ଚାଷୀଙ୍କୁ ତୈଳବୀଜ ଚାଷ ପାଇଁ ପ୍ରୋତ୍ସାହନ ଦେଉଛି କୃଷି ବିଭାଗ, ଏକର ଏକର ଜମି ସୂର୍ଯ୍ୟମୁଖୀ ଚାଷକରି ସ୍ୱାବଲମ୍ବୀ ହେଉଛନ୍ତି ଧରାକୋଟ ବ୍ଲକର ଚାଷୀ

କନକ ବ୍ୟୁରୋ : ପୂର୍ବରୁ ଚାଷୀମାନେ ଧାନ ଓ ମାଣ୍ଡିଆ ଚାଷ ସହ ସୂର୍ଯ୍ୟମୁଖୀ, ରାଶି, ସୋରିଷ, ବାଦାମ ଭଳି ଅନେକ ତୈଳବୀଜ ଚାଷ କରୁଥିଲେ । ଏହାଦ୍ୱାରା ସେମାନେ ସୁଦ୍ଧ ତେଲ ପାଇପାରୁଥିଲେ । ଏବେ ଏହି ସବୁ ଚାଷ କମ୍ ପରିମାଣରେ କରୁଛନ୍ତି ଚାଷୀ । ତେଣୁ ଚାଷୀମାନେ କିଭଳି ତୈଳବୀଜ ଜାତୀୟ ଫସଲ କରି ଲାଭବାନ ହୋଇପାରିବେ ସେଥିପାଇଁ ଗଂଜାମ ଜିଲ୍ଲାର ଆସିକା ଓ ଧରାକୋଟ୍ ବ୍ଲକରେ କୃଷି ବିଭାଗ ପକ୍ଷରୁ ପ୍ରୟାସ ଆରମ୍ଭ ହୋଇଛି । ଚଳିତ ବର୍ଷ ଚାଷିଙ୍କୁ ମାଗଣା ବିହନ ଯୋଗାଇ ଦେଇଛି କୃଷି ବିଭାଗ । ଫଳରେ କଣଭାଗ, ଜାହାଡା, ଓଳମ୍ବା ଆଦି ଅନେକ ଗାଁରେ ଚାଷି ସୁର୍ଯ୍ୟମୂଖି ଫୁଲ ଚାଷ କରିଛନ୍ତି । ଏବେ ଅନେକ ଚାଷି ଏହି ତୈଳ ବିଜ ଜାତୀୟ ଫସଲ ଅମଳ କରି ତେଲ ପେଡ଼ି ସାରିଲେଣି । ପାଖାପାଖି ୩ ରୁ ୪ କିଲୋ ସୁର୍ଯ୍ୟମୂଖି ମଞିରୁ ଏକ ଲିଟର ଖାଇବା ତେଲ ବାହାରୁଛି । ଅନ୍ୟପଟେ ଏହି ଚାଷ ଏକ ବ୍ୟୟବହୁଳ ଚାଷ ବୋଲି କହିଛନ୍ତି ଚାଷୀ ।

ସୁର୍ଯ୍ୟମୂଖି ଫୁଲ ଚାଷ ଏକ ଲାଭଦାୟକ ତୈଳ ବିଜ ଜାତୀୟ ଫସଲ । ଖରିପ ଋତୁରେ ଚାଷ କରାଯାଉଥିବା ଏହି ଚାଷ ୩ ମାସ ମଧ୍ୟରେ ଫୁଲ ପାକଳ ହେବା ପରେ ଏହାକୁ କାଟି ଅମଳ କରାଯାଏ । ପରେ ଏହାକୁ ସୁଖାଇ ଏଥିରୁ ମଞି ବାହାର କରିବା ପରେ ତେଲ ଉତ୍ପାଦନ କରାଯାଏ । ଏହି ସୁଦ୍ଧ ତେଲକୁ ବଜାରରେ ୧୫୦ ପ୍ରତି ଲିଟରରେ ବିକ୍ରି କରାଯାଇ ଥାଏ । ଏହି ଚାଷ ପାଇଁ ଅଧିକ ପାଣିର ଆବଶ୍ୟକତା ରହିଛି । ଜଳ ସେଚନର ବ୍ୟବସ୍ଥା ନଥିବାରୁ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି ଚାଷୀ । ଉନ୍ନତ କିସମର ବିହନ ସାଙ୍ଗକୁ ଉଠା କିମ୍ବା ଛିଂଚା ଜଳ ସେଚନର ବ୍ୟବସ୍ଥା କରାଗଲେ ଆଗାମି ବର୍ଷରେ ଏହି ଚାଷ ଅଧିକ ପରିମାଣରେ କରିବେ ବୋଲି ଚାଷି କହିଛନ୍ତି ।

ସୂର୍ଯ୍ୟମୁଖୀ ଏକ ଅର୍ଥକାରୀ ଫସଲ ହୋଇଥିବା ବେଳେ ଚାଷୀମାନେ ଏହି ଚାଷକୁ ଆପଣାଇ ଲାଭବାନ ହୋଇପାରିବେ । ଯାହାକୁ ନେଇ କୃଷି ବିଭାଗ ପକ୍ଷରୁ ଆରମ୍ଭ ହୋଇଛି ପ୍ରୟାସ ।