ଖୋର୍ଦ୍ଧାରୁ ପୁଣି ଲଢ଼ିବା ପ୍ରସ୍ତାବକୁ ମନା କଲେ ସୁର ରାଉତରାୟ । କହିଲେ, ବୟସ ହେଲାଣି ୮୦, ଏବେ ଲଢ଼ିବେ ଦୁଇ ପୁଅ ।

କନକ ବ୍ୟୁରୋ: ଖୋର୍ଦ୍ଧାରୁ ନିର୍ବାଚନ ନଲଢିବା କଥାକୁ ପୁଣି ଦୋହରାଇଲେ ବିଧାୟକ ସୁରେଶ ରାଉତରାୟ । କହିଛନ୍ତି, ତାଙ୍କୁ ୮୦ ବର୍ଷ ହେଲାଣି । ଆଉ ନିର୍ବାଚନ ଲଢିବେନି । ସାନ ପୁଅ ଜଟଣୀରୁ ଓ ବଡ଼ପୁଅ ନିମାପଡ଼ାରୁ ନିର୍ବାଚନ ଲଢିବେ ବୋଲି କହିଛନ୍ତି, ସୁରେଶ ରାଉତରାୟ । ଖୋର୍ଦ୍ଧାରୁ ୪ ବିଧାୟକ ଜିତିବା ତାଙ୍କ ଲକ୍ଷ୍ୟ ବୋଲି କହିଛନ୍ତି । କଂଗ୍ରେସର ଯେଉଁମାନଙ୍କୁ ୮୦ ବର୍ଷ ହୋଇଗଲାଣି ସେମାନେ ରହିଯାଆନ୍ତୁ, ଏବେ ଯୁବକମାନଙ୍କୁ ସୁଯୋଗ ଦିଆଯିବା ଆବଶ୍ୟକ ବୋଲି କହିଛନ୍ତି ।

ପୂର୍ବରୁ ଖୋର୍ଦ୍ଧାରୁ ସୁର ରାଉତରାୟ ଲଢିବେ ବୋଲି କହିଥିଲେ ପିସିସି ସଭାପତି ଶରତ ପଟ୍ଟନାୟକ । ଏବେ ସୁରେଶ ରାଉତରାୟ ନିର୍ବାଚନ ଲଢିବେ ନାହିଁ ବୋଲି କହିଛନ୍ତି । ଏହା ସହ ସୁରେଶ ରାଉତରାୟ କହିଛନ୍ତି, କଂଗ୍ରେସ ନିର୍ବାଚନ ପାଇଁ ପ୍ରସ୍ତୁତ ଅଛି । ଏଥର ୯୬ ବିଧାୟକ ଓ ୧୧ ସାଂସଦ ଜିତିବେ । ୮୦ ଭାଗ ଯୁବକ ଯୁବତୀ କଂଗ୍ରେସରୁ ନିର୍ବାଚନ ଲଢିବେ । ଖୁବ୍ ଶୀଘ୍ର ଟିକେଟ ଘୋଷଣା କରିବ କଂଗ୍ରେସ । ବିଜେଡି ଓ ବିଜେପି ମେଣ୍ଟ ହେଲେ କଂଗ୍ରେସ ସରକାର ଗଢିବ ବୋଲି କହିଛନ୍ତି ସୁରେଶ ରାଉତରାୟ ।