୁ ୧୩ ବର୍ଷ
– ପୀଡିତାଙ୍କ ଉଚ୍ଚତା ପାଖାପାଖି ୪ ଫୁଟ୍
– ତାଙ୍କ ରଙ୍ଗ ଗୋରା ଓ ପତଳା ଶରୀର
– ନୀଳ ରଙ୍ଗର ସାର୍ଟ ଓ ହାଲୁକା ନୀଳ ଲେଗିଙ୍ଗସ ପିନ୍ଧିଥିଲେ
ଏଠାରେ ଆମେ କହି ରଖୁଛୁ କି, ଗୁଜରାଟର ସୁରତରେ ଅଧିକାଂଶ ଓଡିଆ ବସବାସ କରିଥାନ୍ତି । ବିଶେଷ କରି ପାଣ୍ଡେସରାର ଭେସ୍ଥାନ, ଯେଉଁଠାରୁ ପୀଡିତାଙ୍କ ମୃତଦେହ ମିଳିଥିଲା ସେଠାରେ ମଧ୍ୟ ଓଡିଆ ଭାଷାଭାଷି ଲୋକ ରୁହନ୍ତି । ତେଣୁ ଦୁଷ୍କର୍ମ ପୀଡିତା ଜଣକ ଓଡିଆ ହୋଇଥିବା ନେଇ ସନ୍ଦେହ ବଢିବାରେ ଲାଗିଛି ।
ଏପଟେ ନୀଳଗିରିରେ ଜଣେ ୪ବର୍ଷର ନାବାଳିକାଙ୍କୁ ଦୁଷ୍କର୍ମ ଅଭିଯୋଗ ପ୍ରସଙ୍ଗରେ ହୁଲସ୍ତୁଲ ହୋଇଛି ବିଧାନସଭା । ଧର୍ଷଣ ଅଭିଯୁକ୍ତ ନୀଳଗିରି ବିଧାୟକଙ୍କ ପୁତୁରା ବୋଲି ବିଜେପି ଅଭିଯୋଗ କରିଛି । ସୋର ଓ ନୀଳଗିରିରେ ନାବାଳିକାଙ୍କୁ ଦୁଷ୍କର୍ମ ପ୍ରସଙ୍ଗରେ ପ୍ରଶ୍ନକାଳ ବାତିଲ କରି ଗୃହରେ ଆଲୋଚନା ଦାବିରେ ହଙ୍ଗାମା କରିଛନ୍ତି କଂଗ୍ରେସ ସଦସ୍ୟ ।