ଚର୍ଚ୍ଚାରେ ହକିର ଏନ୍ତୁଡିଶାଳ ସୁନ୍ଦରଗଡର ସଉନାମୁରା ଗାଁ: ଏଇଠି ଜନ୍ମ ହୋଇଛନ୍ତି ବଡ ବଡ ଖେଳାଳି
କନକ ବ୍ୟୁରୋ: ଯେଉଁମାନେ କୁହନ୍ତି, ବଣର ମଲ୍ଲି ବଣରେ ଫୁଟି ମଳିଯାଏ । ହୁଏତ ସେମାନେ ସୁନ୍ଦରଗଡ଼ର ସୁନା ଗାଁ ସଉନାମରା କାହାଣୀ ଜାଣି ନାହାଁନ୍ତି । କାରଣ, ଏଠି ମଲ୍ଲି ପଲ୍ଲୀରେ ଫୁଟେ ସତ, କିନ୍ତୁ ତା’ର ବାସରେ ସାରା ଭାରତ ଚହଟେ ।
Kanak News is now on WhatsApp
Join and get latest news updates delivered to you via WhatsApp
ଇଏ ହେଉଛି ସେହି ଗାଁ, ଯେଉଁ ଗାଁ ଦାଣ୍ଡରେ ଦିନେ ଦିଲ୍ଲୀପ ତିର୍କୀଙ୍କ ଭଳି ଖେଳାଳି କାଠ ଫାଳିଆ ଧରି ହକି ଖେଳୁଥିଲେ । କେବଳ ଦିଲ୍ଲୀପ କାହିଁକି ଅମିତ ରୋହିଦାସ , ସୁଭଦ୍ରା ପ୍ରଧାନ, ଦୀପସାନ ତିର୍କୀ ଭଳି ଉଦୟମାନଙ୍କ ମୁଳଦୁଆ ଏହି ଗାଁରୁ ପଡ଼ିଥିଲା । ହାତରେ ନା ଥିଲା ଅତ୍ୟାଧୁନିକ ହକି ବାଡି, ନା ଥିଲା ଖେଳିବାକୁ ଆଷ୍ଟ୍ରୋଟର୍ଫ । ହାତ ତିଆରି ବଙ୍କାକାଠ, ବାଉଁଶ ଫାଳିଆ ଧରି ଗାଁ ପଡିଆରେ ସେମାନେ ଶିଖି ଥିଲେ ହକିର କୌଶଳ ।
ହକି ଷ୍ଟାର ଅମିତ ରୋହିଦାସଙ୍କ କାହାଣୀ ବି ଥିଲା ସମାନ । ପିଲାଦିନେ ଅମିତ ଅର୍ଥ ଅଭାବରୁ ହକି ବାଡି କି ବଲ୍ କିଣିବା ସମ୍ଭବ ନଥିବାରୁ ବାଉଁଶବାଉଁଶ ଓ କାଠଫାଳିଆରେ ହକି ଅଭ୍ୟାସ କରୁଥିଲେ । ହେଲେ, ୨୦୦୪ରେ ପାନପୋଷ କ୍ରୀଡା ଛାତ୍ରାବାସରେ ଯୋଗ ଦେବା ପରେ ବଦଳିିଯାଇଥିଲା କାହାଣୀ । ଏମିତି କି ଅଲମ୍ପିକ୍ସ ପଦକ ହାସଲ କରିଥିଲେ ଅମିତ ରୋହିଦାସ ।
ଏସବୁ ଭିତରେ ହକିକୁ ପ୍ରୋତ୍ସାହିତ କରିବା ପାଇଁ ରାଜ୍ୟ ସରକାର ନେଇଥିବା ପଦକ୍ଷେପ, ହକିର ଏନ୍ତୁଡିଶାଳରେ ଏକ ନୂଆ ଉତ୍ସାହ ଆଣି ଦେଇଛି । ସୁନ୍ଦରଗଡ ଜିଲ୍ଲାର ୧୭ଟି ବ୍ଲକରେ ୧୭ଟି ଅଷ୍ଟ୍ରୋଟର୍ଫ ପଡ଼ିିଆ କରିସାରିଛନ୍ତି । ଏବେ ସଉନାମୁରା ପଡିଆରେ ଲାଗିଲାଣି ହକି ଆଷ୍ଟ୍ରୋଟର୍ଫ । ଏଣିକି ଗାଁ ପିଲା ଧୂଳିଦାଣ୍ଡ ଓ ଗୋଡିମାଟି ର ପଡିଆ ଛାଡି ଏହି ଆଷ୍ଟ୍ରୋଟର୍ଫ ରେ ହକି ଅଭ୍ୟାସ କରିବେ ।