କୋଣାର୍କର ‘ବାଲି’ କାହାଣୀ ! ୧୨ ଫୁଟ୍ ଦବି ଯାଇଛି କୋଣାର୍କ ଜଗମୋହନରେ ଥିବା ୧୧୭ ବର୍ଷ ତଳର ବାଲି । ବାଲି କାଢ଼ି ସ୍ଥାପତ୍ୟର ସୁରକ୍ଷା ଦେବାକୁ ଯୋଜନା କରୁଛି ଏଏସ୍ଆଇ । ବିଶେଷଜ୍ଞଙ୍କ ଆଶଙ୍କା, କୋଣାର୍କରୁ ବାଲି କାଢ଼ିବା କେତେ ନିରାପଦ ।
କନକ ବ୍ୟୁରୋ: ସାରା ବିଶ୍ୱକୁ ଐତିହ୍ୟ ଓ ସ୍ଥାପତ୍ୟ କୀର୍ତିରାଜିର ଝଲକ ଦେଖାଇ ଆସୁଥିବା ଏହି ୮୦୦ ବର୍ଷ ପୁରୁଣା କୋଣାର୍କ ସୂର୍ଯ୍ୟ ମନ୍ଦିରର ସ୍ଥାୟିତ୍ୱ ଉପରେ ବିପଦର ବାଦଲ ଛାଇ ରହିଛି । ୧୧୭ ବର୍ଷ ତଳୁ ବାଲିର ଆଧାର ଉପରେ ଛିଡ଼ା ହୋଇଛି ଏହି ମନ୍ଦିରର ଜଗମୋହନ । ଆଉ ଏହି ବାଲି ଏବେ ୧୨ ଫୁଟ ପର୍ଯ୍ୟନ୍ତ ଦବି ଯାଇଥିବା ଆଶଙ୍କା କରାଯାଉଛି । ବାଲି କାଢ଼ି ସ୍ଥାପତ୍ୟକୁ ସୁରକ୍ଷିତ ରଖିବା ପାଇଁ ଅନ୍ୟ ଉପାୟ ଅବଲମ୍ବନ କରିବାକୁ ଚାହୁଁଛି ଏଏସ୍ଆଇ । କୋଣାର୍କର ସଂରକ୍ଷଣ ପାଇଁ ଅନୁଷ୍ଠିତ ୨ ଦିନିଆ କର୍ମଶାଳାରେ ଜଗମୋହନ ଭିତରେ ଥିବା ବାଲି କାଢ଼ିବା ପାଇଁ ପ୍ରସ୍ତାବ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
୧୧୩ ଫୁଟ ଉଚ୍ଚ ଜଗମୋହନର ସୁରକ୍ଷା ପାଇଁ ୧୯୦୩ ମସିହାରେ ବାଲି ଭର୍ତି କରିଥିଲେ ତକ୍ରାଳୀନ ବ୍ରିଟିଶ ସରକାର । ୨୦୧୩ ମସିହାରେ ସେଂଟାଲ ବିଲ୍ଡିଂ ରିସର୍ଚ୍ଚ ଇନଷ୍ଟିଚ୍ୟୁଟ ପକ୍ଷରୁ ଏ ନେଇ ଗବେଷଣା କରାଯାଇଥିଲା । ଆଭ୍ୟନ୍ତର ସ୍ଥଳର ଏଣ୍ଡୋସ୍କୋପି ପରେ ଶୀର୍ଷରୁ ୧୨ ଫୁଟ ପର୍ଯ୍ୟନ୍ତ ବାଲି ଦବି ଯାଇଥିବା କହିଛି ସିବିଆରଆଇ । ଯାହା ସମଗ୍ର ଢ଼ାଂଚା ଉପରେ ଚାପ ସୃଷ୍ଟି କରୁଛି । ଜଗମୋହନରୁ ଅନେକ ପଥର ଖସି ଯାଇଥିବାରୁ କୋଣାର୍କ ପ୍ରତି ଥିବା ବିପଦକୁ ଆହୁରି ବଢ଼ାଇ ଦେଇଛି ।
ବିଶେଷଜ୍ଞଙ୍କ ମତରେ କୋଣାର୍କର ସୁରକ୍ଷା ପାଇଁ ଦୁଇଟି ବିକଳ୍ପ ରହିଛି । ପ୍ରଥମ ବିକଳ୍ପ – ବାଲି କାଢ଼ି ନୂଆ ଉପାୟରେ ଜଗମୋହନକୁ ସୁରକ୍ଷିତ ରଖିବା ଦ୍ୱିତୀୟ ବିକଳ୍ପ – ଖାଲି ସ୍ଥାନରେ ବାଲି ଭର୍ତ୍ତି କରିବା, ଖସିଥିବା ପଥର ବଦଳରେ ନୂଆ ପଥର ଲଗାଇବା ତେବେ ବାଲି ଭର୍ତି କଲେ ଜଗମୋହନର ସୁରକ୍ଷା ଦୀର୍ଘସ୍ଥାୟୀ ହେବ ନାହିଁ ବୋଲି ବିଶେଷଜ୍ଞମାନେ ମତ ଦେଉଛନ୍ତି । ଏପଟେ ଜଗମୋହନରୁ ବାଲି କାଢ଼ିବା ମଧ୍ୟ ଏବେ ସହଜ ନୁହେଁ । ଏପରକି ଏହି ବିଶ୍ୱପ୍ରସିଦ୍ଧ କଳା ସ୍ଥାପତ୍ୟର କ୍ଷତି ଘଟିବା ଆଶଙ୍କା ମଧ୍ୟ ରହିଛି ।