ଫରେଷ୍ଟ ଅଫିସର ରାତି ଅନିଦ୍ରା, ହେଲେ ଛୁ’ ମାରିଲା ‘ସୁନ୍ଦରୀ’ ! ଟ୍ରାଙ୍କୁଲାଇଜ କଲାବେଳେ ବାଜିଲାନି ନିଶ୍ଚେତକ ଗୁଳି, ଡିଆଁ ମାରି ଜଙ୍ଗଲ ଭିତରକୁ ଚାଲିଗଲା ବାଘୁଣୀ ।
କନକ ବ୍ୟୁରୋ : ବନବିଭାଗର ଅଧିକାରୀ ରାତି ଅନିଦ୍ରା, ସୁନ୍ଦରୀ ଛୁ । ସାତକୋଶିଆରେ ବାଘୁଣୀ ସୁନ୍ଦରୀକୁ କାବୁ କରିବା ପାଇଁ ଡେରା ପକାଇଥିବା ବନବିଭାଗ କର୍ମଚାରୀଙ୍କୁ ନିରାଶ ହେବାକୁ ପଡ଼ିଛି । କାରଣ ଟ୍ରାଙ୍କୁଲାଇଜ୍ କରିବା ପାଇଁ ଯେଉଁ ନିଶ୍ଚେତକ ଗୁଳି ବାଘୁଣୀକୁ ମରାଯାଇଥିଲା, ତାହା ଲକ୍ଷ୍ୟଚ୍ୟୁତ ହୋଇଛି । ଆଉ ଏଭଳି ସ୍ଥିତିରେ କୁମୁରୀ ଅଂଚଳରେ ଘୁରିବୁଲୁଥିବା ବାଘୁଣୀର ଗତିବିଧିକୁ ରେଡିଓ କଲାର ଜରିଆରେ ନଜର ରଖାଯାଇଛି । ଆଉ ଲକ୍ଷ୍ୟ ରଖାଯାଇଛି, ବାଘୁଣୀକୁ କାବୁ କରିବା ପରେ ପୁଣି ଥରେ ଏନକ୍ଲୋଜର ଭିତରକୁ ଆଣିଯିବ ।
Kanak News is now on WhatsApp
Join and get latest news updates delivered to you via WhatsApp
ରକ୍ତମୁଖା ବାଘୁଣୀକୁ ନେଇ ସାତକୋଶିଆ ଅଂଚଳରେ ଯେତେ ଆତଙ୍କ ବଢ଼ୁଛି, ‘ସୁନ୍ଦରୀ’କୁ କାବୁ କରିବା ପାଇଁ ବନ ବିଭାଗ ସେତେ କସରତ କରୁଛି । ଆଉ ଏହି ଘଟଣା ହେଉଛି ଗତକାଲି ରାତିର ଏକ ସାଙ୍କେତିକ ଚିତ୍ର । ଯେତେବେଳେ ବାଘୁଣୀ ସୁନ୍ଦରୀକୁ ଟ୍ରାଙ୍କୁଲାଇଜ୍ କରିବାକୁ ଗଛ ଉପରେ ମଂଚା ବାନ୍ଧି ଜଗି ରହିଥିଲେ ବନବିଭାଗର ବିଶେଷଜ୍ଞ ଟିମ୍ । ହାତରେ ବନ୍ଧୁକ ଧରି ନିଶ୍ଚେତକ ଗୁଳି ସାହାଯ୍ୟରେ ଟ୍ରାଙ୍କୁଲାଇଜ୍ କରିବା ପାଇଁ ପ୍ରସ୍ତୁତ ଥିଲେ ଏକ୍ସପର୍ଟ । ବାଘୁଣୀକୁ ଆକର୍ଷିତ କରିବା ପାଇଁ ରଖାଯାଇଥିଲା ଛେଳି, ଆଉ ଜଙ୍ଗଲ ଭିତରେ କଞ୍ଚା ମାଂସର ବାସ୍ନା ଥିବା ସ୍ପ୍ରେ, ମରାଯାଇଥିଲା । ଆଉ ସାରା ରାତି ଜଗିବା ପରେ ଯେତେବେଳେ ବାଘୁଣୀ ଆସିଥିଲା, ଫେଲ ମାରିଲା ଲକ୍ଷ୍ୟ ।
ଲକ୍ଷ୍ୟଚ୍ୟୁତ ହେଲା ଗୁଳି ଆଉ ଚମ୍ପଟ୍ ମାରିଲା ‘ସୁନ୍ଦରୀ’ । ବାଘୁଣୀ ସୁନ୍ଦରୀ ଯେତେବେଳେ ଜଗି ରହିଥିବା ବନ କର୍ମଚାରୀଙ୍କ ପାଖକୁ ଆସିଥିଲା । ଟ୍ରାଙ୍କୁଲାଇଜ୍ କରିବା ପାଇଁ ନିଶ୍ଚେତକ ଗୁଳି ମାରିଥିଲେ ଟ୍ରାଙ୍କୁଲାଇଜ୍ ଏକ୍ସପର୍ଟ । ହେଲେ ଗୁଳି ବାଘୁଣୀ ଦେହରେ ବାଜିନଥିଲା । ଆଉ ଗୁଳି ଶବ୍ଦ ଶୁଣି ଆଖି ପିଛୁଳାକେ ଚମ୍ପଟ ମାରିଲା ସୁନ୍ଦରୀ ।
ବାଘୁଣୀ ସୁନ୍ଦରୀ, ବର୍ତମାନ କୁମୁରୀ କିମ୍ବା ଏହାର ଆଖପାଖ ଅଂଚଳରେ ଥିବା ଅନୁମାନ କରାଯାଉଥିବା ବେଳେ ରେଡିଓ କଲାର ସାହାର୍ଯ୍ୟରେ ତାର ଗତିବିଧି ଉପରେ ନଜର ରଖାଯାଇଛି । ଆଉ ବାଘୁଣୀକୁ ଟ୍ରାଙ୍କୁଲାଇଜ୍ କରିବା ପାଇଁ ଉଦ୍ୟମ ଜାରି ରହିଛି । ବାଘୁଣୀକୁ ଟ୍ରାଙ୍କୁଲାଇଜ୍ କରିବା ବର୍ତ୍ତମାନ ବନବିଭାଗ ପାଇଁ ଏକ ବଡ ଚ୍ୟାଲେଂଜ୍ ସୃଷ୍ଟି କରିଛି । ଅନ୍ୟପଟେ ବାଘୁଣୀର ଆକ୍ରମଣରେ ଦୁଇ-ଦୁଇ ଜଣଙ୍କ ମୃତ୍ୟୁ ଅଭିଯୋଗକୁ ନେଇ ସ୍ଥାନୀୟ ଅଂଚଳରେ ଆତଙ୍କ ସୃଷ୍ଟି କରିଛି । ଏଭଳି ସ୍ଥିତିରେ ସୁନ୍ଦରୀକୁ କାବୁ କରି ପୁଣି ଥରେ ଏନକ୍ଲୋଜର ଭିତରକୁ ଆଣିବା ଏବେ ବନବିଭାଗ ପାଇଁ ବଡ ଆହ୍ୱାନ୍ ସୃଷ୍ଟି କରିଛି ।