ପଞ୍ଚାୟତ ନିର୍ବାଚନ ପାଇଁ ଦଳୀୟ ଚିହ୍ନ ଥିବା ମାସ୍କର ବଢୁଛି ଚାହିଦା । ସାଲେପୁର ବଜାରରେ ମିଳୁଛି ସୂର୍ଯ୍ୟ, କେଟିଲ, ଷ୍ଟୁଲ, ହାତ, ଶଙ୍ଖ ଚିହ୍ନର ମାସ୍କ
କନକ ବ୍ୟୁରୋ: ଚାଲିଛି ନିର୍ବାଚନୀ ଋତୁ । ଗାଁ ଗାଁ ଜମୁଛି ନିର୍ବାଚନୀ ପ୍ରଚାର । ଆଉ ଏହି ସମୟରେ ନିର୍ବାଚନୀ ଚିହ୍ନର ମାସ୍କକୁ ନେଇ ଲୋକଙ୍କ ଭିତରେ ଚାହିଦା ବଢୁଛି । ବଜାରରେ ରଙ୍ଗ ବେରଙ୍ଗର ମାସ୍କ ଦୋକାନରେ ଲୋକଙ୍କ ଗହଳି ଲାଗୁଛି । ତେବେ ଭଳିକି ଭଳି ମାସ୍କରେ ସଜା ହୋଇଛି ସାଲେପୁର ବଜାରରେ ଥିବା ମାସ୍କ ଦୋକାନ । ପ୍ରାର୍ଥୀ ଓ ସମର୍ଥକ ମାନେ ମାସ୍କ କିଣିବାକୁ ଭିଡ଼ ଜମେଇଛନ୍ତି । ଏହି ମାସ୍କ ସବୁ ନିର୍ବାଚନ ପାଇଁ ସ୍ୱତନ୍ତ୍ର ଭାବେ ତିଆରି ହୋଇଛି । ଶଂଖ, ଫୁଲ, ହାତ, ଛତା, ଖୋଲା ବହି, ନଙ୍ଗଳ, ତାଲାଚାବି ଭଳି ଅନେକ ଚିହ୍ନ ଥିବା ମାସ୍କ ଏବେ ସାଲେପୁର ବଜାରରେ ବିକ୍ରୟ କରାଯାଉଛି । ଭଲ ବ୍ୟବସାୟ ହେଉଥିବାରୁ ଖୁସି ପ୍ରକାଶ କରିଛନ୍ତି ବ୍ୟବସାୟୀ ।
Kanak News is now on WhatsApp
Join and get latest news updates delivered to you via WhatsApp
ୱାର୍ଡ଼ମେମ୍ବର ଠାରୁ ଆରମ୍ଭ କରି ଜିଲ୍ଲା ପରିଷଦ ପର୍ଯ୍ୟନ୍ତ ସମସ୍ତ ଚିହ୍ନ ଥିବା ମାସ୍କ ଦୋକାନ ଗୁଡ଼ିକରେ ମିଳୁଛି । ନିର୍ବାଚନରେ ଲଢେଇ କରୁଥିବା ପ୍ରାର୍ଥୀ, ସେମାନଙ୍କ ସମ୍ପର୍କୀୟ ଏବଂ ସମର୍ଥକ ମାନେ ଏହି ମାସ୍କ କିଣିବା ପାଇଁ ଅର୍ଡ଼ର କରି କିଣି ନେଉଛନ୍ତି । ଦାମ୍ ଏତେ ଅଧିକ ନଥିବାରୁ ଲୋକ ଖୁସିରେ କିଣି ନେଉଛନ୍ତି । ମାସ୍କ ଗୋଟିକର ଦାମ୍ ପାଖାପାଖି ୨୦ ଟଙ୍କା ହୋଇଥିବାବେଳେ ଗ୍ରାହକଙ୍କ ଭିଡ଼ ଲାଗୁଛି ।
ପ୍ରାର୍ଥୀ ମାନେ ନିର୍ବାଚନ ପ୍ରଚାର ପାଇଁ କେଉଁଠି ଡ଼ିଜିଟାଲ ପ୍ରଚାର କରୁଛନ୍ତି ତ ପୁଣି କେଉଁଠି ନିଜ ନିଜ ଦଳୀୟ ଚିହ୍ନ ଥିବା ମାସ୍କ, ପତାକା, ଏବଂ ଶାଢୀ ଦେଇ ଭୋଟରଙ୍କ ମନ କିଣିବାକୁ ଉଦ୍ୟମ ଆରମ୍ଭ କରିଛନ୍ତି । ଏବେ କରୋନା ମହାମାରୀ ପାଇଁ ଲୋକେ ମାସ୍କ ବ୍ୟବହର କରିବା ଲୋକଙ୍କ ପାଇଁ ଆବଶ୍ୟକତା ପଡ଼ୁଛି । ଲୋକେ ଘରୁ ବାହାରିଲେ ଆଗ ମାସ୍କ ବ୍ୟବହାର କରିବାକୁ ଭୁଲୁନାହାନ୍ତି । ତେଣୁ ପ୍ରାର୍ଥୀ ମାନେ ନିଜ ନିଜ ଚିହ୍ନ ଥିବା ମାସ୍କ ଭୋଟର ମାନଙ୍କୁ ବାଂଟୁଛନ୍ତି । ଯାହାଫଳରେ ବ୍ୟବସାୟୀ ମାନେ ଲାଭବାନ ହେଉଥିବା କହିଛନ୍ତି ।