ଭୋଟ ଗ୍ରହଣ ପୂର୍ବରୁ ମହାମେଣ୍ଟର ପ୍ରାର୍ଥୀ ଫେରାର । କାହାକୁ କରିବେ ଭୋଟ, ଚିନ୍ତାରେ ପଡିଲେ ସମର୍ଥକ?
ଆସନ୍ତା ୧୯ ତାରିଖରେ ସପ୍ତମ ତଥା ଶେଷ ପର୍ଯ୍ୟାୟ ନିର୍ବାଚନ ପାଇଁ ଭୋଟଗ୍ରହଣ ହେବ । ଏହି ପର୍ଯ୍ୟାୟରେ ଉତ୍ତର ପ୍ରଦେଶର ଘୋଷୀ ଆସନ ପାଇଁ ମଧ୍ୟ ଭୋଟଗ୍ରହଣ ହେବ । କିନ୍ତୁ ଭୋଟଗ୍ରହଣ ପୂର୍ବରୁ ଏଠିକାର ଜନତା ଦ୍ୱନ୍ଦରେ ପଡିଛନ୍ତିି । କାରଣ ଭୋଟଗ୍ରହଣକୁ ଆହୁରି ୬ ଦିନ ବାକି ଥିଲେ ମଧ୍ୟ ଏଠାରୁ ଏସପି-ବିଏସପିରୁ ପ୍ରାର୍ଥୀ ହୋଇଥିବା ଅତୁଲ ରାୟ ଗାୟବ ହୋଇ ଯାଇଛନ୍ତି । ଯାହାକୁ ନେଇ ଏସପି-ବିଏସପି ସମର୍ଥକ ଚିନ୍ତାରେ ପଡି ଯାଇଛନ୍ତି । ଯାହାକୁ ସେମାନେ ଭୋଟ ଦେବେ ବୋଲି ଭାବୁଥିଲେ ସେ ନିଖୋଜ ହେବା ପରେ କାହାକୁ ଭୋଟ ଦେବେ ତାହାକୁ ନେଇ ମାନସମନ୍ଥନ ଚାଲିଛି । ତେବେ ଭୋଟଗ୍ରହଣ ପୂର୍ବରୁ ଅତୁଲ କାହିଁକି ନିଖୋଜ ହେଲେ ତାହାକୁ ନେଇ ରାଜନୀତି ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ମହାମେଣ୍ଟରୁ ପ୍ରାର୍ଥୀ ହୋଇଥିବା ଅତୁଲଙ୍କ ବିରୋଧରେ ଦୁଷ୍କର୍ମ ଅଭିଯୋଗ ଆସିବା ପରେ ଗିରଫରୁ ବଞ୍ଚିବା ପାଇଁ ଫେରାର ହୋଇଯାଇଛନ୍ତି । ବାରଣାସୀର ଜଣେ ଛାତ୍ରୀ ଅତୁଲଙ୍କ ବିରୋଧରେ ଏଭଳି ସଙ୍ଗୀନ ଅଭିଯୋଗ ଆଣିଛନ୍ତି । ଛାତ୍ରଙ୍କ ଅଭିଯୋଗ ଅନୁଯାୟୀ, ଅତୁଲ ନିଜ ପତ୍ନୀଙ୍କ ସହ ତାଙ୍କୁ ଭେଟ କରାଇବା ପାଇଁ ଘରକୁ ନେଇଥିଲେ । ଯେଉଁଠାରେ ତାଙ୍କ ସହ ଦୁଷ୍କର୍ମ କରିଥିଲେ ଅତୁଲ । କିନ୍ତୁ ଏଭଳି ଅଭିଯୋଗକୁ ଅତୁଲ ଖଣ୍ଡନ କରୁଥିଲେ ମଧ୍ୟ ତାଙ୍କ ନାଁରେ ଗତ ୧ ତାରିଖରେ ମାମଲା ରୁଜୁ କରାଯାଇଥିଲା । ଏପରିକି ଏଭଳି ଗମ୍ଭୀର ମାମଲା ପାଇଁ ଅତୁଲଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରାଯାଇଥିଲା ।
ଗିରଫରୁ ବଞ୍ଚିବା ପାଇଁ ହାଇକୋର୍ଟର କବାଟ ଠକ୍ ଠକ୍ କରିଥିଲେ ଅତୁଲ । କିନ୍ତୁ ହାଇକୋର୍ଟ ପକ୍ଷରୁ ମଧ୍ୟ ତାଙ୍କୁ ନିରାଶ ହେବାକୁ ପଡିଥିଲା । ଆଉ ଏହାପରେ ପ୍ରଚାର ଅଧାରୁ ଫେରାର ହୋଇ ଯାଇଥିଲେ ଅତୁଲ । ଏହି ମାମଲାକୁ ଏବେ ନିର୍ବାଚନ ମୁଦ୍ଦା କରିଛି ବିଜେପି । ଏହି ଆସନରୁ ଅତୁଲଙ୍କ ବିରୋଧରେ ବିଜେପିର ପ୍ରାର୍ଥୀ ଭାବେ ନିର୍ବାଚନ ଲଢୁଛନ୍ତି ହରିନାରାୟଣ ରାଜଭର । ଏହି ମାମଲାକୁ ମୁଦ୍ଦା କରି ଜୋରଦାର ପ୍ରଚାର କରୁଛି ବିଜେପି । ଯାହା ଏବେ ମହାମେଣ୍ଟ ପାଇଁ ଅଡୁଆ ସ୍ଥିତି ସୃଷ୍ଟି କରିଛି । ଏପରିକି ମହାମେଣ୍ଟର ସମର୍ଥକ ମଧ୍ୟ କାହାକୁ ଭୋଟ ଦେବେ ତାହାକୁ ନେଇ ଚିନ୍ତାରେ ପଡି ଯାଇଛନ୍ତି ।