କନକ ବ୍ୟୁରୋ : ପ୍ରଧାନମନ୍ତ୍ରୀଙ୍କ ସୁରକ୍ଷାରେ ତ୍ରୁଟି ମାମଲାରେ ଆଜି ସୁପ୍ରିମକୋର୍ଟରେ ଶୁଣାଣି ହୋଇଛି । ଆଉ ଏହି ମାମଲାର ଗୁରୁତ୍ୱକୁ ବୁଝିବା ସହ ସର୍ବୋଚ୍ଚ ନ୍ୟାୟାଳୟ ଏକ ତଦନ୍ତ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟର ପୂର୍ବତନ ବିଚାରପତିଙ୍କ ଅଧ୍ୟକ୍ଷତାରେ ଏକ ତଦନ୍ତ କମିଟି ଗଠନ କରାଯିବ । ଯେଉଁ କମିଟିରେ ଚଣ୍ଡିଗଡ ଡିଜିପି, ଏନଆଇଏ ଆଇଜି, ପଞ୍ଜାବ ଓ ହରିୟାଣା ହାଇକୋର୍ଟର ରେଜିଷ୍ଟାର ଜେନେରାଲ, ଆଇବିର ଅଧିକାରୀ, ଗୁଇନ୍ଦା ବିଭାଗର ଅତିରିକ୍ତ ମହାନିର୍ଦ୍ଦେଶକ ଏହି କମିଟିର ସଦସ୍ୟ ରହିବେ । ତେବେ ଉଭୟ ପଞ୍ଜାବ ଓ କେନ୍ଦ୍ର ସରକାରଙ୍କ ପକ୍ଷରୁ ଗଠନ ହୋଇଥିବା କମିଟି ଉପରେ ରୋକ ଲଗାଇଛନ୍ତି ସୁପ୍ରିମକୋର୍ଟ ।

Advertisment

ଗତ ଜାନୁଆରୀ ୫ ତାରିଖରେ ପଞ୍ଜାବର ଫିରୋଜପୁର ଠାରେ ପ୍ରଧାନମନ୍ତ୍ରୀଙ୍କ କାରକେଡକୁ ଅଟକାଯାଇଥିଲା । ପ୍ରଦର୍ଶନକାରୀ ରାସ୍ତା ଅବରୋଧ କରିଥିବାରୁ ଫ୍ଲାଏଓଭର ଉପରେ ଅଟକି ରହିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପ୍ରାୟ ୧୫ରୁ ୨୦ ମିନିଟ୍ ଧରି ଫ୍ଲାଏଓଭର ଉପରେ ଅଟକି ରହିବା ପରେ ପ୍ରଧାନମନ୍ତ୍ରୀ ସଭାସ୍ଥଳକୁ ନ ଯାଇ ସିଧାସଳଖ ଭଟିଣ୍ଡା ବିମାନବନ୍ଦରକୁ ଫେରି ଆସିଥିଲେ । ଏପରିକି ତମ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେବ ଯେ, ମୁଁ ଜୀବନ ନେଇ ବିମାନବନ୍ଦରକୁ ଫେରିପାରିଛି ବୋଲି ମୋଦୀ ବିମାନବନ୍ଦର ଅଧିକାରୀଙ୍କୁ କହିଥିଲେ । ଆଉ ଏହାପରେ ଏହି ମାମଲାକୁ ନେଇ ରାଜନୀତି ସରଗରମ ହୋଇଥିଲା । ବିଜେପି ଏହି ଘଟଣା ପାଇଁ ପଞ୍ଜାବର ଚନ୍ନି ସରକାରଙ୍କୁ ସିଧାସଳଖ ଦାୟୀ କରିଥିବା ବେଳେ କଂଗ୍ରେସ କହିଥିଲା ଯେ, ପ୍ରଧାନମନ୍ତ୍ରୀଙ୍କ ସୁରକ୍ଷାରେ କୌଣସି ତ୍ରୁଟି ହୋଇନାହିଁ ।

ତେବେ ଏହି ଘଟଣା ପରେ ଗୃହ ମନ୍ତ୍ରାଳୟ ପଞ୍ଜାବ ସରକାରଙ୍କୁ ଏ ବାବଦରେ ରିପୋର୍ଟ ମାଗିଥିଲେ । ପଞ୍ଜାବ ସରକାରଙ୍କ ପକ୍ଷରୁ ଏନେଇ ଏକ କମିଟି ଗଠନ କରାଯାଇ ଯାଞ୍ଚ ଆରମ୍ଭ ହୋଇଥିଲା । ଏପରିକି ପ୍ରଧାନମନ୍ତ୍ରୀଙ୍କ ସୁରକ୍ଷାରେ କୌଣସି ତ୍ରୁଟି ହୋଇନଥିବା ବାରମ୍ବାର କହି ଆସୁଥିଲେ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚନ୍ନି ।

ଆଜି ଏହି ମାମଲାରେ ସୁପ୍ରିମକୋର୍ଟରେ ଶୁଣାଣି ହୋଇଥିଲା । ଭିଭିଆଇପିଙ୍କ ସୁରକ୍ଷାରେ ସାମାନ୍ୟତମ ତ୍ରୁଟି ଗମ୍ଭୀର ହୋଇପାରେ ବୋଲି କେନ୍ଦ୍ର ପକ୍ଷରୁ ସଲିସେଟର ଜେନେରାଲ କୋର୍ଟକୁ କହିଥିଲେ ।ପଞ୍ଜାବ ସରକାର ନିଜ ଅଧିକାରୀଙ୍କ ଦୋଷ ଲୁଚାଇବାକୁ ପ୍ରୟାସ କରୁଛନ୍ତି । ଏହି ପ୍ରସଙ୍ଗରେ ସୁପ୍ରିମକୋର୍ଟ କହିଥିଲେ, ଆପଣ ତ ପୂର୍ବରୁ ସବୁ ସ୍ଥିର କରି ଆସିଛନ୍ତି । ତେବେ କୋର୍ଟକୁ କାହିଁକି ଆସୁଥିଲେ?