ମୁଖ୍ୟ ନିର୍ବାଚନ କମିଶନ ନିଯୁକ୍ତି ବିବାଦ । ସୁପ୍ରିମକୋର୍ଟଙ୍କୁ କେନ୍ଦ୍ରର ଜବାବ, ନ୍ୟାୟପାଳିକା କରିପାରିବେନି ହସ୍ତକ୍ଷେପ
କନକ ବ୍ୟୁରୋ : ଦେଶର ମୁଖ୍ୟ ନିର୍ବାଚନ କମିଶନ ଓ ନିର୍ବାଚନ କମିଶନ ନିଯୁକ୍ତିକୁ ନେଇ ମୁହାଁମୁହିଁ ପରିସ୍ଥତିରେ ସରକାର ଏବଂ ସୁପ୍ରିମକୋର୍ଟ୍ । ନିର୍ବାଚନ କମିଶନ ନିଯୁକ୍ତି ପ୍ରକିୟା ଉପରେ ସୁପ୍ରିମକୋର୍ଟ ପ୍ରଶ୍ନ ଉଠାଇବା ପରେ ଏହାର କଡ଼ା ଜବାବ ରଖିଛନ୍ତି କେନ୍ଦ୍ର ସରକାର । ସମ୍ବିଧାନର ନିୟମ ଅନୁସାରେ ସ୍ୱଚ୍ଛ ପ୍ରକ୍ରିୟାରେ ସିଇସି ଓ ଇସି ନିଯୁକ୍ତ କରାଯାଉଛି ବୋଲି ସରକାରଙ୍କ ପକ୍ଷରୁ ଗୁରୁବାର ଅଟର୍ଣ୍ଣି ଜେନେରାଲ ଆର ଭେଙ୍କଟରମଣି ସୁପ୍ରିମକୋର୍ଟର ଖଣ୍ଡପୀଠକୁ ଜଣାଇଛନ୍ତି । ନିଯୁକ୍ତି ପ୍ରକ୍ରିୟାରେ ନ୍ୟାୟପାଳିକା ହସ୍ତକ୍ଷେପ କରିବା ଆବଶ୍ୟକ ନାହିଁ । ଏଥିରେ ହସ୍ତକ୍ଷେପ କରିବା ପ୍ରତାରଣା ସହ ସମାନ । ଏହା ସମ୍ବିଧାନ ପାୱାର ବଂଟନର ଉଲଙ୍ଘନ ବୋଲି ଭେଙ୍କଟ ରମଣ ଜବାବରେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଭଳି ଜବାବ ଦେବା ସହ ଆଟର୍ଣ୍ଣି ଜେନେରାଲ କହିଛନ୍ତି, ଯଦି କୌଣସି ଅଯୋଗ୍ୟ ବ୍ୟକ୍ତି ସିଇସି ନିଯୁକ୍ତ ହେଉଛନ୍ତି ତେବେ ସୁପ୍ରିମକୋର୍ଟ ଏହାକୁ ରଦ୍ଦ କରିପାରିବେ । ହେଲେ ନିର୍ବାଚନ କମିଶନ ଚୟନ ପ୍ରକ୍ରିୟାରେ ହସ୍ତକ୍ଷେପ କରିବା ଉଚିତ ନୁହେଁ ।
ସୁପ୍ରିମକୋର୍ଟର ୫ ଜଣ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ୪ ଦିନର ମାରାଥନ ଶୁଣାଣି ପରେ ଗୁରୁବାର କହିଛନ୍ତି, ଗୋଟିଏ ଦିନର ପ୍ରକ୍ରିୟା, ଗୋଟିଏ ଦିନରେ ମଞ୍ଜୁରୀ, ଗୋଟିଏ ଦିନରେ ଦରଖାସ୍ତ ଏବଂ ସମାନ ଦିନରେ ମୁଖ୍ୟ ନିର୍ବାଚନ କମିଶନ ନିଯୁକ୍ତ କରାଯାଉଛି । ନିଯୁକ୍ତିର ସମ୍ପୂର୍ଣ୍ଣ ପ୍ରକ୍ରିୟାକୁ ୨୪ ଘଂଟା ବି ଲାଗୁନି ବୋଲି କ୍ଷୋଭ ପ୍ରକାଶ କରିଥିଲେ ସୁପ୍ରିମକୋର୍ଟ । ବିଜୁଳି ବେଗରେ ସିଇସି ନିଯୁକ୍ତ କରାଯାଉଛି । କେଉଁ ଆଧାରରେ ଆଇନ ମନ୍ତ୍ରୀ ୪ ଜଣଙ୍କ ନାମ ଚୟନ କରୁଛନ୍ତି ଏବଂ ପ୍ରଧାନମନ୍ତ୍ରୀ ସେମାନଙ୍କ ମଧ୍ୟରୁ ସବୁଠୁ କନିଷ୍ଠଙ୍କୁ ସିଇସି ଭାବେ ବାଛୁଛନ୍ତି । ସେହି ୪ ଜଣ ଅଧିକାରୀ ଖାଲି ହଁ ମାରୁଥିବା ବ୍ୟକ୍ତି କି ବୋଲି ପ୍ରଶ୍ନ କରିଛନ୍ତି ବିଚାରପତି ଜଷ୍ଟିସ୍ ରାସ୍ତୋଗୀ ।
ନିର୍ବାଚନ ଆୟୋଗଙ୍କୁ ରାଜନୈତିକ ଚାପରୁ ମୁକ୍ତ ରଖିବା ପାଇଁ ହୋଇଥିବା ପିଟିସନର ଶୁଣାଣି କରିଥିଲେ ସୁପ୍ରିମକୋର୍ଟ । ଶୁଣାଣି ସମୟରେ ସୁପ୍ରିମକୋର୍ଟ କହିଥିଲେ ପ୍ରଧାନମନ୍ତ୍ରୀଙ୍କ ବିରୋଧରେ ପଦକ୍ଷେପ ନେବା ପାଇଁ ସିଇସିଙ୍କ ପାଖରେ ଯଦି କ୍ଷମତା ନଥିବ, ତେବେ ଦେଶର ଗଣତାନ୍ତ୍ରିକ ବ୍ୟବସ୍ଥା ସମ୍ପୁର୍ଣ୍ଣ ଭୁଷୁଡି ପଡିବ ।