ସୋମବାର ସୁପ୍ରିମକୋର୍ଟରେ ଶ୍ରୀମନ୍ଦିର ସଂସ୍କାର ମାମଲାର ଶୁଣାଣି ହେବ। ଜଷ୍ଟିସ୍ ଏସ.ଏ.ବୋଦେ ଏବଂ ଜଷ୍ଟିସ୍ ଅବଦୁଲ ନଜିରଙ୍କୁ ନେଇ ଗଠିତ ଦୁଇ ଜଣିଆ ଖଣ୍ଡପୀଠ ଏହାର ଶୁଣାଣି କରିବେ। ଶୁଣାଣି କାଳରେ ପୁରୀ ହିଂସାକାଣ୍ଡ ପ୍ରସଙ୍ଗ ଉଠିବାର ସମ୍ଭାବନା ରହିଛି। ଏ ନେଇ ଶ୍ରୀମନ୍ଦିର ପ୍ରଶାସନ ସତ୍ୟପାଠ ଦାଖଲ କରିଥିବା ବେଳେ ଆମିକସ୍ କ୍ୟୁରି ତାଙ୍କ ରିପୋର୍ଟରେ ହିଂସା ସୃଷ୍ଟିକାରୀଙ୍କଠାରୁ ୪୫ ଲକ୍ଷ ଟଙ୍କା କ୍ଷତିଭରଣା କରିବାକୁ ଆବେଦନ କରିଛନ୍ତି। ଶୁଣାଣି ସମୟରେ ୯ ଇଣ୍ଟରଭେନର୍ ତାଙ୍କର ପକ୍ଷ ରଖିବାକୁ ତାଲିକାଭୁକ୍ତ ହୋଇଛନ୍ତି।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ସେମାନେ ଜବାବ୍ ଦେବାକୁ ସକ୍ଷମ ହେବେ ନାହିଁ ବୋଲି ସୂଚନା ମିଳିଛି। ଅନ୍ୟପକ୍ଷରେ ପୁରୀ ଶଙ୍କରାଚାର୍ୟ୍ୟ, ଇଣ୍ଡିକ୍ କଲେକ୍ଟିଭ୍ ଟ୍ରଷ୍ଟ, ହିନ୍ଦୁ ଧର୍ମାଚାର୍ୟ୍ୟ ସଭା ଟ୍ରଷ୍ଟ ଓ ଗୌରଶଙ୍କର ସିଂହାରୀଙ୍କ ଆବେଦନ ତାଲିକାଭୁକ୍ତ ହୋଇନଥିବା ଜଣାପଡ଼ିଛି। ଆସନ୍ତାକାଲି ଇଣ୍ଟରଭେନର୍ ହୋଇଥିବା ଶ୍ରୀମନ୍ଦିର ପ୍ରତିହାରୀ ନିଯୋଗ, ଇଣ୍ଟର କଣ୍ଟିନେଣ୍ଟାଲ୍ ଆସୋସିଏସନ୍ ଅଫ୍ ଲୟର୍ସ, ଭିତର ସେବାୟତ ନିଯୋଗ, ସୁଆରବଡ଼ୁ ଓ ପତ୍ରୀବଡ଼ୁ ନିଯୋଗ, ସୁଆରମହାସୁଆର ନିଯୋଗ, ଖୁଣ୍ଟିଆ ନିଯୋଗ, ଚୂନରା ଗରୁଡ଼ ସେବକ ନିଯୋଗ, ମେକାପ ନିଯୋଗ ଓ ପୂଜାପଣ୍ଡା ନିଯୋଗ ପକ୍ଷରୁ ଜବାବ୍ ଦାଖଲ କରାଯିବ। ହେଲେ ଏହି ସବୁ ନିଯୋଗ ଏ ପର୍ୟ୍ୟନ୍ତ ଜବାବ୍ ପ୍ରସ୍ତୁତ କରିପାରିନାହାନ୍ତି। ତେବେ ଆସନ୍ତାକାଲି ଶୁଣାଣିରୁ କିଛି ନିର୍ଣ୍ଣାୟକ ନିଷ୍ପତ୍ତି ମିଳିପାରେ ବୋଲି ଆଶା କରାଯାଉଛି।