ସାଂସଦ ଓ ବିଧାୟକମାନେ ସଂପୃକ୍ତ ଥିବା ମାମଲାକୁ ନେଇ ଇଡି ଓ ସିବିଆଇକୁ ସୁପ୍ରିମକୋର୍ଟଙ୍କ ଭର୍ତ୍ସନା। କହିଲେ, ମାମଲା ପକାଇ ନ ରଖି ତୁରନ୍ତ ଦାଖଲ କର ଚାର୍ଜସିଟ୍
କନକ ବ୍ୟୁରୋ : ସାଂସଦ ଓ ବିଧାୟକମାନେ ସଂପୃକ୍ତ ଥିବା ମାମଲାଗୁଡିକର ଚାର୍ଜସିଟ ଦାଖଲରେ ବିଳମ୍ବ ହେଉଥିବାରୁ ସୁପ୍ରିମକୋର୍ଟର ମୁଖ୍ୟ ବିଚାରପତି ଏନ୍.ଭି ରମନ୍ନା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଓ ସେଣ୍ଟ୍ରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ(ସିବିଆଇ) କୁ ଭର୍ତ୍ସନା କରିଛନ୍ତି । କୋର୍ଟ କହିଛନ୍ତି କି ଯଦିବା ତଦନ୍ତରେ କିଛି ବାକି ରହିଛି,ତେବେ ମାମଲା ପକାଇ ନ ରଖି ତୁରନ୍ତ ଚାର୍ଜସିଟ ଦାଖଲ କର ।
Kanak News is now on WhatsApp
Join and get latest news updates delivered to you via WhatsApp
ଆଜିର ଏହି ଶୁଣାଣିରେ ସେ ଆହୁରି ମଧ୍ୟ କହିଲେ, ସାଂସଦ ଏବଂ ବିଧାୟକ ସଂଶ୍ଳୀଷ୍ଟ ଥାଇପଡ଼ି ରହିଥିବା ମାମଲାଗୁଡ଼ିକୁ ଅନୁଧ୍ୟାନ କରି ଆପଣାଛାଏଁ ମାମଲା ରୁଜୁ କରିବା ଲାଗି ପୂର୍ବ ଆଦେଶରେ ମଧ୍ୟ ଆମ୍ଭେ ଉଚ୍ଚ ନ୍ୟାୟାଳୟମାନଙ୍କୁ କହିଛୁ।
ପ୍ରବର୍ତ୍ତନ ନିର୍ଦେଶାଳୟ ଏବଂ ଅନ୍ୟ ଏଜେନ୍ସିମାନଙ୍କୁ ଉଦ୍ଦେଶ୍ୟ କରି ଭାରତର ପ୍ରଧାନ ବିଚାରପତି ରମଣା କହିଲେ, ଏହି ରିପୋର୍ଟ ଖୁବ୍ ଅସ୍ପଷ୍ଟ। ୧୦-୧୫ ବର୍ଷ ହେବ ଚାର୍ଜସିଟ୍ କିଂବା କିଛି ଫାଇଲ୍ ନ ହେବାର କାରଣ ଦର୍ଶାଯାଇ ନାହିଁ। ୨୦୦ କୋପଟି ଟଙ୍କା ମୂଲ୍ୟର ସମ୍ପତ୍ତି ‘ଆଟାଚ୍’ କରି ନ ଥିବାର କୌଣସି ମାମଲା ନାହିଁ, କିନ୍ତୁ ଅଦ୍ୟବଧି କିଛି ‘ଫାଇଲ୍’ କରାଯାଇ ନାହିଁ। ନିର୍ଦ୍ଦିଷ୍ଟ ଭାବେ ‘ପ୍ରବର୍ତ୍ତନ ନିର୍ଦେଶାଳୟ’ କିଛି କରୁନାହିଁ।
ପ୍ରଧାନ ବିଚାରପତି ରମଣାଙ୍କ ବିବୃତିର ପ୍ରତ୍ୟୁତ୍ତର ଦେଇ ସଲିସିଟର୍ ଜେନେରାଲ୍ କହିଲେ, କେତେକ ମାମଲା ଅଛି ଯାହା ଉପରେ ବିଚାର କିଂବା ତଦନ୍ତ ଚାଲିଛି ଏବଂ ଅଦାଲତ ରହିତାଦେଶ ଜାରି କରିଛନ୍ତି। ମାତ୍ର, ରହିତାଦେଶ ଜାରି ହୋଇଥିଲେ ଚାର୍ଜସିଟ୍ ଫାଇଲ୍ କରାଯିବାରେ ବିଳମ୍ବ ହେବା ପ୍ରସଙ୍ଗକୁ ସେ ଯଥାର୍ଥ ମଣୁ ନ ଥିବା କହିଥିଲେ।
କିନ୍ତୁ, ପ୍ରଧାନ ବିଚାରପତି ସଲିସିଟର୍ ଜେନେରାଲ୍ଙ୍କ ଦାବିକୁ ଅଗ୍ରାହ୍ୟ କରି କହିଛନ୍ତି, ସେ କଥା ଅସତ୍ୟ। ପ୍ରାୟ ୨୦୦ ମାମଲାରୁ ୮ଟି ମାମଲା ଉପରେ ଅଦାଲତ ରହିତାଦେଶ ଜାରି କରିଛନ୍ତି।
ତେଣୁ, ଏ ସଂକ୍ରାନ୍ତରେ ‘ଇଡି’ ଏବଂ ‘ସିବିଆଇ’ ନିର୍ଦେଶକଙ୍କ ସହ ଆଲୋଚନା କରିବା ଲାଗି ସମ୍ପ୍ରତି ସୁପ୍ରିମ୍ କୋର୍ଟ ସଲିସିଟର୍ ଜେନେରାଲ୍ଙ୍କୁ କହିଛନ୍ତି। ଏହାଛଡ଼ା, କାର୍ଯ୍ୟଭାର ଅଧିକ ଥିବାରୁ ସେମାନେ କୌଣସି ପ୍ରକାର ମାନବ ସମ୍ବଳ ବା ଭିତ୍ତିଭୂମିଗତ ସମସ୍ୟାର ସମ୍ମୁଖୀନ ହେଉଛନ୍ତି କି, ନାହିଁ ସେଥିପ୍ରତି ମଧ୍ୟ ଧ୍ୟାନ ଦେବାକୁ ସୁପ୍ରିମ୍ କୋର୍ଟ ତାଙ୍କୁ କହିଛନ୍ତି।