ଜଜ୍ ଯିବେ ଜେଲ୍ ! ବିଚାର ବ୍ୟବସ୍ଥାରେ ସୃଷ୍ଟି ହେଲା ଇତିହାସ
କନକ ବ୍ୟୁରୋ : ଜେଲ ଯିବେ କୋଲକାତା ହାଇକୋର୍ଟର ବିଚାରପତି ଜଷ୍ଟିସ ସିଏସ କର୍ଣ୍ଣନ । ତାଙ୍କୁ ୬ ମାସର ଜେଲ ଦଣ୍ଡାଦେଶ ଶୁଣାଇଛନ୍ତି ସୁପ୍ରିମକୋର୍ଟ । ଅଦାଲତ ଅବମାନନା ଅଭିଯୋଗରେ ଜଷ୍ଟିସ କର୍ଣ୍ଣନଙ୍କୁ ଦୋଷୀ ସାବ୍ୟସ୍ତ କରିଛନ୍ତି ସର୍ବୋଚ୍ଚ ଅଦାଲତ । ସୁପ୍ରିମକୋର୍ଟର ୭ ଜଣିଆ ସାମ୍ବିଧାନିକ ପୀଠ ଏହି ମାମଲାର ଶୁଣାଣି କରି ରାୟ ଶୁଣାଇଛନ୍ତି । ତୁରନ୍ତ ଜଷ୍ଟିସ କର୍ଣ୍ଣନଙ୍କୁ ଗିରଫ କରିବା ସହ ଜେଲ ପଠାଇବାକୁ ପଶ୍ଚିମବଙ୍ଗ ଡିଜିପିଙ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ଏହା ସହ ଜଷ୍ଟିସ କର୍ଣ୍ଣନଙ୍କ କୌଣସି ବୟାନକୁ ପ୍ରସାରିତ ନକରିବାକୁ ଗଣମାଧ୍ୟମ ଉପରେ ମଧ୍ୟ ସୁପ୍ରିମକୋର୍ଟ କଟକଣା ଜାରି କରିଛନ୍ତି । ଜଷ୍ଟିସ କର୍ଣ୍ଣନ ପ୍ରଧାନମନ୍ତ୍ରୀଙ୍କୁ ଏକ ଚିଠି ଲେଖିଥିଲେ ଯେଉଁଥିରେ ସେ ୨୦ ଜଣ କାର୍ଯ୍ୟରତ ଓ ଅବସରପ୍ରାପ୍ତ ବିଚାରପତିଙ୍କ ବିରୋଧରେ ଦୁର୍ନୀତି ଅଭିଯୋଗ କରିବା ସହ କାର୍ଯ୍ୟାନୁଷ୍ଠାନ ଦାବି କରିଥିଲେ । ଏ ସଂପର୍କରେ ତାଙ୍କୁ ଜବାବ ତଲବ କରିଥିଲେ ସୁପ୍ରିମକୋର୍ଟ ।
ହେଲେ ସେ କ୍ଷମା ମାଗିବା ପରିବର୍ତେ ଏପ୍ରିଲ ୨୮ରେ ସୁପ୍ରିମକୋର୍ଟର ପ୍ରଧାନ ବିଚାରପତି ଜେଏସ ଖେହରଙ୍କୁ ତାଙ୍କ ଅଦାଲତରେ ହାଜର ହେବାକୁ ନିର୍ଦ୍ଦେଶ ଜାରି କରିଥିଲେ । ଯେଉଁଥି ପାଇଁ ଜଷ୍ଟିସ କର୍ଣ୍ଣନଙ୍କ ବିରୋଧରେ ଅଦାଲତ ଅବମାନନା ଅଭିଯୋଗର ଶୁଣାଣି ଆରମ୍ଭ ହୋଇଥିଲା । ଇତିହାସରେ ପ୍ରଥମ ଥର ପାଇଁ କୌଣସି କାର୍ଯ୍ୟରତ ହାଇକୋର୍ଟ ବିଚାରପତିଙ୍କୁ ଅଦାଲତ ଅବମାନନା ଅଭିଯୋଗରେ ଦଣ୍ଡିତ କରିଛନ୍ତି ସୁପ୍ରିମକୋର୍ଟ ।