ଦୁର୍ଲଭ ନାଗାର୍ଜୁନ ବେଶ ଦେଖିବାରୁ ବଂଚିତ ହେଲେ ଲକ୍ଷ ଲକ୍ଷ ଭକ୍ତ: ହେଲେ ବେଶ ସମୟରେ ସରକାରୀ ବାବୁଙ୍କ ଭିଡ଼ ନେଇ ଆସିଲା ଅଭିଯୋଗ
ସେପଟେ ଲାଗି ହୋଇଥିବା ସୂର୍ଯ୍ୟ ,ଚନ୍ଦ୍ରକୁ ନେଇଯିବା ପ୍ରସଙ୍ଗରେ ଆରମ୍ଭ ହେଲା ତନାଘନା
କନକ ବ୍ୟୁରୋ: ଶ୍ରୀଜିଉଙ୍କ ଦୁର୍ଲଭ ନାଗାର୍ଜୁନ ବେଶ ଦର୍ଶନକୁ ନେଇ ନୂଆ ବିବାଦ । ଠାକୁରଙ୍କ ଏହି ଦୁର୍ଲଭ ବେଶ ଦର୍ଶନ କରିବାରୁ ବଂଚିତ ହେଲେ ଭକ୍ତ । କିନ୍ତୁ ସରକାରୀ ବାବୁଙ୍କ ପାଇଁ ଶ୍ରୀମନ୍ଦିରର ସାହାଣ ମେଲା ଚାଲିଥିଲା ବୋଲି ଅଭିଯୋଗ ଆସିଛି । ଏନେଇ ପୁରୀ ଜିଲ୍ଲାପାଳ କହିଛନ୍ତି, ପୁରା ଘଟଣାର ତଦନ୍ତ କରାଯିବ । ସେପଟେ ବଡଠାକୁରଙ୍କ ନାଗାର୍ଜୁନ ବେଶରୁ ସୂର୍ଯ୍ୟ,ଚନ୍ଦ୍ର ନେଇଯିବା ପ୍ରସଙ୍ଗରେ ଆରମ୍ଭ ହୋଇଯାଇଛି ତନାଘନା ।
Kanak News is now on WhatsApp
Join and get latest news updates delivered to you via WhatsApp
ନାଗାର୍ଜୁନ ବେଶ ଦେଖିବାରୁ ବଂଚିତ ହେଲେ ଭକ୍ତ, ବେଶ ସମୟରେ ସରକାରୀ ବାବୁଙ୍କ ଭିଡ଼! କରୋନା କଟକଣା ଯୋଗୁଁ ବଡ଼ଠାକୁରଙ୍କ ଦୁର୍ଲଭ ନାଗାର୍ଜୁନ ବେଶ ଦେଖିବାରୁ ବଂଚିତ ହେଲେ ଅଗଣିତ ଜଗନ୍ନାଥ ପ୍ରେମୀ । ହେଲେ ଏବେ ଯେଉଁ ଅଭିଯୋଗ ଆସିଛି, ତାହା ସାଂଘାତିକ । ନାଗାର୍ଜୁନ ବେଶକୁ ସିନା ଭକ୍ତ ଦର୍ଶନ କରି ପାରିଲେନି, ଏବେ ଅଭିଯୋଗ ହୋଇଛି, ବେଶ ସମୟରେ ଶ୍ରୀମନ୍ଦିର ଭିତରକୁ ଅଣସେବାୟତ ପ୍ରବେଶ କରିଛନ୍ତି । ଡ୍ୟୁଟିରେ ନଥିବା ସରକାରୀ ବାବୁଙ୍କ ଭିଡ଼ ଦେଖିବାକୁ ମିଳିଛି । ସତେ ଯେମିତି ସେମାନଙ୍କ ପାଇଁ ଥିଲା ସାହାଣ ମେଲା । ଏପରି ଅଭିଯୋଗ ଆସିବା ପରେ ଏହାର ତଦନ୍ତ କରାଯିବ ବୋଲି କହିଛନ୍ତି ପୁରୀ ଜିଲ୍ଲାପାଳ ।
ସେପଟେ ବଡଠାକୁରଙ୍କ ନାଗାର୍ଜୁନ ବେଶରୁ ସୂର୍ଯ୍ୟ,ଚନ୍ଦ୍ର ନେଇଯିବା ପ୍ରସଙ୍ଗରେ ଆରମ୍ଭ ହୋଇଛି ତନାଘନା । ପୁରୀ ଶ୍ରୀମନ୍ଦିରରେ ପହଚିଂ ଯାଂଚ କରିଛନ୍ତି ମୁଖ୍ୟପ୍ରଶାସକ, ଜିଲ୍ଲାପାଳ ଓ ନୀତି ପ୍ରଶାସକ । ବେଶ ସରିବା ପରେ ସରଜାଂମ ଶ୍ରୀମନ୍ଦିର ବାହାରକୁ ଯାଇଛି କି ନାହିଁ ସେ ଦିଗରେ ତଦନ୍ତ କରାଯିବ । ବେଶ ଯୋଗାଇଥିବା ବଳରାମ ଖୁଂଟିଆକୁ ମଧ୍ୟ ପଚାର ଉଚାର କରାଯିବ । କମାଣ୍ଡରଙ୍କୁ ତଦନ୍ତ କରି ରିପୋର୍ଟ ଦେବାକୁ କୁହାଯାଇଛି । ରିପୋର୍ଟ ଆସିବା ପରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।
ଅଭିଯୋଗ ଅନୁସାରେ ଜଣେ ସେବାୟତଙ୍କ ଘରକୁ ଏହି ସୂର୍ଯ୍ୟ, ଚନ୍ଦ୍ରକୁ ନିଆଯାଇଥିଲା । ନାଗାର୍ଜୁନ ବେଶ ଦେଖିବାକୁ ଭକ୍ତ ବଂଚିତ ହୋଇଥିବାରୁ ଲାଗି ହୋଇଥିବା ବେଶକୁ ସଂଗ୍ରହାଳୟରେ ରଖାଯିବ ବୋଲି ନିଷ୍ପତି ନେଇଥିଲା ଶ୍ରୀମନ୍ଦିର ପ୍ରଶାସନ । ଛତିଶା ନିଯୋଗ ଓ ପରିଚାଳନା କମିଟି ବୈଠକରେ ସର୍ବସମ୍ମତି କ୍ରମେ ଏହି ନିଷ୍ପତି ହୋଇଥିବା ବେଳେ କାହା ନିର୍ଦ୍ଦେଶରେ ସେବାୟତଙ୍କ ଘରକୁ ସୂର୍ଯ୍ୟ ଚନ୍ଦ୍ର ଗଲା ତାକୁ ନେଇ ପ୍ରଶ୍ନ ଉଠିଛି ।