କନକ ବ୍ୟୁରୋ: ତାଙ୍କ ବୋଲିଂ ଷ୍ଟାଇଲ ଆଉ ସ୍ପିନ ପରିଚିତ କରାଇଛି । ଆଇପିଏଲ ଇତିହାସର ସଫଳ ବୋଲରମାନଙ୍କ ମଧ୍ୟରେ ଜଣେ ହେଉଛନ୍ତି ସୁନୀଲ ନାରିନ । ଆଉ ଏଥର ଆଇପିଏଲରେ ତାଙ୍କ ଉପରେ ନଜର ରହିବ । କାରଣ ଆଇପିଏଲ ଆରମ୍ଭ ହେବାର କିଛିଦିନ ପୂର୍ବରୁ ସେ ତାଙ୍କ ଜଲୱା ଦେଖାଇଛନ୍ତି । ସେ ଏକ ଟୁର୍ଣ୍ଣାମେଣ୍ଟରେ ୭ ଓଭର ବୋଲିଂ କରି ସବୁ ଯାକ ମେଡେନ ନେଇଥିଲେ । ଆଉ ଏଥିରେ ସେ ୭ ୱିକେଟ ମଧ୍ୟ ନେଇଥିଲେ । ୱେଷ୍ଟଇଣ୍ଡିଜରେ ଖେଳାଯାଉଥିବା ଏକ ଲୋକାଲ ଟୁର୍ଣ୍ଣାମେଣ୍ଟରେ ଏହି କାରନାମା କରିଛନ୍ତି ସୁନୀଲ ନାରିନ ।
Kanak News is now on WhatsApp
Join and get latest news updates delivered to you via WhatsApp
କ୍ୱିନ୍ସ ପାର୍କ କ୍ରିକେଟ କ୍ଲବର ତରଫରୁ ଖେଳି ସୁନିଲ ନାରିନ କ୍ଲାର୍କ ରୋଡ ୟୁନାଇଟେଡ ବିପକ୍ଷରେ ନିଜ ଆକ୍ରାଣାତ୍ମକ ରୂପ ଦେଖାଇଛନ୍ତି । ତାଙ୍କର ଏହି ଦୁର୍ଦ୍ଦଶ ବୋଲିଂ ଯୋଗୁଁ ବିପକ୍ଷ ଦଳ ମାତ୍ର ୭୬ ରନରେ ଅଲଆଉଟ ହୋଇଯାଇଥିଲା । ଗୋଟିଏ ବି ରନ ନଦେଇ ସୁନୀଲ ନାରିନ ୭ ୱିକେଟ ନେଇଥିଲେ । ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ନାରିନଙ୍କ ବ୍ୟତୀତ ସନ୍ ହେକଲେଟ୍ ୧୮ ରନ ଦେଇ ୨ ୱିକେଟ ନେଇଥିଲେ । କ୍ଲାର୍କ ରୋଡ ତରଫରୁ ସର୍ବାଧିକ ରନ କରିଥିବା ବ୍ୟାଟ୍ସମ୍ୟାନଙ୍କ ସ୍କୋର ୨୧ ରନ ଥିଲା । ଏହି ମ୍ୟାଚରେ କ୍ୱିନ୍ସ ପାର୍କ ୩ ୱିକେଟ ହରାଇ ୨୬୮ ରନ କରିଥିଲା ।
୩୪ ବର୍ଷିୟ ସୁନୀଲ ନାରିନଙ୍କୁ ଆଇପିଏଲର ମିଷ୍ଟ୍ରି ବୋଲର ବୋଲି କୁହାଯାଏ । ସେ ଏବେ ଯାଏଁ ନିଜ ଆଇପିଏଲ କ୍ୟାରିୟରରେ ୧୪୮ ମ୍ୟାଚ ଖେଳିଛନ୍ତି । ଆଉ ଏଥିରେ ସେ ୧୫୨ ୱିକେଟ ନେବାରେ ସଫଳ ହୋଇଛନ୍ତି । ନାରିନ ୭ ଥର ୪ ୱିକେଟ ଓ ଥରେ ୫ ୱିକେଟ ନେଇ ନିଜକୁ ସଫଳ ସାବ୍ୟସ୍ତ କରିଛନ୍ତି । ସେ କୋଲକାତା ନାଇଟ ରାଇଡର ପକ୍ଷରୁ ଆଇପିଏଲରେ ଡେବ୍ୟୁ କରିଥିଲେ । ଆଉ ଏବେ ଯାଏଁ ସେ ଗୋଟିଏ ଦଳ ପାଇଁ ଖେଳିଆସୁଛନ୍ତି ।
ଯଦି ଇଣ୍ଟରନ୍ୟାସନାଲ କ୍ୟାରିୟର କଥା ଦେଖିବା ତେବେ ନାରିନ ୱେଷ୍ଟଇଣ୍ଡିଜ ପାଇଁ ୬ ଟେଷ୍ଟ ମ୍ୟାଚ ଖେଳି ୨୧ ୱିକେଟ ନେଇଛନ୍ତି । ସେହିପରି ୬୫ ଦିନିକିଆରେ ୯୨ ୱିକେଟ ଓ ଟି-୨୦ରେ ୫୨ ୱିକେଟ ନେଇଛନ୍ତି । ଆଇପିଏଲ ୨୦୨୩ରେ ସେ ସେହି କୋଲକାତା ନାଇଟ ରାଇଡର୍ସ ପକ୍ଷରୁ ଖେଳୁଥିବାର ନଜର ଆସିବେ । ଆଉ ସେଥିପାଇଁ ବର୍ତ୍ତମାନର ତାଙ୍କର ଏହି ବିରଳ ରେକର୍ଡକୁ ନେଇ ସେ ଚର୍ଚ୍ଚାରେ ରହିଛନ୍ତି । ଆଉ ଫ୍ୟାନମାନଙ୍କ ଆଶା ରହିଛି ନାରିନ କୋଲକାତା ପାଇଁ ଏଭଳି ପ୍ରଦର୍ଶନ କରନ୍ତୁ ବୋଲି ।